¹ Sebab, aku mao ka'u nao mbada barat'ya pejuangan nang udah aku muat ntuk ka'u, wan ntuk mpuya nang ada ka Laodikia, wan ntuk samua orak nang ngin kala betamu mua ngan ku. ² Tujuanku adalah biar ati mpuya terhibur wan li nyatu dalap kasih sehingga mpuya ada segala kekayaan nang berasal dari jaminan akan pengertian wan pengetahuan dari rahasia Allah, ya'na Kristus sorak. ³ Dalap Ia, tesemunyi segala harta dari hikmat wan pengetahuan. ⁴ Aku madah hal ntu supaya ngin ada orak nang mao nipu ka'u ngan pedebatan nang kedagarannya masok akal. Sabab, meskipun tubuh jasmaniku ngin ada besama ka'u, tapi aku besama ka'u dalap roh, wan aku besukacita nele kedisplinan ka'u nang baik wan keteguhan iman ka'u dalap Kristus. ⁶ Jadi, kaena ka'u udah nerima Yesus Kristus njadi Tuhan, iduplah melulu dalap Ia, ⁷ berakar wan bentuklah diri ka'u dalap Ia, teguhkanlah iman ka'u sebagaimane udah li ngajar ka ka'u, wan belimpahlah ngan ucapan syukur. ⁸ Beati-atilah biar ngin ada siko orak pun nang njerat ka'u ngan filsafat nang kosong wan nyesatkan, nang berasal dari tradisi kaleno wan asas-asas roh dunia, wan ukat prinsip-prinsip Kristus. ⁹ Sabab, dalap Ia diap samua kepenuhan keilahian nang idup dalap bentuk jasmani. ¹⁰ ka'u udah njadi panuh dalap Ia, nang adalah ulu dari samua pemerintah wan penguasa. ¹¹ Dalap Ia, Ka'u uga li nyunat, ukat ngan sunat nang li muat leh langan kaleno, tapi ngan sunat nang li muat leh Kristus, ya'na ngan natak tubuh kedagingan nang bedosa. ¹² Dalap baptisan, ka'u li ngubur besama ngan Kristus, wan uga li mbangkit besama-sama ngan Ia lewat iman ka'u dalap kuasa Allah nang mbangkitkan ia dari ntara orak mati. ¹³ Kalopun ndulu ka'u mati dalap pelanggaran-pelanggaran ka'u wan dalap kedagingan ka'u nang ngin besunat, Allah muat ka'u idup besama-sama ngan Ia satelah ia ngampuni samua pelanggaran diri. ¹⁴ Ia udah mbatalkan surat utak wan aturan-aturan tuntutan'ya nang ngalangi hubungan ntara Allah wan diri. Ia udah nangkap'ya ngan maku'ya ka atas kayu salib. ¹⁵ Ia ngelanyak kobo pemerintah wan penguasa, lalu njadikan mpuya tontonan nang memalukan leh kaena kemenangan Ia ka atas kayu salib. ¹⁶ kaena na, usah mbiar siko orak pun ngakimi ka'u ngan masalah pemajuh wan ae coco' ato ari raya keagamaan, perayaan bulat baru ato ari Sabat. ¹⁷ Samua'ya na hanyalah bayangan tentang hal-hal nang akan datang, tapi wujud nang sebanar'ya adalah Kristus. ¹⁸ Usah mbiarkan orak nang sanang ngan kerendahan ati nang palsu wan penyembahan ka malekat-malekat ngakimi ka'u. Mpuya adalah orak-orak nang suka ngan nele hal-hal rinci sehingga muat pikiran mpuya sombong kaena pendapat-pendapat dunia. ¹⁹ Orak nang bage sana ngin bepigak teguh ka ulu. Ulu adalah nang nopang samua tubuh, wan samua tubuh li nyatu leh sendi-sendi wan otot-otot, samua'ya tumuh ngan petumbuhan nang berasal dari Allah. ²⁰ Kalo besama Kristus ka'u udah mati tehadap asas-asas dunia, ngape seolah-olah ka'u msih njadi milik dunia, tunuk ka aturan-aturan bage: ²¹ "Usah ngeraba, usah nyicip, usah nyentuh"? ²² Aturan-aturan ntu mao binasa satelah li nuna kaena aturan-aturan ntu li muat sesuai ka perintah wan ajaran kaleno. ²³ Aturan-aturan bage ntu memang ketele'ya bijak ngan nonjolkan sembayang nang bepusat ka diri sorak wan kerendahan ati nang palsu serta penyiksaan tubuh. Tapi, samua'ya na ngin ada nilai'ya selain ntuk muaskan kedagingan.