¹ Pas Tuhan taub kalo orak-orak Farisi udah nangar bahwa Ia berasel wan mbaptis labih manyak murid dari pada Yohanes, ² (biar pun Yesus sorak angin mbaptis, tapi murid-murid-Ya), ³ Ia napuk Yudea wan atak agi ka Galilea. ⁴ Tapi, Ia arus lewat wilayah Sa,aria. ⁵ Sampelah Yesus ka Samaria, ka sabuah kota nang banama Sikhar, nang tampat ya samak tanah nang dulu li'mere Yakub ka anak'ya Yusuf. ⁶ Sumur Yakub ada ka ngaan. Udah na, Yesus nang udah ka'eana pejalat, duduk ka penger sumur na. wa'tu na, kira-kira ja keenam. ⁷ Ataklah seorak mbini Samaria ntuk nimba ae. Yesus bekata ka ia, "Merelah Aku ae coco'k." ⁸ (sabab, murid-murid-Ya udah ampus ka kota ntuk mali pemapak). ⁹ Mbini Samaria na bekata ka Yesus,"Macammane mungkin Kau, orak Yahudi, minta ae coco'k ka aku nang adalah mbini Samaria?" (Sabab, orak Yahudi angin betagor ngan orak Samaria). ¹⁰ Yesus njawab wan bekata ka ia,"Kalo kau tau tentang karunia Allah wan tau sapeh nang bekata ka kau.'Berelah Aku ae coco'k', kau pasti mao minta ka Ia, wan Ia pun mao mere ae idup." ¹¹ Mbini na bekata ka Ia,"Tuan, Kau angin punya timba wan sumur ntu kuat dalap, dari mane Kau bisa namu ae idup na? ¹² Apehkan Kau labih aya daripada ntua bare wa'kitu, Yakub, nang mere sumur na ka wa'kitu wan nang udah nyoco'k sorak dari sumur na wan samua anak wan peridum ya?" ¹³ Yesus njawab wan bekata ka ia, "Satiap orak orak nang nyoco'k dari ae ntu bisa haus agi, ¹⁴ tapi orak nang nyoco'k dari ae nang ku mere ka ia angin bisa parnah haus agi; kecuali ae nang kumere ka ia na bisa njadi mata ae ka dalap diri ya nang bisa tarus mancar ka idup nang kekal." ¹⁵ Mbini bekata ka Yesus, "Tuan, merelah aku ae na supaya aku angin haus agi aku angin parlu atak agi ka kitu ntuk nimba ae." ¹⁶ Yesus bekata ka ia,"Ampuslah, saru laki kau wan atak ka kia." ¹⁷ Mbini na njawab,"Aku angin si laki."Kata Yesus ka ia, "Kau banar saat bekata,'Aku angin si laki'. ¹⁸ Ka'ena kau udah parnah punya lima laki, wan ngelaki-laki nang diap ngan kau ntu ukatlah laku kau. Dalap hal ntu, kau bekata banar." ¹⁹ Kata mbini na ka Ia,"Tuan, ntu aku tau kalo Kau adalah seorak Nabi. ²⁰ Ntua bare wa'kitu nyembah ka gonong ntu, tapi bangsa Kau madah Yerusalem tampat orak arus nyembah." ²¹ Yesus bekata ka ia,"Pecayalah ka Aku, hei mbini! Ada tiba saat ya pas ukat ka gonong ntu ato pun ka Yerusalem orak nyembah Bapa. ²² Kau nyembah nang angin kau kenal, tapi wa'kitu nyembah nang wa'kitu kenal ka'ena keselamatan atak dari bangsa Yahudi. ²³ Tapi, ada saat ya, ya na ntu nyan, penyembah-penyembah banar nak nyembah Bapa dalap roh wan kebenaran; sabab Bapa nuntut nang macam na ntuk nyembah Ia. ²⁴ Allah adalah Roh wam mpu'ya nang nyembah Ia arus nyembah-Ya dalap roh wan kebenaran." ²⁵ Mbini na bekata ka Ia,"Aku tau kalo Mesias nak atak (Ia nang li'sabut Kristus). Pas Ia atak, Ia nak mere tau sagala suatu ka wa'kitu." ²⁶ Yesus njawab ka ia,"Aku, nang gik ngomong ka kau adalah Ia." ²⁷ Wa'tu na, ataklah murid-murid-Ya wan mpu'ya heran nele Yesus gik bebincang ngan seorak mbini. Tapi, angin seorak pun nang betanya ka Ia, "Apeh nang Kau ngago?"atau"Ngapeh kau bebincang ngan