(Salam ngan Ucapon Sukor Paulus) ¹ Deri Paulus, Silwanus, ngan Timotius kepodo jemaat de Tesalonika, nyo ado delom Allah Bepa ngan delom Tuhan Yesus Kristus. Anugrah ngan damai menyertai kowe. ² Kamie teros mengucap sukor kepodo Allah untok kowe segelo, ngan menyambot kowe delom doa-doa kamie, ³ selalu mengingot pekerjaon iman, usaha kaseh, ngan ketekunon pengharoponme de delom Tuhan kite, Yesus Kristus, de hadopon Allah ngan Bapa kite. ⁴ Dolor-dolor nyo dekasehi Allah, ketahulia behwa Nye lah memileh kowe. ⁵ Sabab, Injil* kami hopi detong kepodome delom kato-kato bae, cuma jugo delom kuaso, delom Roh Kudus*, ngan keyakenon ponoh; upa nyo kowe ketahui urang-urang upamone kamie nie de antaro kowe, demi kepentengonme. ⁶ Kowe lah menjedi urang-urang nyo meneladani kamie ngan Tuhan ulehnyo kowe nerimo firman delom neman penderitaon ngan sukacita deri Roh Kudus, ⁷ empoknyo kowe menjedi teladan bage segelo urang pecayo de Makedonia ngan Akhaya. ⁸ Sabab, derime firman Tuhan begamo bukon anyo de Makedonia ngan Akhaya, meloenko jugo de setiap tempat, imanme kepodo Allah lah tersebar sehinggo kamie hopi perlu mengehatokoh apo-apo lage. ⁹ Sabab, mike dewek menceritokoh tentang kamie, upamone kowe menyambot kamie, ngan upamone kowe bebelek kepodo Allah deri behala-hal* untok melayani Allah nyo hidop ngan bonor, ¹⁰ ngan untok menantiko kedetongan Anak-Nye deri surga, nyo lah Nye bangketko deri antaro urang mati, iyelah Yesus, nyo menyelamatko kite deri murka nyo nak detong.