¹ Pede mule'e araleh Firman, Firman oya berurum-urum urum Allah nye Firman oya araleh Allah. ² Firman oya ngek berurum-urum urum Allah sejak semule. ³ Segele sesuatu i'ciptanen melalui We. Ike gere We, segele sesuatu si ngek ara ini gere mungkin nguk ara. ⁴ I was We ara murip nye murip oya araleh Terang manusie. ⁵ Terang oya berceheye i was kegelapen , nye kegelapen gere depet menguesei-E. ⁶ Ara sejema si i'utus Allah, gelar'e Yohanes. ⁷ We ngeh sebage saksi tuk menyawahen kesaksien tentang Terang oya kati melalui we mehne jema munjadi perceye. ⁸ Yohanes keniri umekleh Terang oya, tetape we ngeh tuk menyawahen kesaksien tentang Terang oya. ⁹ Terang si sejati, si menerangi mehne jema, male geh ku dunie. ¹⁰ Terang oya ngek ara i dunie nye dunie ini i'jadinen oleh-E, tetape dunie gere menene-E. ¹¹ We menggehi keempue-E , tetape keempue-E oya gere menerime We. ¹² Namun, pakea si menerime We i'osah-E kuese tuk munjadi anak-anak Allah, ya oya pakea si perceye ken gelar-E. ¹³ Pakea lahir ume ari rayoh ato kemeraen dengke, ato ari kemeraen rerawan , melainen ari Allah. ¹⁴ Firman oya ngek munjadi dengke nye taring i entere kite. Kite ngek menegon kemulieen-E, yaoya kemulieen Anak Tunggal Apak, kip urum anugerah nye kesugguhen. ¹⁵ Yohanes menosah kesaksien tentang We urum berseru,"Inileh We si kumaksuden seet aku bercerak,'Sesudah aku, male geh We si mendahului aku entap We ara semelum aku." ¹⁶ Ari keengkipen-E kite mehne menerime anugerah demi anugerah. ¹⁷ Sebeb, Hukum Taurat i'osahen melalui Musa; tetape anugerah nye kesungguhen geh melalui Isa Kristus. ¹⁸ Gere sejema peh penah menengon Allah, tetape Anak Tunggal Allah, si ara i pangkuen Apak, menyatanen-E. ¹⁹ Inileh kesaksien Yohanes ketike jema-jema Yahudi mengutus imem-imem nye jema-jema Lewi ari Yerusalem tuk megune ken Yohanes, "Sahenkeh engko?" ²⁰ Yohanes mengaku, nye we gere menyangkal'e , we mengaku,"Aku ume Kristus oya." ²¹ Pakea megune ken'e,"Kalo nyakoya, sahenkeh engko? Hanakeh engko Elia?" We menjeweb,"Aku ume Elia." "Hanakeh engko Nabi oya?" We menjeweb,"Ume." ²² Kemudien , pakea bercerak ken'e, "Sahenkeh engko, entap kami turah menosah jeweben ken jema si mengutus kami? Hana cerakmu tentang dirimu keniri?" ²³ Yohanes menjeweb urum perceraken Nabi Yesaya, "Akuleh ling jema si i'ceraken Nabi Yesaya berseru-seru i pedeng belentere: 'Lurusenleh denebagi Tuhen!"' ²⁴ Jema-jema Yahudi si i'utus oya araleh jema Farisi. ²⁵ Lalu, pakea bercerak ken Yohanes, "Ike engko Mesias, ume Elia, nye ume Nabi oya, hanati engko membaptis?" ²⁶ Yohanes menjeweb pakea," Aku membaptis urum aih, tetape i entere kam sesuk Sejema si gere kam tene. ²⁷ Weleh si male geh gemari aku. Menuke tali keletek-E peh, aku gere pantas," ²⁸ Mehne oya terjadi i Betania, i serap Sunge Yordan, ton Yohanes membaptis. ²⁹ Kelang lo'e, Yohanes menegon Isa