ia?" ²⁸ Udah na, mbini na napuk kendi ae ya wan ampus ka kota lalu bekata ka orak-orak ka sana, ²⁹ "Ayok, telelah ada seorak nang madah ka aku sagala suatu nang udah ia muat. Mungkin kah Ia na Mesias?" ³⁰ Mpu'ya pun ampus ka luar kota wan namu Yesus. ³¹ Udah wa'tu na, murid-murid-Ya ndesak Yesus ngan bekata, "Rabi, makatlah." ³² Tapi, Yesus bekata ka mpu'ya,"Aku ada pemapak nang angin kau kanal." ³³ Lalu, murid-murud betanya satu ka nang lain ya, "Apehkah angin ada orak nang maba suatu ka Ia ntuk li'mapak?" ³⁴ Yesus bekata, "Pemapak-Ku adalah muat apeh nang njadi kehendak Ia nang ngutus Aku wan nyelesai pegawe-Ya. ³⁵ Ukatkah kau bekata,'Empat bulat agi musim panen atak'? Telelah, Aku bekata ka kau, ukatkah mata kau wan telelah uma-uma udah nguning ntuk li'manyi. ³⁶ Saat ntu, ia nang nanam udah narima upah ya wan ngumpul buah ntuk idup kekal sampe nanam wan nabur namu sukacita basama-sama. ³⁷ Dalap hal ntu pekata ntu banar,'Nang seorak penabur nang lain manen.' ³⁸ Aku ngutus kau ntuk manen suatu nang angin kau gawe; orak lain udah ngawe'ya wan kau udah tama ka dalap pegawe mpu'ya." ³⁹ Manyak orak Samaria dari kota na njadi pecaya ka Yesus ka'ena pekata mbini na, nang mere kesaksian,"Ia mere tau aku samua hal nang udah ku gawe." ⁴⁰ Jadi, pas orak-orak Samaria na sampe ka Yesus, mpu'ya minta-Ya ntuk diap basama mpu'ya wan Yesus diap ka sana salama dua ari. ⁴¹ Lalu, ada labih manyak orak agi nang pecaya ka'eana pekata Yesus sorak. ⁴² Mpu'ya bekata ka mbini na,"Ukat agi ka'ena pekata kau wa'kitu njadi pecaya, melainkan wa'kitu sorak udah nangar, wa'kitu tau kalo Ia ntu banar-banar Juru Selamat dunia." ⁴³ Satalah 2 ari, Yesus napuk tampat na wan nuju Galilea. ⁴⁴ (Sabalum ya, Yesus udah mere kesaksian kalo seorak nabi angin li'hormat ka negeri ya sorak.) ⁴⁵ Pas Yesus atak ka Galilea, orak-orak Galilea nyambut-Ya ka'ena mpu'ya udah nele sagala suatu nang Yesus muat dalap perayaan Paskah ka Yerusalem ka'ena mpu'ya uga ampus ka perayaan na. ⁴⁶ Ka'ena na, Yesus atak agi ka Kana, Galilea, tampat Ia parnah muat ae njadi ae anggor. Ka Kapernaum ada seorak pegawai istana nang anak ngelaki ya gik sakit. ⁴⁷ Pas pegawai istana na nangar kalo Yesus udah atak dari Yudea ka Galilea, ia ampus namu wan mohon ka Yesus supaya atak wan nyambuh anak ya ka'ena anak ya udah ampir mati. ⁴⁸ Lalu, Yesus bekata ka ia,"Kalo kau angin nele tande-tande wan hal-hal ajaib, kau angin mao pecaya." ⁴⁹ Pegawai istana na bekata,"Tuan, ataklah sabalum anakku mati." ⁵⁰ Yesus bekata ka ia, "Pulaklah, anak kau udah idup!" Orak na pecaya ka pekata nang li'madah Yesus ka ia lalu ampuslah orak na. ⁵¹ Pas pegawai istana na masih dalap pejalat, anak buah ya betamu ngan ya wan mere tau kalo anak ngelaki ya na idup. ⁵² Pegawai istana na betanya ka mpu'ya tentang jam berapeh kondisi anak ya na mulai baik. Lalu, mpu'ya njawab,"Bari kira-kira jam ketujuh tabit ya ilang." ⁵³ Ama anak na tau pas wa'tu na Yesus bekata ka ia,"Anak kau idup." jadi, pegawai istana na wan saluruh keluarga ya njuadi pecaya ka Yesus. ⁵⁴ Na'lah tande ajaib kedua nang li'muat Yesus satalah pulak dari Yudea ka Galilea.