¹ Pilatus ngalap Yesus balalu nuyu mat Yesus na ompak. ² Here prajurit mapuru isa mahkota tekei jangkeng-jangkeng barunrui balalu ngopet e tangar ulu Yesus,balalu here makaian Aye nihi jubah ungu. ³ here maju ngariet Yesus nelang ngeau,"Tabe,ui Raja ulun Yahudi!"balalu,here nampar rai E. ⁴ Pilatus balua lagi balalu ngeau nihi here,"inni lah!kuki nunda Yesus balua napot kaon mat kaon karasa bahwa kuki bakoi kahalu kahala inon lei ta Aye," ⁵ Balalu,Yesus balua nelang makai mahkota runrui nihi jubah ungu.Pilatusngeau nihi here,"inni lah Aye!" ⁶ katika imam-imam kepala kakinni Yesus,here kamiak,"salib kan Aye,salib kan Aye!"tapi,Pilatus ngeau nihi here,"tunda bo Aye balalu salib bo kakareb gene kuki bakoi kahalu kasala inon lei tangar Aye." ⁷ Ulun-ulun Yahudi hio nuing Pilatus,"kami naan hukum,balalu manurut hukum hio,Aye harus matei gene Aye nginam tenga E hio Anak Allah." ⁸ Katika Pilatus ngarengei paneran hio,aye magin takut ⁹ balalu suluk waleng gi huang gedung pengadilan,balalu nane nihi Yesus,"tekei awe kah asal Nu?"tapi Yesus bakoi nuing e. ¹⁰ Pilatus ngeau nihi Aye,"Kayo bakoi hakun bapander nihi kuki?inonkah Kayo bakoi karasa kuki naan kuasa mat ngabebaskan Kayo nihi naan kuasa mat nyalibkan Kayo?" ¹¹ Yesus nuing,"kayo bakoi naan kuasa inon lei nihi tenga Kuki,kecuali kuasa hio na ami napot kayo tekei entu.hio lah gene e,ulun sa manyarah Kuki napot kayo labih hante dosa e." ¹² Udi ngarengei hal hio,Pilatus ba usaha ngabebas Yesus,tapi ulun-ulun Yahudi kamiak,"amun kayo ngabebas uln iti,kayo bakoi lah sahabat Kaisar;satiap ulun sa nginam tenga e raja arti e nawan Kaisar." ¹³ katika Pilatus ngarengei paneran hio,aye nunda Yesus balua,balalu maharung tangar kursi pengadlan,tangar isa uneng sa bangaran Litostrotos,tapi huang bahasa Ibrani na antuh Gabata. ¹⁴ Andrau hio aye hio persiapan mat Paskah,wayah hio sekitar jam ka enem.Pilatus ngeau nihi ulun-ulun Yahudi,"iti lah Rajanu!" ¹⁵ Maka,here kamiak,"wunu bo Aye!wunu bo Aye!salib bo Aye!" Pilatus ngeau nihi here,"harus kah kuki nyalib kan Raja nu?"imam-imam kepala nuing,"kami bakoi naan Raja selain Kaisar!" ¹⁶ Pangalis e,Pilatus manyarah Yesus nihi here mat na salibkan. Yesus na salibkan ¹⁷ Yesus balua nihi nunda salib E kakareb napot uneng sa bangaran "uneng tengkorak,"sa huang bahasa Ibrani na antuh Golgota" ¹⁸ Tangar aro here menyalibkan Yesus hayak nihi rueh kulun lain,sa nasalibkan yangar tuhi kawan nihi kawi Yesus,balalu Yesus tangar penah. ¹⁹ Pilatus manulis lei isa tulisan balalu ngandak e tangar entu kayu salib,tulisan hio ba lengan,"YESUS ULUN NAZARET,RAJA ULUN YAHUDI." ²⁰ Ajoh ulun Yahudi mambaca tulisan hio gene uneng Yesus nasalibkan hio naan tangar riet kota,balalu tulisan hio natulis huang bahasa Ibrani,Latin,nihi Yahudi. ²¹ Balalu,imam-imam kepala ulun Yahudi ngeau nihi Pilatus,"ada nulis,`Raja ulun Yahudi,`tapi tulis bo,ulun iti ngeau,`Kuki lah Raja ulun Yahudi." ²² Pilatus nuing,"inon sa haot na tulis kuki,sagar tatap tatulis!" ²³ Here prajurit,katika here haot nyalib Yesus,ngalap pakaian E