¹ Tuan-tuan, pelakukanlah budak-budak ka'u ngan banar wan adel kaena ka'u nao kalo ka'u uga mpunyai tuan ka surga. Tekunlah dalap doa, ngan bejaga-jaga wan ngucap syukur. ³ Bedoalah uga ntuk wakitu supaya Allah muka pintu ntuk firman sehingga wakitu boleh nyampaikan rahasia Kristus, nang kaena'ya aku li menjara. ⁴ Bedoalah supaya aku bisa nyampaikan ngan jelas sebagaimane seharus'ya aku bekata-kata. ⁵ Besikaplah bijaksana tehadap orak-orak luar ngan ngunakan kesempatan sebaik-baik'ya. ⁶ Ka'atilah kata-kata ka'u selalu panuh kasih,li mbumbu ngan garap, supaya ka'u nao macam mane seharus'ya nyaut setiap orak. ⁷ Tikhikus nak nceritakan semua kabar tentang aku. Ia adalah kamanyawa seiman diri nang tekasih, pelayan nang setia, wan page sepegawe dalap Tuhan. ⁸ Aku ngutus'ya ka ka'u ngan tujuan supaya ka'u nao keadaan wa'kitu wan supaya ia bisa nguatkan ati ka'u. ⁹ Ia nak atak ngan Onesimus, kamanyawa seiman diri nang setia wan tekasih, seorak dari ntara ka'u. Mpuya nak mere tau ka ka'u segala sesuatu nang tejadi ka kia. ¹⁰ Pageku sote penjara, Aristarkhus, ngirim salam ntuk ka'u, mage na uga Markus, penganak Barnabas, nang tentang ia ka'u udah nerima petunjuk; sambutlah ia wa'tu ia atak ka ka'u. ¹¹ Uga salam dari yesus, nang li manggel Yustus. Ka ntara page sepelayanan ku ntuk kerajaan Allah, hanya mpuya ntulah nang berasal dari kalangan orak besunat, wan mpuya udah njadi pengibur ntuk aku. ¹² Epafras, kamanyawa seiman ka'u, hamba Kristus Yesus, uga ngirim salam ntuk ka'u. Ia malar begumul dalap doa ntuk ka'u supaya ka'u bisa bediri teguh wan bekeyakinan panuh dalap segala kehendak Allah. ¹³ Aku bisa nyolo kesaksian mage mane ia udah banyak nderita ntuk ka'u wan ntuk mpuya nang ada ka Laodikia wan Hierapolis. ¹⁴ Lukas, dokter nang tekasih, wan Demas ngirim salam ntuk ka'u. ¹⁵ Sampekan salamku ka kobo page nang seiman ka Laodikia, wan ka Nimfa wan jemaat nang ada ka rumah'ya. ¹⁶ Satelah surat ntu li mbaca ka ka'u, bacakan uga ka jemaat Laodikia. Sebalik'ya, bacalah uga surat ntuk jemaat Laodikia. ¹⁷ Padahlah ka Arkhipus, "Peratikanlah supaya ka'u nyelesaikan tugas pelayanan nang udah ka'u nerima dari Tuhan." ¹⁸ Aku, Paulus, nulis salam ntu ngan langanku sorak. Ingatlah belengguku, Anugrah Allah nyertai ka'u.