¹ Dari Petrus, rasul Yesus Kristus, ka urakng - urakng nang tasebar, kaum tapilih ka saluruh Pontus, Galatia, kapadokia, Asia, dan Bitinia. ² Sasuai ba rancana Allah Bapa, oleh pangudusatn dari roh kudus, untuk ka taatatn ka Yesus Kristus, dan pangampekatn darahE.kirae anugerah ada ka kao, dan kirae uga damai sejahtera batamah - tamah. ³ Kirae Allah dan Bapa dari Jubata dirik Yesus Kristus tabarakati, Daapm kamurahatnE, Ia mareatn ka dirik kalahiran barahu demi kayakinan dari sabuah warisan ngalalui kabangkitatn Yesus Kristus dari kamatiatn. ⁴ yakoa warisan nang inak akan paranah ilang, inak tanoda, dan inak akan pudar. Warisan koa udah di narohi ka saruga untuk kao. ⁵ Oleh kuasa Allah kao di ngalindungi ngalalui iman bagi kasalamatan nang siap di nyataatn ka ari - ari ahir. ⁶ Kao basukacita nganai parihal koa, walopun angkitn kao ngarasai pandaritaan ka daapm bamacam pancobaan. ⁷ Hal nyian tajadi supaya iman nyu di uji, iman nang labih baraga dari pada amas, nang bisa di tunu ka daapm api nang nguji iman nyu. Samua nyian tajadi supaya ujiantn iman nyu ngasilatn pujiatn, kamuliaatn, dan hormat pas Yesus Kristus di nyataatn. ⁸ Kao nape paranah nee Ia, tapi kao ngasihi Ia. Kao nape nee Ia angkitn nyian, tapi kao picaya ka Ia dan sidi basukacita dengan sukacita nang ina takataatn, nang panuh kamuliaan. ⁹ kao angkitn nyian gi narima ka diri nyu babaro asil daari iman nyu, kasalamatatn jiwa nyu. ¹⁰ para nabi ngagoi dan batanya tarus nganai kasalamatatn nyian, nganai anugerah nang akan jaji milik nyu. ¹¹ Kabatne nyalidiki nganai sae dan kamie Roh dari Kristus nang ada ka daapm kabatne koa dan bakata ka kabatne. Nyian tajadi waktu Roh mare nauan kabatne nganai pandaritaan Kristus dan kamuliaan nyusul aka koa. ¹² Hal koa di nyataatn ka para nabi kade kabatne buke kahe ngalayani kabatne babaro, malainkan kao. Ba maratiatn nyianlah kabatne ngalakuatn ahe nang di sampeatn ka kao ngalaui kabatne ngalalui pangaratiatn dari Roh kudus, nang dah di kirim dari saruga. Nyianlah hal - hal nang para malaekat pun mao nahui. ¹³ Jadi, siapatlah pikirannyu. Biarlah pikiran nyu jaji baraseh. Yakinlah sapanuhe akan anugerah nang akan di bareatn ka kao, daapm panyataatn akan Yesus Kristus. ¹⁴ Sabagai anak - anak nang taat, ame nyarah untuk ikuti dorongan nyu, sarupa sanape kao bapagatahuan. ¹⁵ Namun, ayamae Ia nang dah nyaru kao adalah kudus, ayakoa uga kao, hendaklah kao kudus ka daapm satiap tingkah lakunyu. ¹⁶ karana ada tatulis, "Kuduslah kao, sabab aku kudus." ¹⁷ Dan, apabila kao nyaru "Bapa" yakoa Ia nang tanpa nee muha hakimi satiap urakng manurut parbuatane, abisatnlah waktu pajaanan idupnyu daapm hormat ka Ia. ¹⁸ kao nauan kade kao udah di nabus dari kalakuan bodo nang kao baajar dari enek moyang nyu, buke ba barang nang fana perak atao amas. ¹⁹ Tapi kao udah di nabus ba darah Kristus nang mulia, sarupa ba anak domba nang inak bacacat. ²⁰ Kristus udah di nantuatn sanape dunia di jajiatn, tapi angkitn ka ari - ari ahir nyian, Ia udah di madahatn ka kitak samuae. ²¹ Ngalalui Ia kao picaya ka Allah, nang Allah udah bangkitatn Ia dari antara urakng mati dan Ia uga dah di mare kamuliaan sahingga iman ba ka picayaatn nyu ada ka daapm Allah. ²² Kao udah mijawat jiwa nyu kudus karana taat ka kabanaratn. bagi tujuan kasih nang tulus, kasihatnilah seko ba nang lain sacara tulus umpat ka ati. ²³ kao dah lahir barahu, buke ba banih nang fana, tapi banih nang inak bisa ancur, ngalalui firman Allah nang idup ba kekal ²⁴ Karana, "samua tubuh sarupa rumput, dan kamuliaane sarupa bunga rumput. rumput jaji karikng, bungae pun mati, ²⁵ tapi firman Tuhan kekal salamae."Nyian lah kabar baik nang dah di nyampeatn ka kao.