¹ Tapi, Yesus ampus ka Bukin Zaitun. ² Alap-alap banar, Ia atak agik ka Bait Allah wan samua orak atak ka Ia. Ia duduk wan ngajar mpu'ya. ³ Lalu, ahli-ahli Taurat wan orak-orak Farisi maba seorak mbini nang li'namu babuat Zina, satalah na nantu mbini na dadek ka tangah-tangah, ⁴ Mpu'ya bakata ka Yesus,"Guru, mbini na kana tangkap basah pas ia gik bezinah. ⁵ Hukum Taurat Musa merintah wa'kitu ntuk nabak mbini na wan batu. Apeh pendapat kau tentang hal ntu?" ⁶ Mpu'ya madah macam na ntuk ncoba Yesus supaya mpu'ya punya dasar ntuk nyalahkan Ia. Tapi, Yesus nunduk wan jari-Ia, Ia nulis ka tanah. ⁷ Ka'ena mpu'ya tarus-manarus nanya Ia, Yesus dadek wan bakata ka mpu'ya,"Orak nang angin badosa ka ntara orak sana haruslah ia njadi nang petama nabak mbini ntu ngan batu." ⁸ Lalu, Yesus nunduk agik wan nulis ka tanah. ⁹ Pas mpu'ya nangar hal na, mpu'ya mulai ampus sote per sote, mulai dari nang labih tua, wan Yesus li'napuk seorak diri, ngan mbini tadi nang masih badiri ka tangah-tangah. ¹⁰ Lalu, Yesus dadek wan bakata ka mbini na,"Hei mbini, ka mane mpuya? Angin adakah orak nang ngukum kau?" ¹¹ Njawab mbini na, "Angin ada,"Aku pun angin bisa ngukum kau. Ampuslah, wan mulai ntu usah babuat dosa agik." ¹² Udah na, Yesusb bakata ka orak manyak na, kata-Ya, "Akulah tarang dunia. Satiap orak nang ngikut Aku angin bisa bajalat dalap galap, tapi bisa punya tarang idup." ¹³ Udah na, orak-orak Farisi bakata ka Yesus,"Kau basaksi tentang diri-Kau sorak, maka kesaksian-Kau angin banar." ¹⁴ Yesus njawab mpu'ya, kata-Ya,"Sakalipun Aku basaksi tentang diri-Ku adalah banar ka'ena Aku tau dari mane Aku atak wan ka mane Aku ampus, tapi kau angin tau dari mane Aku atak wan ka mane Aku ampus. ¹⁵ Kau ngakim nurut cara kedagingan, sedangkan Aku angin ngakim sapeh pun. ¹⁶ Tapi, seandai ya pun Aku ngakim, pengakiman-Ku na banar ka'ena Aku angin ngakim seorak diri, melainkan basama Bapa nang ngutus Aku. ¹⁷ Bahkan, dalap Kitab Taurat kau tatulis kalo kesaksian dua orak adalah banar. ¹⁸ Aku basaksi tentang Diri-Ku sorak wan Bapa nang ngutus Aku basaksi tentang Aku." ¹⁹ Maka, mpu'ya batanya ka Ia, " Ka mane Bapa-Kau?" Yesus njawab, "Kau angin nganal Aku maupun Bapa-ku, kalo kau nganal Aku, kau ugak bisa nganal Bapa-Ku." ²⁰ Pekata ntu Yesus madah ka samak bendahara wa'tu Ia ngajar ka Bait Allah, tapi angin ada seorak pun nang nangkap Ia ka'ena wa-tu-Ya gik angin atak. ²¹ Lalu, Yesus bakata agik ka mpu'ya,"Aku nak napuk kau wan kau bisa ngago Aku, tapi kau bisa mati dalap dosa kau. Ka mane Aku nak ampus, Kau angin bisa atak." ²² Udah na, orak-orak Yahudi na bakata,"Apehkah Ia mao munuh diri ka'ena Ia bakata,'Ka mane Aku nak ampus, kau angin bisa atak'?" ²³ Tapi, Yesus bakata ka mpu'ya,"Kau barasal dari bawah, tapi Aku barasal dari atas. Kau barasal dari dunia ntu, tapi Aku ukat dari dunia ntu. ²⁴ Oleh ka'ena na, Aku madah ka kau kalo kau nak mati dalap dosa kau ka'ena kalo kau angin pecaya ka Aku, kau bisa mati dalap doas-dosa kau." ²⁵ Lalu, mpu'ya batanya ka Ia,"Sapehkah Kau?" Yesus njawab mpu'ya," Aku udah madah ka kau dari awal. ²⁶ Ada manyak hal tentang kau nang arus Aku madah wan ngakimi, tapi Ia nang ngutus Aku adalah banar wan apeh nang Aku nangar dari Ia, nalah nang Ku madah ka dunia." ²⁷ Mpu'ya angin ngerati kalo Yesus gik ngomong ka mpu'ya tentang Bapa. ²⁸ Oleh sabab na, Yesus bakata," Pas kau udah ninggikan Anak Kaleno, saat ntu lah kau bisa tau kalo Aku adalah Ia, wan kalo angin ada suatu pun nang Aku muat dari diri-Ku sorak, melainkan Aku madah apeh nang li'ajarkan Bapa ka Aku. ²⁹ Ia nang ngutus Aku ada basama-sama ngan Aku, Ia angin napuk Aku sorak ka'ena Aku slalu muat hal-hal nang bekanan ka Ia." ³⁰ Samantara Yesus madah ka samua ya na, manyak