¹ Sutik ketiko Yesus ngajar urakng banyak di Bait Allah dant ngesoh Inyil, datakng gam imam-imam kepalok dant ahli-ahli Taurat dengan tuho-tuho koyok, ² dant sidok bejantoh kepado Yesus, "Cubo podoh kepado kami, dengan kuaso monai Duant ngerojo hal-hal yok, dant sapai yang morik kuaso kepado Duant!" ³ Cohut Yesus kepado sidok, "Aku gam onak nanyok sutik petanyok kepado ikint. Podoh am kepado Aku, ⁴ Permanik Yohanes yok, dari surgo atau dari mensio?" ⁵ Sidok nimakng petanyok yok diantaro sidok, dant bejantoh, "Tik kito podoh dari surgo, Io akant bekato: 'Ngapai ikint bon pecayok kepado io?' ⁶ Tapi tik kito podoh: 'Dari mensio, semuo mensio dituk tentu nuhuk kito dengan batu, kareno sidok yakent, kalau Yohanes adolah surakng nabi." ⁷ Lalu sidok nyohut, bahwo sidok bon panai dari monai asal permanik yok. ⁸ Mako kato Yesus kepado sidok, "Kalau beok, Aku pai abon gam modoh kepado ikint dengan kuaso monai Aku ngerojo hal-hal yok." ⁹ Lalu Yesus ngesoh perumpamo tuk kepado urakng banyak, "Ado surakng mukok kobunt angor; lalu io nyewo ah kepado urakng-urakng untuk ngerojo ah, sementaro io ingkas ke negeri laint untuk waktu yang kaso pelamoh ah. ¹⁰ Ketiko udoh waktu ah, io nyuruh surakng pelayant ah nompuh urakng-urakng yang ngerojo kobunt io supayo sidok nyoroh pemagi yang ompuk io. Tapi, urakng-urakng yang ngerojo kobunt yok, mangkukng melasoh pelayant yang io kirimp, sehingo io pulakng puakng. ¹¹ Seudoh yok io nyuruh sikuk pelayant gik nompuh sidok, tapi pelayant yok pai dipangkukng pelasoh dant diborik malu lago sidok, io pai pulakng puakng gam. ¹² Lalu io nyuruh pelayant io yang ketigo, tapi io pai dipepodih sidok gam dant disempiukng keluar dari kobunt yok. ¹³ Mako kato tuant kobunt angor yok, "Kati ngatuh tuk? Aku nyuruh anakku yang palikng kusayakng yok am, tentu sidok omakng dengan io." ¹⁴ Tapi, ketiko urakng-urakng yang ngerojo kobunt yok mantau anak io, sidok bepokat, kato sidok, 'Io tuk ahli waris ah, bom kito bunuh io, supayo warisant tuk pulakng ke kito.' ¹⁵ Lalu sidok nyemparai io keluar dari kobunt dant munuh ah. Apai yang akant dikerojo tuant kobunt angor yok kepado sidok? ¹⁶ Io datakng dant ngebinaso urakng-urakng yok, dant nyoroh kobunt io kepado urakng yang laint." Ningo yok sidok bejantoh, "Ajum am samo sekali!" ¹⁷ Tapi Yesus nempalok sidok, lalu bejantoh, "Kalau beok apai roti nas tuk: 'Batu yang udoh dibuakng lago tukakng-tukakng yang muloh laman, udoh menyandi batu penyuru? ¹⁸ Sapai gono yang jatuh ke atas batu yok, io akant ancur, dant sapai yang ditingakng batu yok, io akant lolok." ¹⁹ Lalu ahli-ahli Taurat dant imam-imam kepalok berusaho nangkap Io ketiko yok gam, kareno sidok panai, bahwo sidok am yang dimaksod Io dengan perumpamo yok, tapi sidok golak kepado urakng banyak. ²⁰ Ahli-ahli Taurat dant imam-imam kepalok neliti Yesus. Sidok sengajo nyuruh nompuh io mato-mato yang seolah-olah urakng jujur, supayo sidok dapat nekelept Io dengan sebuoh petanyok untuk nyoroh Io kepado wali negeri. ²¹ Urakng-urakng yok sengajo nanyok