¹ Aku nasehati penatua ka antara kao, aku, nyianlah sasama panatua dan sakasi panganiayaan Kristus, dan uga angota peserta daapm kamuliaan nang mo di nyataatn. ² Oleh karana koa, aku nasehati penatua, gembalaatn kawanan domba Allah nang ada ka kao. paratiatn kabatne, buke karana harus tapi karana karelaannyu, sasuai bakahendak Allah. Paratiaatn kabatne buke ngago untukng, tapi karana karelaan. ³ Amelah batingkah sarupa tuan ka urakng - urakng nang kao gembalaatn, tapi jajilah taladan ka kawanan domba. ⁴ Pas Gembala Agung di nyataatn kao akan narima mahkota kamuliaan nang inak akan luntur. ⁵ Bacara nang sarupa, kao nang labih muda, tabelah ka nang tuha. Kitak samua pakelah karendahatn ati dan layanilah seko ba nang laine, karana Allah nolak urakng - urakng nang sombong, tapi mare kasih karunia ka nang rendah atie. ⁶ Oleh karana koa, rendahatnlah dirinyu ka babah kokot Allah nang ayak supaya Ia bisa ningian kao pas ka waktue. ⁷ Sarahatnlah kakawatiratnnyu ka Ia, karana Ia ngarawat kao. ⁸ Sadarlah, bajaga - jagalalah. Musuhnyu, siibalis, sarupa singa nang mangaum - ngaum bajaatn ngalilingi kao, ngago urakng nang bisa di rangkam. ⁹ Badiri lawan ia. jajilah kuat daapm imannyu. Nahuilah kade kamaruk - kamaruknyu pun ka dunia nyian mandarita pandaritaan nang sarupa. ¹⁰ Aka kao mandarita sabantar, Allah sumber sagala kasih karunia, nang dah nyaru kao ka kamuliaanNe nang kekal daapm Kristus, akan nyampurnaan kao, neguhatn kao, dan nguatatn kao. ¹¹ Bagi Ia kakuasaan salama - lamae. Amin. ¹² Aku ngangap Silwanus sarupa kamaruk nang satia, dan aku dah mare tulisan ponok nyian ka kao ngalalui ia. Aku nasehati kao dan basaksi ka kao kade samua nag dah ku tulis nyian anugerah Allah nang batol. Badirilah kadaapme. ¹³ nang bini nang ada ka babilon, nang dah tapilih basirage ba kao. mare salame. uga Markus putraku, mare salam. ¹⁴ Barelah salam seko ka nang laine baciuman kasih, Kirae damai sejahtera nyaratai kitak samuae nang ada ka daapm Kristus.