balalu mambagi e jari epat,isa bagian mat gi masing-masing prajurit,lei jubah E; jubah hio bakoi naan kelim e,ekat na tenun tekei kapit bakoi na jahit. ²⁴ here prajurit hio bapander sameh here,"ada bo takam minsit e,tapi ngumpe undi e mat mamutus e hie sa sagar kiuh e."hal iti jari mat genep lah sa tatulis huang Kitab Suci:"here mambagi-bagi pakaian Ku tangar sameh here balalu mat jubah Ku,here nawut undi."Maz. 22 : 18 Sameh hio lah here prajurit ngulah kaluhan hal hio. ²⁵ ta helang hio,ine Yesus,pulaksanai wawei ine Yesus,Maria harau Klopas,nihi Maria Magdalena,mindri riet salib E. ²⁶ Katika Yesus nginni ine E nihi murid sa na sayang E mindri tangar aro,Aye ngeau nihi ine E,"wawei,inni bo,iti anaknu!" ²⁷ Balalu,Yesus ngeau nihi murid sa nasayang E hio,"iti lah ine nu!"mulai waktu hio,murid hio narime ine Yesus muneng ta lewu e.Kapateian Yesus ²⁸ Udi hio,Yesus,sa karasa bahwa kaluhan e haot ta gawi,mat nampa genep Kitab Suci,Aye ngeau,"Kuki kalalah!" ²⁹ Tangar hio naan isa kusi penu anggur maasem.gene hio,here nyusuk wunge karang sa haot na solop gi huang anggur maasem tangar isa watang hisop balalu nyurung e gi wawa Yesus. ³⁰ Udi nyesep anggur maasem hio,Yesus ngeau,"haot galis jari."udi hio,Aye nyuntup ulu E balalu nyarah nyawa E. ³¹ Gene andrau hio aye lah andrau persiapan,balalu mat bangkai-bangkai hio bakoi tatap muneng ta kayu salib ta andrau Sabat,gene sabat aye hio andrau hante,ulun-ulun Yahudi lako nihi Pilatus mat pee ulun-ulun sa nasalib hio na pepet balalu bangkai-bangkai e na tampinau tekei salib. ³² Balalu, here prajurit hawi palus mepet pee ulun sa pangadahulue balalu sa lain e,sa na salib hayak Yesus. ³³ Tapi,katika here hampe gi Yesus balalu nginni bahwa Aye haot matei,here bakoi nyantepu pee E. ³⁴ Tapi,isa tekei prajurit hio nyusuk doha e gi wawa atei Yesus,balalu waktu hio,ira leleh balua. ³⁵ Ulun sa kakainni peristiwa hio lah sa ngami kesaksian iti,balalu kesaksian e bujur nihi aye karasa amun aye mawara sa bujur e,mat kayo harap lei. ³⁶ Gene,kaluhan iti jari mat genep lah sa haot tatulis huang Kitab Suci: "bakoi isa lei tekei tulang E sa nasantepu." ³⁷ Balalu lei,huang bagian lain Kitab Suci ngeau,"here sagar nginni Aye sa haot na suduk." Yesus na ogang ³⁸ Udi kaluhan hio,Yusuf tekei Arimatea,sa lei murid Yesus tapi nihi masiok-masiok gene takut nihi ulun-ulun Yahudi,lako nihi Pilatus mat aye na huyu ngalap bangkai Yesus;balalu Pilatus ngalewa e.Jari,Yusuf tekei Arimatea hawi balalu ngalap bangkai Yesus. ³⁹ Nikodemus,ulun sa sadi nalu Yesus ta andrau kamalem,hawi lei nihi nundsa campuran ilau mur nihi gaharu,sa weat e sekitar dime pulu kati. ⁴⁰ Blalau,here ngalap bangkai Yesus palus mungkus e nihi kain linen sa na ami rarampah,sameh adat penguburan ulun Yahudi. ⁴¹ Tangar riet uneng Yesus na salib kan,naan isa taman balalu ta huang taman hio naan isa kuburan sa bio sa bakoi isa lei bangkai piji na andak ta aro. ⁴² Gene andrau hio aye lah andrau persiapan mat gi ulun Yahudi,balalu uneng ogang hio bakoi lawit,here ngandak bangkai Yesus ta aro.