1 Lalu, Isa mulei bercerak ken pakea was perumpamaen -perumpamaen. "Ara jema si mengusaha'en sebuah bur anggur. We membangun peger i sekeliling'e, nye menyangkul sebuah putuk tuk meramas anggur, nye membangun sebuah menere pengawas. Kemudien, we menyewanen'e ken penggarap-penggarap bur nye beluh ku luar negeri. 2 Lo musim panen, we mengirim sejema peleyen ken pere penggarap bur oya tuk menerime ari pakea hasil bur anggur'e. 3 Nye tetape, pakea menangkap peleyen oya, nye memepoi'e, Lalu mengusir'e urum pumu kosong. 4 Entap oya, we mengirimen mien peleyen laen'e ken pakea nye pakea memepoi ulu'e, nye memperlakunan'e urum cere si mengkemelen. 5 Lalu, we mengirim peleyen laen'e nye pakea menunuh'e. Hel ini terjadi ken delle laen'e, sebagen i'pepoi, nye sebagen i'unuh. 6 Empu bur oya ara empu sara mien, yaoya anak si i'kasihi'e. Akhir'e, we mengirim anak'e oya ken pakea nye bercerak, 'Pakea male menghormati anak'ku.' 7 Nye tetape, pere penggarap bur oya bercerak sara urum si laen,'Ini araleh ahli waris'e . Entah, kite unuh we nye warisen'e male munjadi empu kite.' 8 Lalu, pakea mengankap'e, nye menunuh'e , nye menekaren'e ke deret bur anggur. 9 Hana si male i'lakunen empu bur anggur oya ?We male engeh nye menunuh pere penggarap oya nye menosahen bur anggur'e ken si laen. 10 Gilen penahkeh kam membaca ayat Kiteb Suci ini: 'Atu si i'tekar oleh tukang bangunen, nge munjadi atu penjuru. 11 Inileh si'ibuh Tuhen, nye si'ibuh ini ajaib i mata kita?" 12 Kemudien, pakea berusehe tuk menangkap-E, tetape pakea terih ken jema delle entap pakea membetih behwe Isa menyawahen perumpamaen oya tuk pakea. Lalu, pakea menaringen Isa nye beluh. 13 Kemudien, pakea mengkeni engeh ken Isa sesideh jema farisi nye jema-jema Herodian tuk menjebak We urum percera'en-E keniri. 14 Pakea engeh nye bercerak ken Isa, "Guru, kami betih behwe Engko benar nye gere peduli urum pendepet jema laen. Sebeb, Engko gere menengon penampilen jema tetape mengejer'en denne Allah si sesue urum kesunguhen. Hanakeh sunguh membayar pajak ken kaisar ato gere?" 15 Terah'keh kami membayar ato turahkeh kami gere membayar? Nye tetape Isa, ngek membetihi kemunafik'en pakea, We bercerak ken pakea," Hanati kam mencubei Aku? Mah ken-Ku sara dinar nye datenleh Aku menengon'e. 16 Lalu, pakea memah'e, nye isa bercerak ken pakea, 'Gambar nye tulisen sahen'keh ini ?" pakea menjeweb-E, ''Gambar nye tulisen Kaisar." 17 Kemudien, Isa bercerak ken pakea, "Osahen ken Kaisar hel-hel si munjadi empu kaisar nye ken Allah hel-hel si munjadi empu Allah."Nye, pakea heran ken Isa. 18 lalu, jema-jema Saduki, si mencerak'en behwe gere ara kebangkiten , engeh ken Isa nye berunger ken-E, cerak pakea, 19 Guru, Musa menulis ken kite behwe ike sejema si empu sudere rarawan, mate nye menaringen sejema inen, tetape gere menaringen anak, sudere'e si rerawan oya turah mengkerjei janda oya nye meng'uten keturunen bagi sudere'e . 20 Ara pitu jema bersudere. Sudere si pertama meneten sejema inen , nye ketike we mate, we gere menaringen keturunen. 21 sudere si keroa mengkerjei benen oya, nye mate gere menaringen keturunen. Unangoya peh urum sudere si ketulu. 