¹ Yesus mulai ngajar agik diau tebing danau. Bekumpolme urang alam jumlah mayuh ngelingkung Yesus sampai Ia nikik alam sutik perau duduk diau atau danau. Sementara, urang mayuh nyak diau darat, diau tebing danau. ² Nya ngajar keh sidak ngenai mayuh hal utai ngau umpama-umpama. Ari pelajar-Nya, Ia bejakuk ngusung hidak, ³ "Dingame! Bisik sikuk urang pemenih tik menih. ⁴ Maka tejadime pas ia tengan menih, lebih ari sutik benih labuh diau sisi jalai, lalu burong datai makaieh. ⁵ Bisik kedak di atau tanah batu ti ntai mayuh tanaheh. Benihnyak kak tumoh ngau deras karna tanah nyak ntai dalam. ⁶ Pas mata panas makin tinggik, utai ti tanam nyak retung karna ntai bisik urat, utai ti tanam nyak nyadi kering. ⁷ Bisik kedak ti labuh diau tengah-tengah kampung durik. Udahnyak, kampung durik tumboh ngepit utai ti tanam nyak sampai mati, utai tanam nyak ntai bisik buah. ⁸ Amat piak, bisik kedak ti labuh ketanah ti subur serta ngasilke buah, mansang tumboh, betambai besai, serta ngasilke tiga puloh kali lipat, enam puloh kali lipat, ngau seratus kali lipat." ⁹ Udahnyak, Yesus bejakuk, "Sapa ti bisik pending ngau ningake, ayukeh ia ninga!" ¹⁰ Pas dapik Yesus kedirik, urang diau keliling-Nya, sama-sama ngau keduabelas rasul, nanyakke ngusungnya ngenai umpama-umpama nyak. ¹¹ Ia nyaut hidak, "Rahasia Kerajaan Allah udah diberik nguang ikau. Amat piak, ngusung urang lain, tiap utai ti dipadahke alam umpama-umpama, ¹² kakke, 'Amatpun tauk medak, sidak medak serta ntai ketauk; tapi amat pun tauk sidak ninga, sidak ninga tapi ntai paham. kakke hidak anang betubat taukke diampun."' ¹³ Udahnyak Yesus bejakuk ngusung hidak, 'Ntaikah ikau ngerti umpama tuk? Katibaka ikau tauk semua umpama nyak? ¹⁴ Pemenih nyak menihke firman. ¹⁵ Sidak tukme urang-urang ti labuh diau sisi jalai, awak firman dibenihke. Dapik hidak ninga, antu langsung datai ngerebut firman tiditanam ngusung sidak ¹⁶ Piak ugak, sidak ti dibenihke diau tanah bebatu yakme urang-urang ti ningake firman ngau kemaya nerimaknya enggau sukacita. ¹⁷ Amat piak, sidak ntai beurat ari alam dirik ya kedirik serta cuma betan sekejap. Udahnyak, pas datai susah ngau penganiayaan. ¹⁸ Utai ti lain nyakme ti labuh diau tengah-tengah kampung durik. Sidak nyakme urang-urang ti ninga firman, ¹⁹ tapi utai ti di takutke ngenai menua, serta pengingin penekak ngau pengaya, serta penekak-penekak ngenai utai-utai bukai namak diau ntara firman nyak majak nya sampai ia ntai tauk bebuah. ²⁰ Tapi, sidak tidibuai diau tanah ti baik nyakme sidak ti ningake firman, nerimaknya, ngau ngasillke buah, tiga puluh kali lipat, enam puluh kali lipat, serta seratus kali lipat." ²¹ Yesus bejakuk ngau sidak, "Bukaikah pelita? ²² Sebab, ntai bisik ti dilamun ti ntai dipadahke. Piak ugak, ntai bisik rahasia namapun karna utainyak kak dipadahkeh. ²³ Kalau bisik urang ti ngempu pending ngau ninga, ayuke ia ninga!" ²⁴ Lalu, Yesus bejakuk ngau sidak,"Pedakke nama ti ikau dinga. Pemesai ti ikau nggau kak diukurke ngusung ikau, serta agik bisik ti kak ditamaike ngau ikau. ²⁵ Karna sapa ti bisik, nya kak diberik agik, tapi sapa ti ntai bisik, nama pun ugak ti bisik ari nya kak diambik arinya. ²⁶ Udahnyak, Yesus bejakuk, "Kerajaan Allah nyak baka sikuk urang pemenih ti menih ketanah. ²⁷ Pemenihnyak tinuk ngau uwas siang serta malam, benih nyak ngeluarkeh sumbuk serta mansang. Pemenihnyak ntai ketauk kati utai nyak tauk piak. ²⁸ Tanah nyak ngasilke buah ngau kedirikeh. Subak nyumbuk, dah nyak bulir-bulir, lalu igik-igik gendum diau alam bulir nyak. ²⁹ Pas igik-igik gendum nyak besuh, urang langsung ngetaueh karna maya panen nyau datai." ³⁰ Udah nyak, Yesus bejakuk, "Ngau namakah kitai tauk mandingke kerajaan Allah? Taukke, ngau umpama namakah kitai tauk mandingkenya? ³¹ Kerajaan Allah tuk baka igik sesawi ti dibuai ditanah, walaupun igik nyak igik tik paling jepit diau ntara semua igik di bumi, ³² tapi pas dibuai, igik nyak tumoh serta nyadi besai ari semua utai ti tanam diau kebun, serta ngeluarke pampang-pampang besai kakke burong-burong diau udara tauk mulah sarang dibaruhnya." ³³ Ngau mayuh umpama baka nyak, Yesus meritake firman ngusung sidak, sesuai baka ti di dinga sidak. ³⁴ Ia ntai kalak bejakuk ngau sidak ntai ngau umpama, tapi Ia nyelaske semuanyak ngau kedirik ngusung murid-murid-Nya. ³⁵ Pas ari nyak, dapik seudah melari Yesus bejakuk ngau murid-murid-Nya, "Abohme kitai angkat keseberang danau." ³⁶ Seudah nudike mayuh urang nyak, sidak ngemaik yesus sama-sama nikik keperau alai yesus diau. Ngau perau-perau ti laineh sama-sama ngau-Nya. ³⁷ Lalu, dataime ribut ti amat kuat ngau umbak ti besai ngempas perau sampai perau pun penuh ngau aik. ³⁸ Tapi, Yesus diau buritan kapal, tinduk diau atau panggal. Sidak nguaske-Nya sambil bejakuk ngusung-Nya. "Guru, apakah ikau ntai peduli kalau kitai nyau?" ³⁹ Lalu, Yesus ambau serta ngelai ribut, lalu bejakuk ngau laut, "Sunyik, Tenangme!" Maka, ribut pin baduk nyadi amat tenang. ⁴⁰ Udahnyak, Ia bejakuk ngau sidak, "Ngapa ikau ntekik? Apakah ikau mpai bisik iman?" ⁴¹ Sidak nyadi amat ntekik serta bejakuk sikuk ngau yang lain, "Sapa nya tuk? bahkan ribut metat ngau laut pun nurut ngau-Nya!"