¹ Nang li maksud, salama ahli waris na masih muda-muda, ia angin ada beda ya ngan anak buah walo pun ia na punya sagala ya. ² Ia ada ka babah kuasa pengawas wan pengurus rumah tanga sampe wa'tu nang udah litatapkan oleh ama ya. ³ Bagena ugak orak kitu, pas masih muda-muda, orak kitu li jadi anak buah oleh roh-roh dunia ntu. ⁴ Tapi, pas ari pengenapan atak, Allah ngutus Anak-Ya, nang laher dari seorak mbini wan laher ka babah Ukum Taurat, ⁵ ntuk nabus mpuya nang ada ka babah Ukum Taurat biar orak kitu bisa narima pengankan sebage anak-anak-Ya. ⁶ Kaena kau na anak-anak-Ya, Allah udah ngutus Roh Anak-Ya ka dalap ati orak kitu, nang nyaru,"Abba, Bapa." ⁷ Jadi, kau ukat agik anak buah, tapi anak. Kalo kau na anak, Allah njadikan kau ahli waris lewat Kristus. ⁸ Dulu, pas kau angin nganal Allah, kau na anak buah dari hal-hal nang ka dasar ya ukat Allah. ⁹ Tapi, ntu, satalah kau nganal Allah ato labih tapat ya likanal oleh Allah, bagemane mungkin kau babalek agik ka Roh-roh dunia nang lamah wan angin baguna? Apehkah kau angin li njadi anak buah agik? ¹⁰ Kau njalankan ngeraya atas ari-ari, bulat-bulat, musim-musim, wan taut-taut! ¹¹ Aku gali jangan-jangan jareh payah ku nang udah kumuat ntuk kau njadi sia-sia. ¹² Aku mohon ka kau, Sabanyadi-sabanyadi, jadilah bage aku kaena aku ugak udah njadi bage kau. Kau angin basalah ka aku. ¹³ Kau nao, ka awal ya aku mere tau Injil ka kau kaena sakin tubuh nang ku ngerasa ntu. ¹⁴ Walopun kondisi tubuhku bage ujian ntuk kau, kau angin ngina ato nolak aku. Sabalek ya, kau nyamun aku seolah-olah aku ntu malekat Allah, bage macam aku ntu Yesus Kristus na sorak! ¹⁵ Bagemane ngan barkat nang kau rasa na? Sabab, aku bisa basaksi tantang kau ndulu, kalo mungkin, nyongkel bugi mata kau wan mere ya ka ku pun kau mao. ¹⁶ Apehkah ntu aku njadi musuh kau kaena nunjuk kabanar ka kau? ¹⁷ Orak-orak na berusaha namu kau, tapi ukan ngan maksud nang baik. Mpuya angin ngasingkan kau ngan harap kau nak ngago mpuya. ¹⁸ Mamang naik kalo sering semangat muat hal-hal nang tujuan baik, wan ukat hanya pas aku wan kau. ¹⁹ Muda-mudaku, demi kau, aku mao banar agik nangong sakin melaherkan sampe Kristus linyatakan dalap kau. ²⁰ Aku baharap, aku bisa basama kau ntu wan ngubah nada suaraku kaena aku habis akal ngadap kau. ²¹ Padah ka aku, hay kau nang mao idup ka babah Ukum Taurat, apehkah kau angin nagar Ukum Taurat? ²² Kaena ada tetulis, Abraham ada dua anak ngelaki; seko laher dari seorak anak buah mbini. ²³ Tapi, muda dari anak mbini na lilaher nurut daging, sadangkan muda nang dari mbini merdeka lilaherkan lewat perjanjian. ²⁴ Telelah kisah ntu sebage lambang kaena dua mbini na melambagkan dua perjanjian. Seko na perjanjian dari gonong Sinai wan melaher muda-muda anak buah. Ia na Hagar. ²⁵ Ntu, Hagar melambangkan Gonong Sinai ka tanah Arab, sama bage Yerusalem saat ntu kaena ia idup dalap anak buah basama muda-muda ya. ²⁶ Tapi, Yerusalem nang ka atas na mbini nang merdeka, wan ia na indo orak kitu. ²⁷ Kaena ada tetulis, "Besukacitalah, hay mbini nang mandol, nang angin melaher. Ngampak wan rami-ramilah, hey kau nang angin ngerasa sakin melaher. Sabab, labih banyak muda dari mbini nang sorak dari pada mbini nang ada laki." ²⁸ Sabanyadi-sabanyadi, kau na muda-muda perjanjian bage Ishak. ²⁹ Pas wa'tu na, muda nang laher nurut daging nganiaya muda nang laher nurut Roh, bage nang njadi ntu nyan. ³⁰ Tapi, apeh nang Kitab Suci madah? "Userlah anak buah mbini na yuk anak ua kaena anak buah mbini na angin nak njadi ahli wares basama ngan muda mbini merdeka. " ³¹ Kaena na, Sabanyadi-sabanyadi, orak kitu ukatlah muda-muda dari anak buah mbini na, tapi dari mbini merdeka.