22 Nye, gere ara kepitu bersudere oya si menaringen anak. Akhir ari mehne, benen oya peh mate. 23 Pede lo kebangkiten, ketike pakea bangkit, munjadi inen sahenkeh benen oya? Sebeb, kepitu bersudere oya nge menjadinen'e inen." 24 Isa menjeweb pakea,"Umek'keh inileh alasan kam munjadi sesat, entap kam gere mengerti Kiteb Suci atopeh kuese Allah? 25 Sebeb, ketike pakea uwet ato bangkit ari antara jema mate, pakea gere ara si kerje atopeh si i'kerjei, tetapi pakea munjadi unang pere malekat i surge. 26 Tentang jema-jema mate si i'bangkiten, gereleh kam membaca was Kiteb Musa, pede bagen tentang kerpe ngeget, Nyakhi Allah bercerak ken'e,'Aku araleh Allah Abraham, nye Allah Ishak, nye Allah Yakub,? 27 We umek Allah jema mate, tetape Allah jema si murip . Kam suguh-suguh sesat!" 28 Kemudien, salah sara ari pere ahli Taurat engeh nye memenge pakea berdebat. Ketike we menengon behwe Isa ngek menjeweb pakea urum jeroh, nye we berunger ken Isa,"Perintah sihikeh si paling penting ari mehne'e?" 29 Isa menjeweb,"Hukum si paling utama araleh :'Penge he jema-jema Israel! Tuhen Allah kite araleh sara-sara'e Tuhen. 30 Nye, kasihileh Tuhen Allahmu urum sekip atemu, nye urum sekip jiwemu, nye urum sekip pikirenmu, nye urum sekip kekuetenmu.' 31 Nye, si keroa araleh : 'Kasihileh sedismu unang dirimu keniri.' Gere ara hukum si lebih ku ari pede ini." 32 Nye, Ahli Tauret oya bercerak ken Isa, "Engko benar, Guru. Engko benar urum mencerak'en behwe We oya sara, nye gere ara si laen selaen We. 33 Nye, mengasihi-E urum sekip ate, nye urum sekip pengertien , nye urum sekip kekueten, nye mengasihi sedis unang diri keniri, memang lebih penting aripede mehen kurben telongen nye persembahen." 34 Kemudien, ketike Isa menengon behwe jema oya menjeweb urum bijaksana, We bercerak ken'e,"Engko gere gaip ari Kerejeen Allah." Ngemari oya, gere ara mien jema si berani berunger ken Isa. 35 Nye, dang mengejer i Bait Allah, Isa bercerak,"Nyakhi nguk ahli-ahli Tauret bercerak behwe Kristus araleh anak Daud? 36 Daud keniri bercerak i was Roh Kudus, 'Tuhen bercerak ken Tuenku; Kunulleh i semelah kuen-Ku, sawah Aku membuh lewen-lewen-Mu i tuyuh kiding -Mu .' 37 Daud keniri menyebut Kristus sebage 'Tuhen'. Jadi, nyakhi mungkin Kristus anak'e?" Nye, jema delle memenge-E urum senang. 38 Was pengejeren-E,"Isa bercerak,"Arih-arileh terhedep ahli-ahli Tauret, si kenah remalan-remalan memake jubah naru nye kenah menerime salam penghormaten i ton-ton umum, 39 nye empu ton kunul terhormat i sinagoge-sinagoge nye ton-ton kehormatan was perjamuen-perjamuen. 40 Pakea si merampas umah-umah janda nye sebage dalih berdoa si naru-naru. Pakea male menerime hukumen si lebih berat." 41 Kemudien, Isa kunul berarapen urum kotak persembahen nye mengamati jema-jema si memayo'en sen ke was kotak persembahan oya . Delle jema bayak si memayo'en was jumlah kul . 42 Kemudien, sejema janda miskin engeh nye memayo'en roa keping sen logam, si senile sara sen . 43 Nye, Isa menalu murid-murid-E nye bercerak ken pakea, "Aku mencerak'en si suguh'e ken'mu , janda miskin ini nge memayo'en lebih delle ke was kotak oya aripede mehne jema laen'e. 44 Sebeb, pakea mehne menosah ari sebagen kebayaen pakea, tetape janda miskin oya, menosah ari kemiskinen'e, menosah mehne si we empu, yaoya mehne nafkah'e."