¹ Demikien juge kam, hai inen-inen, tunukleh ken aman'mu. Sebeb, hanabile i antara pakea ara si gere teet ken Firmen, pakea depet i'menangen oleh tingkah laku inen'e tanpa cerak-cerak, ² sebeb pakea menenggon betapa murni nye terhormat'e tingkah lakumu. ³ Entileh kecacakenmu beresel ari hiesen deret, misal'e ari mengepang uk, memake perhiesen emas, ato memake pakenen si mal-mal. ⁴ Sebaik'e hendakleh kecacakenmu beresel ari was batinmu, yaoya kecacaken si gere depet layu, si beresel ari roh si lemah lemut nye tenang. Oyaleh si berherge i mata Allah. ⁵ Sebeb, demikienleh benen-benen kudus pede zemen pudahna, si membuh pengherepen pakea ken Allah, mempercacak diri pakea; yaoya urum tunuk ken aman pakea. ⁶ Demikienleh Sara teet ken aman'e, Abraham, nye menalu'e 'tuen'. Kam araleh kekanak Sara ike kam berbuet baik urum gere i'kuasai oleh rasa terih ketike melakunen'e. ⁷ Demikien juge kam, hai aman-aman, muripleh berurum inen'mu urum kip pengertien entap pakea kaum si lebih lemah. Hormatileh pakea sebage sedis ahli waris was menerime anugerah murip kati doa-doamu gere terhalang. ⁸ Akhir'e, hendakleh kam mehne mempu kesatuen pikiren, beles kasih, kasih persaudereen, ati si lemah lemut, nye kerenahen ate. ⁹ Entileh membeles kejeheten urum kejeheten, ato makien urum makien. Sebalik'e, hendakleh kam memberkati sebeb tuk oyaleh kam i'talu, yaoya kati kam mewarisi berkat. ¹⁰ Sebeb Kiteb Suci bercerak, "barang sahen mendenemen murip, nye male menenggon lo-lo si baik, we turah menjege delah'e ari kejeheten, nye bibir'e ari mengucapen tipu muslihat. ¹¹ We juge turah menggaipen diri ari si jehet nye melakunen si baik. Hendakleh we menerah perdamean, nye berusaha mengejar'e. ¹² Sebeb, mata Tuhen memperhatinen jema-jema benar, nye kemiring-E memenggen doa-doa pakea. Namun, wajah-E menentang jema-jema si melakunen kejeheten.'' ¹³ Sahenkeh si akan mencelakaimu ike kam rajin melakunen hal si baik? ¹⁴ Namun, seandaie kam turah menderite demi kebenaren, maka kam akan i'berkati. ''Enti terih nye enti gentar terhedep pakea si membuh'mu menderite.'' ¹⁵ Akan tetape, kudusen'leh Isa sebage Tuhen i was atemu! Siep sedieleh tuk menosah jeweben ken sahen peh si menuntutmu mengenai pengherepen si kam empu, ¹⁶ tetape lakunenleh oya urum lemah lemut nye hormat, serta empuleh ate nurani si jernih kati ketike kam i'fitnah, jema si mencaci cara muripmu si baik i was Isa akan munjadi kemel. ¹⁷ Sebeb, lebih baik menderite entap berbuet baik, ike oya memang kehendak Allah, aripede menderite entap berbuet jehet. ¹⁸ Entap Isa juge telah menderite entap dosa-dosa, seger tuk mehne jema, si benar mate tuk si gere benar, sehingge We depet memah kite ken Allah. I'unuh secara jasmani, tetape i'muripen i was Roh. ¹⁹ Was Roh, We juge beluh nye melakunen pemberitaen ken roh-roh i penjere, ²⁰ yaoya pakea si pudahna gere teet ketike Allah urum seber menanti pakea pede zemen Nuh, sementara NUh membangun bahtera'e. Melalui bahtera oya, renye tik, yaoya waluh jema weh, si i'selamaten oleh aih bah. ²¹ Aih bah oya melambangen baptisen si siloni menyelematenmu. Baptisen umuk tuk membersihen kotoren ari tubuh, tetape merupanen permohonen ken Allah tuk sebuah ate nurani si murni melalui kebangkiten Isa, ²² yaoya We si siloni telah naik ku surge nye berede i semelah kuen Allah; gemari mehne malekat, para pemerintah, nye para penguese i'tunuk'en ken-E.