¹ Ketiko Yesus nempalok, Io mantau urakng-urakng nopuh pesomoh ke dalamp badoh ah. ² Io mantau gam jano mensekent nopuk duo peser duet ke dalamp badoh pesomoh yok. ³ Lalu Jokuk Io, "Aku modoh ikint, jano mensekent tuk morik lobih banyak dari semuo urakng yok. ⁴ Kareno sidok semuo morik pesomoh dari kelimpoh ah, tapi jano tuk morik dari kekurakng ah, maloh io morik semuo pengulih ah." ⁵ Ketiko ado urakng-urakng yang bekesoh tontakng Bait Allah dant erant dengan penangamp ah dengan diiyas batu yang bagak-bagak dant barakng-barakng pesomoh ah, bejantoh am Yesus, ⁶ "Apai yang kint pantau diok - akant datakng ketiko ah dimonai bonsik sigik pai batu telotak diatas batu yang laint; semuo yok diancur obih." ⁷ Mured-mured Ah betanyok kepado Yesus, jokuk sidok, "Guru, sebilai yok tejadi? Dant apai tano ah, kalau yok onak tejadi?" ⁸ Cohut Io: "Waspado am, supayo ikint ajum disosat. Sobab banyak urakng datakng dengan makai namo-Ku dant bejantoh: Aku am Io, dant Ketiko ah udoh dampikng. Ajum ikint nunok sidok. ⁹ Dant kalau ikint ningo porakng dant pemberontak, ajum ikint tepanyat. Sobab semuo yok arus tejadi olu, tapi yok bukant lalu kesudoh ah onak datakng." ¹⁰ Io bejantoh kepado sidok, "Banso akant ngelawant banso dant kerajoant akant ngelawant kerajoant, ¹¹ dant akant tejadi gompo bumi yang kuat dant di banyak orukng akant ado pemodih sampar dant lapar tapas, dant akant tejadi gam hal-hal yang nemponyat dant tano-tano yang nyaroh di langit. ¹² Tapi seopant semuo yok, ikint akant ditangkap dant dianiayo; ikint akant disoroh ke laman-laman orukng urakng semayakng dant penyaro, dant ikint akant diodapt kepado rajo-rajo dant penguaso-penguaso kareno namo-Ku. ¹³ Yok am kesompat ikint untuk besaksi. ¹⁴ Sobab yok ditotap am dalamp ati kint, supayo ikint ajum mikir segalo pembelo dirik kint. ¹⁵ Sobab Aku kedirik morik kepado ikint kato-kato hikmat, sehingo ikint bon dapat ditontakng atau dibantoh lawant-lawant kint. ¹⁶ Dant ikint akant disoroh gam lago urakng tuho kint, mpalo menyadik kint, kaump keluargo kint dant mpukng kabant jerahant kint dant diantaro ikint akant dibunuh. ¹⁷ dant ikint akant diboncik semuo urakng kareno namo-Ku. ¹⁸ Tapi, sekatakng ubuk kint pai bon akant losi. ¹⁹ Kalau ikint totap betahant, ikint akant napat idupt kint." ²⁰ "Kalau ikint mantau Yerusalem dikumakng kelilikng segalo tentara, dikeponai am, bahwa kejatuk ah udoh dampikng. ²¹ Ketiko yok, urakng-urakng yang ado di Yudea arus bedari ke gunung, dant urakng-urakng yang ado di koto arus pinoh, dant urakng-urakng yang ado di teratak ajum masok ke dalamp koto, ²² Sobab yok am maso pemalas untuk ngonap semuo yang udoh ditulis. ²³ Celako am betinok-betinok yang tongoh nganukng atau tongoh nyusu mpukng biak maso yok! Sobab akant datakng kesusoh yang maho atas semuo negeri dant atas banso tuk, ²⁴ dant sidok akant mati lago mato podakng dant dibaik untuk ditawant se segalo banso, dant Yerusalem akant ditijak irik lago banso-banso yang abon ngonal Allah, sampai gonap zaman banso-banso yok." ²⁵ "Dant akant ado tano-tano di matoari dant bulant dant bintakng-bintakng, dant di dunio banso-banso akant golak dant erant ngadap ingan dant gelumakng laut. ²⁶ Urakng akant mati golak kareno bingung berubong dengan segalo yang ngonok dunio tuk, sobab kuaso-kuaso langit akant beguncakng. ²⁷ Pado waktu yok urakng akant mantau Anak Mensio datakng dalamp omunt dengan segalo kuaso dant kemulio-Io. ²⁸ Kalau semuo tuk tejadi, uwas am dant angkat am muho kint, sobab penyelamat ikint udoh dampikng." ²⁹ Lalu Yesus ngesoh perumpamo tuk kepado sidok, "Pantau kayu aro atau kayu barakng ari am. ³⁰ Kalau ikint mantau kayu-kayu yok besulik, ikint panai kedirik bahwa musimp panas udoh dampikng. ³¹ Beok gam, kalau ikint mantau bereno yok tejadi, keponai am, bahwo Kerajoant Allah udoh dampikng. ³² Aku bejantoh kepado ikint, "Jeman ikint tuk bon akant lalu, seopant semuo yok tejadi. ³³ Langit dant dunio akant lalu, tapi pekato Aku bon akant belalu." ³⁴ "Jago am dirik ikint, supayo ati kint ajum limuh lago keramai kerinu yang ngemabuk dengan keponteng-keponteng dunio dant supayo ari Tuhant ajum nemponyat ikint datakng ah sehingo lalo ngebodi. ³⁵ Sobab io akant ngonok semuo penduduk dunio tuk. ³⁶ Bejago lolu am samil bedo'o, supayo ikint napat kekuat untuk lopas dari semuo yok, dant supayo ikint tahant bediri di odapt Anak Mensio." ³⁷ Pado tongoh ari Yesus ngajar di Bait Allah dant pado malamp ari Io keluar dant bemalamp di gunung yang namo ah Bukit Zaitun. ³⁸ Dant ketiko ari udoh padakng, semuo urakng datakng nompuh Io untuk ningo Io.