¹ Nye, Agripa bercerak ken Paulus," Kam i'izinen bercerak tuk membela diiri." Nye, Paulus merentangen pumue nye menceraken pembelaene. ² "Sehubungen urum mehne hel si ituduhen ken ku oleh jema-jema Yahudi, aku menganggap diriku beruntung, Reje Agripa, entap aku male menceraken pembelaenku i hedepenmu lo ini, ³ khususe entap engko araleh jema si benar-benar betih mehne kebieseen nye persoalen i antara jema-jema Yahudi. Entap oya, aku memohon ken engko tuk memenggen aku urum seber. ⁴ Mehne jema Yahudi betih cere muripku sejak seluhen mudeku, si sejak awal memehen muripku i lah-lah bengseku keniri nye i Yerusalem. ⁵ Entap ngek mokot pakea betih tentang diriku, ike pekea mera, pakea depet bersaksi behwe aku murip sesue urum ejeren kelompok si paling keras ari egeme kite, aku murip sebage jema Farisi. ⁶ Nye siloni, aku sesuk ihin tuk iadili entap pengherepenku male janyi si ijadinen Allah ken enek moyang kite. ⁷ Janyi inileh si iherepen oleh keroa belas suku bengse kite depet tercape, sementara pakea menyemah Allah urum sunguh-sunguh peraklo nye kelam . Nye, entap pengherepen inileh aku ituduh oleh jema-jema Yahudi, Reje. ⁸ Hanati kam anggap mustahil behwe Allah membangkiten jema mate? ⁹ Entap oyaleh, aku keniri mengire behwe aku turah membuh delle hel si menentang gelar Yesus ari Nazaret. ¹⁰ Nye, oyaleh si aku buh i Yerusalem. Aku umek renye memayonen jema-jema kudus ku was penjere, ngemari menerime wewenang ari imem-imem kepala, tetape peh tengah pakea ihukum mate,aku menyetujuie. ¹¹ Nye aku dor menghukum pakea i sinagoge-sinagoge nye berusehe memaksa pakea tuk menghujat . Nye, urum kebengisen si kul beh terhedep pakea, aku menyikse pakea , behken sawah ku kota-kota asing." ¹² "Tuk maksud oya peh, aku dang was perjelenen ku Damsyik, urum wewenang nye penugasen ari imem-imem kepala. ¹³ Seet lah lo, ya Reje, i lah perjelenenku, aku menenggon sara ceheye ari langit, lebih terang ari matalo, si bersinar i sekelilingku nye jema-jema si remalan urumku. ¹⁴ Nye , tengah kami mehne tauh ku atas tanoh , aku memenggen sara ling bercerak kenku was behese Ibrani, 'Saulus, Saulus, hanati kam menyikse Aku? Payah bagimu tuk tipak galah rangsang ato tongkat besi.' ¹⁵ nye aku berunger , 'Sahen Engko, Tuhen?' Nye, Tuhen menjeweb,' Aku Yesus si dang kam sikse. ¹⁶ Namun , uwet nye sesukleh urum kidingmu. Sebeb , Aku ngek meneridahen diri kenmu tuk tujuen ini, yaoya membuhmu sebage sejema peleyen nye saksi, gere renye tuk hel-hel si ngek kam engon , tetape peh tuk hel-hel si male Aku teridahen kenmu. ¹⁷ Aku male menyelemetenmu ari begsemu ini nye ari bengse-bengse laen, si ken pakea aku mengutusmu, ¹⁸ tuk menuke mata pakea kati pakea berbalik ari kegelapen ken terang nye ari kuese Jin ken Allah kati pakea menerime pengamunen atas dosa-dosa nye menerime begen i antara jema-jema si ngek ikudusen oleh imen u was Aku."' ¹⁹ "Nye, Reje Agripa, aku gere penah teet terhedep penengonen surgewi oya, ²⁰ tetape, mule-mule , aku memberitenen'e ken pakea si ara i Damsyik, nye i Yerusalem nye i mehne wileyeh Yudea, peh ken bengse-bengse laen, behwe pakea turah bertobat nye berbalik ken Allah, urum membuh buet-buet si sesue urum pertobaten pakea . ²¹ Oyaleh sebeb'e , jema-jema Yahudi menangkapku i Bait Allah nye berusehe menunuhku. ²² Sawah lo ini, aku ngek menerime pertemuhen ari Allah nye aku sesuk ihin tuk bersaksi, baik ken jema-jema ucak nye jema-jema kul urum gere menceraken hel laen , kecuale hana si iceraken oleh pere nabi nye Musa tentang si male terjadi, ²³ behwe Kristus turah menderite nye behwe , urum elesen munjadi si mule bangkit ari entere jema mate, We male menunggeren terang, baik ken jema-jema Yahudi nye ken bengse-bengse laen." ²⁴ Nye Paulus dang menyawahen hel-hel was pembelaene, Festus bercerak urum ling keras," Paulus, kam ngek gile! Pembetihenmu si delle oya membuh mu gere waras." ²⁵ Namun , Paulus mejeweb ," Si Mulie Festus , aku gere gile, tetape aku menyawahen kebenaren nye cerak-cerak si masuk akal. ²⁶ Sebeb , Reje membetihi hel-hel ini nye kene aku peh bercerak urum berani. Sebeb, aku yakin behwe gere ara sara peh ari hel-hel ini si lolos ari penengonene entap ini gere terjadi i ton si ucak. ²⁷ Reje Agripa , hanakeh engko memperceyei pere nabi? Aku betih engko perceye." ²⁸ Reje Agripa bercerak ken Paulus," Was lo singket, kam ngek meyakinen aku tuk munjadi jema Kristen." ²⁹ Nye, Paulus menjeweb, "Aku memohon ken Allah kati tir ato lambat, gere renye engko, tetape peh mehne jema si memenggenku lo ini, nguk munjadi unang diriku , kecuale rente-rente ini." ³⁰ Nye, reje sesuk . Nye peh gubernur, Bernike, nye mehne jema si kunul berurum pakea. ³¹ Nye, pakea menaringen ton oya, pakea bercerak sara urum silaen ,"Jema ini gere membuh hana peh si pantas ibandingen urum hukumen mate ato penjere." ³² Nye Agripa bercerak ken Festus ,"Jema ini ngek nguk ibebasen ike we gere naik banding ken Kaisar."