geh ken'e, nye Yohanes bercerak, "Egonleh, Anak Domba Allah si menghapusen dosa dunie! ³⁰ Welwh si aku maksud'en tengah aku bercerak,'Gemari aku male geh Sejema si lebih kul ari pede aku entap We ngek ara semeluh aku .' ³¹ pudahna , aku gere menene We, tetape kati We i'nyatanen ken jema-jema Israel, nye aku geh membaptis urum aih." ³² Nye, Yohanes bersaksi, cerak'e, " Aku menegon Roh turun ari langit unang manuk merpati nye Roh oya taring pede-E. ³³ Aku keniri gere menene We, tetape We si mengutus aku tuk membaptis urum aih bercerak ken'ku,' We si ke etes-E kam menegon Roh turun nye taring, Weleh si male membaptis urum Roh Kudus.' ³⁴ Aku keniri ngek menegon nye menosah kesaksien behwe We inileh Anak Domba Allah."' ³⁵ Kelang lo'e, Yohanes sesuk mien berurum roa jema murid'e, ³⁶ nye we menegon Isa tengah remalan. Yohanes bercerak,"Engonleh , Anak Domba Allah!" ³⁷ Keroa murid'e memenge perceraen'e oya nye pakea menunung Isa. ³⁸ Isa menegon ku uduh nye tengah menegon pakea tengah menunung-E, We bercerak ken pakea ," Hana si kam terah?" Pakea bercerak ken-E, " Rabi( si ike i'terjemahen arti'e : Guru), i hikeh Engko taring?" ³⁹ We bercerak ken pakea, " Kini nye kam male menegon'e." Nye, pakea geh nye menegon ton We taring nye pakea taring urum-E lo oya entap lo oya kire-kire araleh jem kesepuluh . ⁴⁰ Salah sara ari keroa murid si memenge perceraen Yohanes nye menunung Isa oya araleh Andreas, sudere simon Petrus. ⁴¹ Semelum'e, Andreas mendemui Simon, sudere'e , nye menungeren'e , "Kami ngek mendepet Mesias( si i terjemahen munjadi KRISTUS)." ⁴² Nye, Andreas memah Simon ken Isa. Isa memandang Simon nye bercerak,"Kam Simon, anak Yohanes. Kam male i'talu Kefas." ⁴³ Kelang lo'e , Isa bermaksud beluh ku Galilea. We berdemu urum Filipus nye bercerak ken'e, Tunungleh Aku!" ⁴⁴ Filipus beresel ari Betsaida, kota ton Andreas nye Petrus taring. ⁴⁵ Filipus berdemu urum Natanael nye bercerak ken'e, "Kami ngek mendepeten We si i' tulisen oleh Musa was Hukum Tauret nye oleh pere nabi , yaoya Isa ari Nazaret, anak Yusuf." ⁴⁶ Natanael bercerak ken'e , "Mungkinkeh sesuatu si jeroh geh ari Nazaret?" Filipus bercerak ken'e, "Geh nye egonleh." ⁴⁷ Isa menegon Natanael geh ken-E nye bercerak mengenai Natanael,"Egonleh , sejema Israel sejati, gere ara kepalsuen i was we!" ⁴⁸ Natanael bercerak , "Yakhi Engko menene aku?" Isa menjeweb "Semelum Filipus menalu mu, Aku ngek menegonmu ketike kam berede i tuyuh pohon ara." ⁴⁹ Jeweb Natanael , "Rabi Engko araleh Anak Allah. ENgko araleh Reje jema Israel." ⁵⁰ Isa menjeweb nye bercerak ken'e 'Entap Aku bercerak ken'mu ,'Aku ngek menegon mu i tuyuh pohon ara,'nye kam perceye? Kam male menegon hel-hel si gaip lebih kul aro pede ini!", "Sesungguh'e, Aku bercerak ken'mu, kam male menegon langit teruke nye malekat-malekat Allah naik turun meleyeni Anak Manusie."