Kabar hal Kebangkitan Yesus ¹ Ta andrau ka isa minggu hio,Maria Magdalena tulak gi ogang Yesus kiat subuh tuu,katika andrau masih mieng,balalu here kakinni watu panutup ogang hio haot ta geser tekei ogang hio. ² Balalu,aye malempat palus nalu Simon Petrus nihi murid sa nasayang Yesus,balalu ngeau nihi here,"here haot ngalap Tuhan tekei ogang,balalu kami bakoi karasa ta awe herengandak E." ³ Balalu,Petrus nihi murid sa lain hio tulak gi ogang. ⁴ kararueh e hayak nempat,tapi murid sa lain hio nempat diwi hinang tekei Petrus balalu aye hampe ba da hulu gi ogang. ⁵ Aye nganining palus nginni gi huang,balalu kakinni kain linen pa mungkus bangkai Yesus baloyok ta aro,tapi aye bakoi suluk gi huang. ⁶ Udi hio,Simon Petrus hawi,nutah aye,balalu suluk gi huang ogang palus nginni kain linen pa mungkus baloyok ta aro. ⁷ Balalu,kain panutup rai sa na huruk ta ulu Yesus bakoi baloyok hayak kain pamungkus huni,tapi haot ta puntal tangar uneng sa lain. ⁸ Udi hio,murid sa lain huni,sa dahulu hampe gi ogang,suluk lei.aye kakinni balalu harap. ⁹ Gene,sa mete kajadian hio,here mete paham Kitab Suci,bahwa Yesus harus buan waleng tekei pampatei. Yesus nyantarang areb E nihi Maria Magdalena ¹⁰ Jari,karueh murid hio mudi gi lewu. ¹¹ Tapi,Maria mindri ta wading ogang balalu nangis.nelang nangis,aye nginni gi huang ogang hio, ¹² Balalu aye kakinni rueh kulun Malaikat ba lama mahilak rahat maharung ta uneng bangkai Yesus na tampakading sa mete e.isa maharung tangar tuhi ulu balalu isa e tangar tuhi pee. ¹³ Kararueh Malaikat hio nane nihi Maria,"Wawei wuah inon kayo nangis?"Maria nuing Malaikat hio,"here haot ngalap bangkai Tuhan kuki balalu kuki bakoi karasa ta awe here ngandak Aye." ¹⁴ Udi ngantuh sameh hio,Maria ngulik gi wading lutuk balalu kakinni Yesus mindri tangar hio,tapi bakoi karasa amun hio lah Yesus. ¹⁵ Yesus nane nihi aye,"wawei,wuah inon kayo nangis?hie lah sa nalupui kayo?"gene nanguh Aye hio sa ngajaga taman,Maria ngeau nihi Aye,"Tuan,amun Tuan haot nampindah E,wara gi kuki ta awe Tuan haot ngandak E,balalu kuki sagar ngalap E." ¹⁶ Yesus ngeau nihi aye,"Maria,"Maria lei bawaleng palus ngeau nihi Aye huang bahasa Ibrani,"Rabuni,"sa arti e "guru." ¹⁷ Yesus ngeau nihi aye,"ada bo kayo negei Kuki gene Kuki mete tulak napot Ambah.tapi,tulak bo gi pulaksanai-pulaksanai Ku palus eau napot here,`Kuki sagar tulak nutah Ambah Ku nihi Ambah nu,napot Allah Ku nihi Allah nu." ¹⁸ Maria Magdalena tulak palus mawara gi murid-murid,"kuki haot kakinni Tuhan," balalu Yesus lah sa haot ngantuh hal-hal iti napot aye."Yesus nyantarang areb E napot murid-murid E ¹⁹ waktu andrau haot kamalem,aye hio andrau ka isa huang minggu hio,balalu wanawang-wanawang uneng here murid bakumpulna tutup gene here takut nihi ulun Yahudi,Yesus hawi balalu mindri tangar penah here nelang ngeau,"damai sejahtra bagi kaon!" ²⁰ Udi ngantuh sameh hio,Yesus nyantarang tangan nihi wawaatei E napot here.here murid sanang tuu katika here kakinni Tuhan. ²¹ Udi hio,Yesus ngeau nihi here lagi,"Damai sejahtra napot kaon.sameh nihi Ambah mangutus Kuki,sameh hio lei wayah iti Kuki mangutus kayo." ²² balalu udi Aye ngantuh sameh hio,Yesus nyiwui here balalu ngeau,"tarime lah Roh Kudus! ²³ Amun kayo ngampuni dosa erang kulun,maka dosa ulun hio na ampuni.Amun naan ulun dosa-dosa e bakoi na ampuni,maka dosa here bakoi naampuni."Yesus nyantarang Areb E napot Tomas ²⁴ Tomas,isa tekei ka dua belas murid,sa na antuh Didimus,bakoi naan hayak here waktu Yesus hawi. ²⁵ Balalu,murid-murid sa lain mawara gi aye,"kami haot kakinni Tuhan."tapi Tomas ngeau nihi here,"kecuali kuki nginni bakas paku tangar tangan E balalu nampasuk kingking kuki gi huang bakas paku hio,balalu nampasuk tangan kuki gi huang wawa atei E,kuki bakoi sagar harap." ²⁶ Walu andrau udi hio,murid-murid waleng bakumpul tangar lewu hio,balalu Tomas naan hayak here.biar bo wawanawang tatutup,Yesus hawi balalu mindri tangar penah-penah here,balalu ngeau,"damai sejahtra gi kayo!" ²⁷ Udi hio,Aye ngeau nihi Tomas,"sansolor bo kingking nu ta iti balalu andak bo tangar wawa atei Ku.ada bakoi harap,tapi harap bo!" ²⁸ Tomas nuing Yesus,"oi,Tuhan ku palus Allah ku!" ²⁹ Yesus ngeau nihi aye,"inon kah kayo wayah iti harap gene kayo haot nginni Kuki?na berkati lah here sa bakoi ngini,tapi harap," Tujuan Yohanes nulis Kitab ina ³⁰ Masih ajoh tanda ajaib lain sa na ulah Yesus tangar hadapan murid-murid E,sa bakoi tatulis huang Kitab iti. ³¹ Tapi,kaluhan iti na tulis mat kayo harap bahwa Yesus aye hio Kristus,Anak Allah,balalu mat nangkah kaharap nu hio,kayo kakiuh welum huang aran E.