orak pecaya ka Ia. ³¹ Udah na, Yesus bakata ka orak-orak Yahudi nang pecaya ka Ia," Kalo kau tatap dalap firman-Ku, kau banar-banar murid-Ku, ³² wan kau bisa tau kebenaran, wan kebenaran na bisa mbebaskan kau." ³³ Mpu'ya njawab,"Wa'kitu adalah keturunan Abraham wan angin parnah njadi hamba siapeh pun. Jadi, ngapeh Kau bakata' Kau bisa bebas"' ³⁴ Yesus njawab mpu'ya,"Sabanar ya, Aku bakata ka kau, satiap orak nang babuat dosa adalah hamba dosa. ³⁵ Seorak hamba angin diap dalap sabuah keluarga ntuk slama ya, tapi seorak anak diap ntuk salama ya. ³⁶ Jadi, apehbila Anak bebaskan kau, kau banar-banar bebas. ³⁷ Aku tau kalo kau adalah keturunan Abraham, tapi kau angin munuh Aku ka'ena ajaran-Ku angin namu tawak ka dalap kau. ³⁸ Aku madah tentang hal-hal nang udah Aku nele basama Bapa-Ku, udah na ugak kau muat hal-hal nang kau nangar dari bapa kau." ³⁹ Mpu'ya njawab wan bakata ka Ia, "Abraham adalah bapa wa'kitu seharus ya muat apeh nang Abraham muat. ⁴⁰ Tapi, kau barusaha munuh Aku, orak nang mere tau kau kebenaran, nang Aku nangar dari Allah. Abraham angin muat hal na. ⁴¹ Jadi, kau hanya muat apeh nang li'muatkan bapa kau sorak." Mpu'ya bakata ka Ia, "Wa'kitu angin li'lahirkan dari hasel perzinahan. Wa'kitu punya sote Bapa, ya na Allah." ⁴² Yesus bakata ka mpu'ya,"Kalo Allah adalah Bapa kau, kau bisa mengasihi Aku ka'ena Aku atak wan barasal dari Allah. Wan, Aku atak ukat atas kemao Aku sorak, melainkan Ia nang ngutus Aku. ⁴³ Apeh saba ya kau angin ngerati apeh nang Aku madah? ka'ena kau angin bisa nangar firman-Ku. ⁴⁴ Kau barasal dari bapa kau, ya na setan wan kau mao muat keinginan-keinginan bapa kau. Ia adalah pembunuh dari awal ya wan angin bepegak ka kebenaran ka'ena angin ada kebenaran la dalap diri ya. Kalo ia madah kebohongan, ia madah dari karakter ya sorak ka'ena ia adalah pemboong wan bapa keboongan. ⁴⁵ Tapi, kia'ena Aku madah kebenaran ka kau, kau angin pecaya ka Aku. ⁴⁶ Sapehkah ka ntara kau nang bisa madah kalo Aku badosa? Kalo Aku madah bebenaran, ngapeh kau angin pecaya ka-Aku? ⁴⁷ Sapeh pun nang barasal dari Allah, ia nangar firman Allah; na lah sabab ya kau angin nangar ka'ena kau angin barasal dari Allah." ⁴⁸ Orak-orak Yahudi njawab Yesus wan bakata ka Ia,"Banar ukat kalo wa'kitu madah kalo Kau adalah orak Samaria wan Kau kerasukan roh ja'at?" ⁴⁹ Yesus njawab, "Aku angin kerasukan roh ja'at, tapi Aku hormat Bapa-Ku, tapi kau angin hormat Aku. ⁵⁰ Tapi, Aku angin ngago kemuliaan bagi diri-Ku sorak; ada sote nang ngago ya wan nang ngakim. ⁵¹ Ngan sabanar ya, Aku bakata ka kau, satiap orak nang nurut firman-Ku, ia angin bisa nele kematian. ⁵² Orak-orak Yahudi na bakata ka Yesus, Ntu wa'kitu tau kalo Kau memang kerasukan roh ja'at! Sabab, Abraham wan kobo nabi pun udah mati. Tapi, Kau bakata,'Satiap orak nang nurut firman-Ku, ia angin bisa merasa mati.' ⁵³ Apehkah Kau labih aya dari pada Abraham, bapa kami, nang udah mati? kobo nabi ugak udah mati; ngan sapehkah Kau nak samakan diri-Kau?" ⁵⁴ Yesus njawab,"Kalo Aku memuliakan diri-Ku sorak, kemulian-Ku Na angin ada arti ya; Bapa-Kulah nang memuliakan Aku, nang tentang-Ya kau bakata,'Ia adalah Allah wa'kitu." ⁵⁵ Tapi, kau angin nganal Ia, tapi Aku nganal Ia;kalo Aku madah kalo Aku angin nganal Ia, Aku bisa macam njadi pemboong, sama macam kau, tapi Aku nganal Ia wan Aku nurut firman-Ya. ⁵⁶ Bapa kau, Abraham, besukacita ka'ena ari-Ku. Ia udah nele ya wan besukacita." ⁵⁷ Lalu, orak-orak Yahudi na bakata ka Ia,"Umur-Kau na gik angin genap 50 taut, tapi kau udah nele Abraham?" ⁵⁸ Yesus bakata ka mpu'ya,"Sabanar ya Aku madah ka kau, sabalom Abraham ada, Aku udah ada." ⁵⁹ Ka'ena na, mpu'ya nangkap batu ntuk nabak Ia, tapi Yesus mbunyi diri Ya wan napuk Bait Allah.