¹ Dolor-dolor, kowe dewek tahu behwa konjongan kamie kepodome hopi sio-sio. ² Walaupon kamie menderita sebelomnye, upa nyo kowe ketahui, deaniaya ngan dehino de Filipi, kamie memeleki keberanion de delom Allah untok memberitakoh Injil* Allah kepodome de tongoh nemannye perlawanon. ³ Sabab, nasehat kamie hopi berasol deri kesosoton, kehopimurnion, apo deri kepalsuon, ⁴ cuma upamone kamie lah desetujui Allah untok depecayokoh Injil, demikionla kamie mboekonye, bukon untok menyenangkoh mendesio, meloenko untok menyenangkoh Allah nyo menguji hati kamie. ⁵ Kamie hopi pernah detong ngan kato-kato nyo merayu, upa nyo kowe ketahui, apo ngan dali demi keserakahon -- Allah adolah saksi kamie. ⁶ Kamie jugo hopi ndelok pujion deri mendesio, beik deri kowe ataupon deri urang loen, meskipon sebagoi rasol-rasol Kristus, kamie pacok menontotnye derime. ⁷ Sebeleknye, kamie besikap lemah lombot de antaro kowe, upa seurang indok nyo mengasoh ngan merawat anak-anaknye dewek. ⁸ Jedi, delom kaseh sayong nyo gede kepodome, kamie endok memborikoh kepodome bukon Injil* Allah bae, meloenkoh jugo hidop kamie dewek ulehnyo kowe lah sangat kamie kasehi. ⁹ Sabab, kowe ingot, Dolor-dolor, usaha nga begawe karas kamie, upamone kamie bekerjo siang ngan malom empoknyo kamie hopi menjedi bobon bageme sementaro kamie memberitakoh Injil* Allah kepodome. ¹⁰ Kowe adolah saksi-saksi, ngan jugo Allah, betapa suci, bonor, ngan hopi celanye kamie hidop de antaro kowe nyo pecayo. ¹¹ Upa kowe ketahui, kamie menasehati, menghibor, menyoroh kowe maseng-maseng, upa seurang bepak kepodo anak-anaknye dewek, ¹² empoknyo kowe hidop sesuoi ngan kehendok Allah, nyo memanggel kowe ke delom kerajaon ngan kemuliaon-Nye dewek. ¹³ Kamie jugo selalu mengucap sukor kepodo Allah untok hal nie, behwa ketiko kowe nerimo firman Allah, nyo kowe dengor deri kamie, kowe nerimonye bukon sebagoi perkehatoon mendesia, meloenko upamone nyo seharusnyo, iyelah perkehatoon Allah, nyo sedang bagawe de antaro kowe, urang-urang pecayo. ¹⁴ Dolor-dolor, kowe lah menjedi urang-urang nyo meneladani jemaat-jemaat Allah delom Yesus Kristus nyo ado de Yudea ulehnyo kowe jugo lah mengalami penderitaon nyo samo, nyo berasal deri urang-urang sebengesome dewek, upa nyo mike alami deri urang-urang Yahudi ¹⁵ nyo lah membunoh Tuhan Yesus ngan jugo para nabi,* upa menguser kamie. mike hopi menyenangkoh Allah ngan memosohi segelo urang. ¹⁶ Mike menghalangi kamie untok memboek kepodo urang-urang bukon Yahudi empoknyo mike pacok deselamatkoh. Upa iyelah mike teros memonohi doso mike, cuma murka lah turun atas mike seponohnye. ¹⁷ Dolor-dolor, setelah untok sementaro waktu kamie depisohkoh deri kowe -- secaro fisik, bukon secaro roh -- kamie semaken ndelok ngan amat betatap muka nganme. ¹⁸ Sabab, kamie endok detong kepodome, bahkan ake, Paulus, sodah beberapo kalo, cuma Iblis menghalangi kamie. ¹⁹ Sabab, siapokoh harapon, sukacita, apo mahkota kebanggaon kamie de hadapon Tuhan Yesus podo kedetongan-Nye? Bukonkoh kowe? ²⁰ Kowelah kemuliaon ngan sukacita kamie.