¹ Wa'tu ari minggu petama na, Maria Magdalena ampus ka kubur Yesus ala-alap ari banar, wa'tu ari gik masih patak meyagam, lalu ia nele batu nang ntuk nutup kubur na udah tegeser dari kubur na. ² Maka ya, ia kelama ia pun ampus batamu ka Simon Petrus wan murid nang lain ya nang li kasihi Yesus, wan bakata ka mpu'ya, "Mpu'ya udah nangkam Tuhan dari kubur, lalu wa'kitu angin nao ka mane mpu'ya na naroh Ia." ³ Maka ya, Petrus wan murid nang lain ya ampus ka kubur na. ⁴ Kedua ya kelama sama-sama, tapi murid nang lain na kelama labih capan dari Petrus sampe dulu atak ka kubur na. ⁵ Ia mangap nele ka dalap, nele kaik linen ntuk mbungkus bangke Yesus ada ka sana, tapi ia angin tama ka dalap. ⁶ Udah na, Simon Petrus atak, nyusul ia, lalu tama ka kubur na ia nele kaik linen ntuk mbungkus ada ka sana. ⁷ Lalu, kaik ntuk nutup mua nang ntuk muntal ulu Yesus na angin agik ka sana wan kaik linen na nang tebungkus tadi, tapi udah tegolok ka tampat nang lain. ⁸ Udah na, murid nang lain tadi, nang labih dulu sampe ka kubur, ugak tama, Ia nele lalu pecaya. ⁹ Sabab, sabolom wa'tu na tejadi, mpu'ya angin ngerati Kitab Suci, kalo Yesus arus bangkit agik dari kematian. ¹⁰ Jadi, kedua murid na pulak ka rumah. ¹¹ Tapi, Maria dadek ka luar kubur wan nangis. Sambel nangis, ia diap ka dalap kubur na, ¹² lalu ia nele dua malekat nang benaju putih agik duduk ka tampat bangke Yesus nang li naroh sabalom ya. Nang seko duduk ka ulu lalu nang seko duduk ka samak batis Ya. ¹³ Kedua malekat na batanya ka Maria, "Mbini na, ngapeh kau nangis?" Maria njawab malekat na, " Mpu'ya udah nangkam bangke Tuhan ku aku angin nao ka mane mpu'ya naroh Ya." ¹⁴ Udah madah bagena, Maria ngolek ka tombok lalu nele Yesus dadek ka sana, tapi angin nao kalo na Yesus. ¹⁵ Yesus batanya ka ia, "Mbini na, ngapeh kau nangis? Sapehkah nang kau ngago?" Ka'ena ngira Ia na tukang njaga taman, Maria bakata ka Ia,'Tuan, kalo Tuan udah mindah kan Ya, bere tau lah ka aku ka mane Tuan udah naroh-Ya, aku pasti nagkam-Ya." ¹⁶ Yesus bakata ka ia, "Maria."Maria pun lalu ngolek wan bakata ka-Ia dalap bahasa Ibrani,"Rabuni", nang arti ya"Guru". ¹⁷ Yesus njawab ka ia, "Usahlah kau nak megak Aku ka'ena Aku gik angin ampus ka Bapa. Tapi, ampuslah ka sabanyadi-sabanyadi-Ku lalu padah ka mpu'ya,'Aku nak ampus ka Bapa-Ku wan Bapa-Kau, ka Allah-Ku wan Allah kau ugak."' ¹⁸ Maria Magdalena ampus mere tau ka murid-murid,"Aku udah nele Tuhan," wan maba Yesus lah nang udah madah hal-hal na ka ia. ¹⁹ Pas wa'tu ari na udah malam, ya na ari petama dalap minggu na, lalu pintu-pintu tampat kobo murid ntuk ngumpul na tetutup ka'ena mpu'ya gali ka orak-orak Yahudi, Yesus atak lalu dadek ka tangah-tangah mpu'ya sarta bakata,"Damai sejahtera bagi kau!" ²⁰ Udah madah na, Yesus nonjok langan wan lambong Ya ka yuk mpu'ya. Kobo murid sangat sukacita pas mpu'ya nele Tuhan. ²¹ Udah na, Yesus bakata ka mpu'ya agik, "Damai sejahtera ntuk kau. Sama bage Bapa udah ngutus Aku, bagena ugak ntu Aku ngutus kau." ²² Satalah Ia madah bagena, Yesus ngabos ka mpu'ya wan bakata,"Tarimalah Roh Kudus! ²³ Kalo kau mao ngampun dosa orak, maka doa orak na liampuni. Kalo ada orak nang dosa-dosa ya angin kau ampuni, maka dosa mpu'ya angin liampuni." ²⁴ Tomas, salah seorak dari ke-12 murid, nang lisabun Didimus, angin ada sama-sama yuk mpu'ya pas Yesus atak. ²⁵ Maka ya, murid-murid nang lain mere tau ia,"Wa'kitu udah nele Tuhan." Tapi, Tomas bakata ka mpu'ya,"Kecuali aku nele bakas paku ka langan-Ya wan nama kokon ku ka dalap bakas paku na, sarta nama langanku kadalap lambong-Ya, aku angin nak pecaya." ²⁶ Delapan ari udah na, murid-murid atak agik ngumpul ka rumah na, wan Tomas ada yuk mpu'ya ugak. Walo pun pintu-pintu na tetutup, Yesus atak wan dadek ka tangah-tangah mpu'ya, sarta bakata,"Damai sejahtera ntuk kau!" ²⁷ Udah na, Ia bakata ka Tomas, wan nele langan-Ku; lalu ngolor langan kau ka kia wan naroh ka lambong-Ku. Usah angin pecaya, tapi pecaya lah!" ²⁸ Tomas njawab Yesus,"Ya, Tuhanku wan Allahku!" ²⁹ Yesus bakata ka ia, "Apehkah kau ntu pecaya ka'ena kau udah nele Aku? Liberkatilah mpu'ya nang angin nele, tapi pecaya." ³⁰ Masih banyak tande ajaib nang lain nang udah li gawe Yesus ka dapan murid-murid-Ya, nang angin tetulis ka dalap kitab ntu. ³¹ Tapi, samua nang li nulis ntu supaya kau pecaya kalo Yesus na Kristus, Anak Allah, wan supaya lewat kau pecaya na, kau punya idup ka dalap Ia.