¹ Pede lo pertama mingu oya, tengah lo len soboh , benen-benen oya beluh ku kubur Yesus nye memah rempah-rempah si ngek pakea persiepen. ² Nye pakea mendepeti atu kul ngek terguling ari kubur. ³ Nye tetape, seet pakea mayo, pakea gere mendemunen meyet Tuhen Yesus. ⁴ Tengah pakea len terheran-heran entap hel oya, tibe-tibe ara ro jema si memake pakenen berkilau-kilauen sesuk i samping pakea. ⁵ Benen-benen oya peh keterihen nye menunduk'en salak pakea, tetape keroa jema oya bercerak," Hanti kam menerah jema si murip i antara jema-jema mate? ⁶ Yesus gere ara i one, We ngek bangkit. Ingetleh tentang hana si ngek iceraken-E kenmu tengah we len i Galilea. ⁷ We bercerak behwe Anak Manusie turah iserahen ku pumu jema-jema berdosa , isaliben , nye male bangkit mien pede lo ketulu." ⁸ Nye, benen-benen oya teringet ken perceraken Yesus. ⁹ Ngemari pakea ulak ari kubur Yesus, pakea menceritenen mehne peristiwe oya ken kesebelas rasul nye pere penunung Yesus si laen'e. ¹⁰ Benen-benen si menceritenen hel oya ken pere rasul araleh Maria Magdalena, Yohana, Maria amak Yakobus , nye sesideh benen laen. ¹¹ Nye tetape, perceraken benen-benen oya ianggap cerak kosong oleh pere rasul nye pakea gere perceye ken benen-benen oya. ¹² Nye tetape, Petrus sesuk nye sangka ku kubur Yesus. We membungkuk nye menenggon ku was, tetape we renye mendemunen upuh linen pembungkus meyet. Ngemari oya, Petrus ulak urum heran beh etes haan si ngek terjadi. ¹³ Pede lo oya peh , 2 jema penunung Yesus berangkat ku sara desa bergelar Emaus si jarake kire-kire 60 stadia ari Kota Yerusalem. ¹⁴ Keroa jema oya menceraken tentang segele peristiwe si terjadi. ¹⁵ Tengah pekea dang bercerak-cerak nye pertuker pikiren , Yesus keniri engeh mendekatnye remalan berurum urum pakea. ¹⁶ Nye tetape, mata pakea terhalang sehinge pakea gere depet menene We. ¹⁷ Yesus bercerak ken pakea," Hana si kam roa ceraken tengah remalan ?"keroa jema oya peh setop nye salak pakea teridah sedih beh. ¹⁸ Sara sejema ari pakea si bergelar Kleopas bercerak ken-E,"Hanakeh Engko sara-sarae jema asing i Yerusalem si gere membetihi tentang hana si terjadi i one ben-ben ini?" ¹⁹ Yesus bercerak ,"Tentang Hana ?" Pakea peh bercerak ken We ,"Tentang Yesus ari Nazaret . We araleh sejema nabi si kip kuese was perceraken nye perbueten-E i hedepen Allah nye i hedepen mehne bengse kami. ²⁰ Nye tetape, Imem-imem kepala nye pere pemimpin kami menyerahen We tuk ihukum mate, nye pakea menyaliben-E. ²¹ Sebenare kami berherep behwe Weleh si male membebasen bengse Israel. Namun , lo ini araleh lo ketulu sejak mehne'e oya terjadi. ²² Nye tetape, pepien benen ari antara kami ngek mengejuten kami. Tengah pakea ara i kuburen soboh- soboh beh, ²³ pakea gere mendemunen jenazah Yesus. Nye, pakea ulak nye menceraken behwe pakea ngek menenggon penampaken malekat-malekat, si menceraken behwe We murip. ²⁴ Nye, pepien ari kami beluh ku kubur nye menenggon peh unang si iceraken oleh benen-benen oya. Tetape, pakea gere menenggon Yesus." ²⁵ Nye Yesus bercerak ken pakea, " Oh , betapa bodohe kam nye lamban ate tuk memerceyei segele sesuatu si ngek iceraken oleh pere nabi. ²⁶ Umekkeh Kristus turah mengelemi penderiteen ini nye mayo ku was kemulien-E. " ²⁷ Nye, Yesus menjelasen segele sesuatu si tertulis was mehne Kiteb Suci tentang diri-E , mulei ari Kiteb Musa sawah mehne Kiteb pere nabi. ²⁸ Tengah pakea ngek dekat ku desa Emaus, Yesus dor beremalan seakan-akan hendak menerusen perjelenen-E. ²⁹ Nye tetape, pakea menahan We urum bercerak, " Taringleh berurum kami sebeb lo ngek hampir kelam nye matalo hampir lenem." Nye, Yesus mayo tuk taring berurum pakea. ³⁰ Tengah we bergabung berurum pakea i meja man, Yesus meneten ruti nye memberkatie. We memecah-mecahene , nye menosahene ken pakea. ³¹ Seet oya, mata pakea teruke nye pakea menene Yesus. Namun, tibe-tibe Yesus mosop ari pandangen pakea. ³² Ngemari oya, bercerakleh pakea sara urum si laene, " Umekkeh ate kite berkobar-kobar tengah We bercerak urum kite semokot perjelenen nye tengah We menjelasen Kiteb Suci ken kite?" ³³ Pede seet oya peh, pakea sesuk nye ulakmien ku Yerusalem. Pekea mendemui kesebelas murid nye jema-jema si berurum pakea dang berkamul berurum-urum . ³⁴ Murid-murid oya bercerak ken pakea beroa ," Tuhen benar-benar ngek bangkit nye meneridahen diri ken Simon !" ³⁵ Keroa penunung oya peh menceritenen hana si ngek terjadi was perjelenen pakea. Pakea menceritenen nyakhi pakea menene Yesus tengah We memecahen ruti. ³⁶ Tengah keroa jema oya dang menceritenen peristiwe ini, Yesus sesuk i lah-lah pakea nye bercerak ken pakea," Dame besertamu." ³⁷ Nye tetape, pakea jentir nye keterihen. Pakea menyangka behwe pakea dang menenggon jin. ³⁸ Nye, Yesus bercerak ken pakea, " Hanati kam jentir nye keraguen muncul i atemu?" ³⁹ Enggonleh pumu-Ku nye kiding-Ku. Ini benar-benar Aku. Jontokleh Aku nye enggonleh, jin gere empu usi nye tulen unang si kam enggon pede-Ku." ⁴⁰ Ngemari Yesus menceraken ini, We menuruhen pumu nye kiding-E ken pakea. ⁴¹ Sementara pakea len gilen perceye entap gembire nye terheran-heran , Yesus berunger ken pakea , "Hanakeh i hin kam empu sesuatu tuk iman?" ⁴² Nye pakea menosah sekerat iken panggang ken-E. ⁴³ Yesus meneten iken oya nye meman'e i arap pakea. ⁴⁴ Nye, Yesus bercerak ken pakea, " Inileh perceraken si Aku ceraken kenmu dang Aku len berurum'mu. Segele sesuatu si tertulis tentang Aku was hukum Taurat Musa, kiteb pere nabi, nye Mazmur turah ikipi." ⁴⁵ Nye Yesus menuke pikiren pakea sehinge pakea depet memehemi Kiteb Suci. ⁴⁶ Yesus bercerak mien ken pakea, " Ara tertulis behwe Kristus turah menderite nye bangkit ari antara jema mate pede lo ketulu. ⁴⁷ Nye, pertobaten tuk pengampunen dosa male inyataen was gelar-E ken segele begse, mulei ari Yerusalem. ⁴⁸ Kam araleh saksi-saksi ari mehne ini. ⁴⁹ Betihileh, Aku mengirimen janyi Apak-Ku kenmu. Nye tetape , taringleh i kota Yerusalem sawah kam ikipen urum kuese ari ton tinggi." ⁵⁰ Nye, Yesus mengajak pere penunung-penunung-E ke luar kota sawah i Betania . I one , We mengangkat pumu-E nye memberkati pakea. ⁵¹ Tengah Yesus memberkati pakea , We berpisah ari pakea nye terangkat ku surge. ⁵² Nye, pakea menyemah-E nye ulakmien ku Yerusalem urum behegie beh. ⁵³ Pakea dor berede i was BAit Allah nye memuji Allah.