Io, "Guru, kami panai, bahwo segalo pekato dant pengajar Duant konok dant Duant abon mintok puji, tapi dengan jujur ngajar jalant Allah. ²² Panai bon kami mayar pajak kepado Kaisar?" ²³ Tapi Yesus panai ke maksod sidok yang bon baik yok, lalu bejantoh kepado sidok, ²⁴ "Borik kepado Aku sedinar; gamar dant tulis sapai tuk?" Cohut sidok, Gamar dant tulis Kaisar." ²⁵ Lalu kato Yesus kepado sidok, "Kalau beok, borik kepado Kaisar apai yang wajeb kint borik kepado Kaisar dant kepado Allah apai yang wajeb kint borik kepado Allah!" ²⁶ Dant sidok bon dapat nekelept Io dalamp jantoh kato Io di odapt mensio banyak. Sidok erant dant diamp mantau caro Io nyohut petanyok sidok. ²⁷ Mako datakng kepado Yesus duo tigo ikuk ah urakng Saduki, yang bon pecayok ke dari mati pulakng idupt. Sidok betanyok kepado Io, ²⁸ "Guru, Musa nulis perentoh tuk untuk kito, 'Kalau surakng ado mpalo lelaki, mati sementaro bini ah gik ado, tapi bonsik anak, mpalo io arus nikoh dengan betinok yok dant ngasel keturunt untuk mpalo io yok. ²⁹ Adolah tujuh ikuk mpalo. Yang pertamo nikoh dengan sikuk betinok lalu mati dengan bonsik keturunt. ³⁰ Lalu betinok yok nikoh lagik dengan mpalo io yang keduo, ³¹ dant ketigo dant beok lolu am dengan ketujuh mpalo menyadik yok, sidok semuo mati dengan bonsik anak. ³² Aher ah betinok yok pai mati. ³³ Kati dengan betinok yok, sapai diantaro sidok yang menyadi laki ah pado ari urakng mati pulakng idupt gik? Kareno ketujuh mahadikng yok bebini dengan io.' ³⁴ Cohut Yesus kepado sidok, "Urakng-urakng dunio tuk nikoh kawent gono am, ³⁵ tapi sidok yang diongap pantas untuk napat pemagi dalam dunio yang laint yok dant dalamp urakng mati pulakng idupt dari antaro urakng mati, bon lah nikoh kawent. ³⁶ Kareno sidok bon dapat mati lagik; sidok samo ubo malaekat-malekat dant sidok adolah anak-anak Allah, kareno sidok udoh pulakng idupt gik. ³⁷ Untuk pulakng idupt dari kemati, Musa udoh modoh dalamp nas tontakng unak durik, Tuhant disobut Allah Abraham, Allah Ishak dant Allah Yakub. ³⁸ Io bukant Allah urakng mati, tapi Allah urakng idupt, sobab di odapt Io semuo urakng idupt." ³⁹ Ningo yok sikuk duo ahli Taurat bejantoh, "Guru, cohut Duant yo topat mat." ⁴⁰ Kareno yok, sidok bon berani nanyok apai-apai lagik kepado Yesus. ⁴¹ Tapi Yesus bejantoh kepado sidok, "Kati urakng dapat modoh, bahwo Mesias adolah Anak Daud? ⁴² Dirik Daud doh bejantoh dalamp kitab Mazmur, "Tuhant udoh berfirman kepado Tuantku, 'duduklah di sepiak kanan-Ku, ⁴³ sampai musuh-musuh Duant ditijak irik lago Duant.' ⁴⁴ Daud gono nyobut Io Tuant ah, kati gik Io lalu anak ah?" ⁴⁵ Ketiko semuo urakng banyak ningo, Yesus bejantoh kepado mured-mured-Ah, ⁴⁶ "Ati-ati ikint dengan mpukng ahli-ahli Taurat yang senang bejalant makai juboh panyakng dant senang nerimok hormat di pasar, yang suko duduk palikng depan di laman ibadah dant orukng-orukng yang dihormat dalamp keramai kerinu, ⁴⁷ yang nolant laman jano-jano dant ngelabuk mato urakng dengan do'o yang panyakng-panyakng. Sidok pasti nerimok ukump yang lobih borat."