¹ Ntuk atak'ya Ia wan ntuk kerajaan Ia, ngan sunguh-sunguh, aku bapasat ka ka'u ka adapan Allah wan Yesus Kristus nang akan ngakimi orak nang idup wan nang mati: ² Britakanlah firman, siap sedialah ba'ik ato ngin ba'ik wa'tu ya; tagorlah, nasehatlah, wan doronglah mpuya ngan mbada sabar wan pengajaran. ³ Sabab, akan ada saat'ya wa'tu orak-orak ngin mao agi nerima ajaran sehat. Tapi, ntuk muaskan terenyek, mpuya akan ngompol guru-guru ntuk mpuya sorak nang sasuai ngan apeh nang mpuya mao. ⁴ Mpuya akan malek pendagaran mpuya dari kebanaran wan bebalek ka dongeng-dongeng. ⁵ Sedangkan ka'u, waspadalah dalap sagala hal, betahanlah dalap kesusahan, gawelah tugas pemberita Injil, wan salasaikanlah pelayanan ka'u. ⁶ Sabab, aku udah li nyurah mage cawan pesembahan. ⁷ Aku udah belawan dalap petandingan nang ba'ik; aku udah nyelesai petandingan; aku udah melihara imann. ⁸ Kini ntu, mahkota kebanaran udah li nyedia ntuk ku.Pas ari na, Tuhan, Hakim nang adil, akan mere hadiah na ka aku, wan ukat hanya ka aku, tapi uga ka samua orak nang rindu atak'ya Ia. ⁹ Berusahalah ntuk capat atak ka aku ¹⁰ kaena Demas udah ampus ka Galatia wan Titus ka Dalmatia. ¹¹ Hanya lukas nang basama ngan aku. Alaplah Markus wan babalah ia basama ka'u kaena ia mbada beguna ntuk ku ntuk pelayanan. ¹² Aku udah ngutus Tikhikus ka Efesus. ¹³ Kalo ka'u atak, babalah jubah nang ku napuk ka Karpus ka Troas wan uga buku-bukuku, terutama samua perkamen na. ¹⁴ Aleksander, si tukang basi na, udah mbada ngerugi aku. Tuhan pasti mbalas sasuai ngan apeh nang ia muat. ¹⁵ Ka'u ati-ati uga ka ia kaena ia mbada nantang ajaran diri. ¹⁶ Wa'tu petama aku li mbela, ngin ada saorak pun nang ndukung aku kaena samua udah napuk aku. Samoga hal ntu ngin li mbalas atas mpuya. ¹⁷ Tapi, Tuhan dadek ka sampingku wan nguatkan aku, supaya ngan ngelalui aku Injil li mberitakan sepanuh'ya wan samua orak nang ukat Yahudi nangar'ya. Ngan na aku lapas dari molot singa. ¹⁸ Tuhan akan nyelamatkan aku dari satiap pebuatan ja'at wan akan maba aku ka kerajaan surga Ia ngan salamt. Ntuk Ia lah kemuliaan sampe salama-lama'ya. Amin. ¹⁹ Sampekanlah salam ku ka Priskila wan Akwila, wan ka seisi rumah Onesiforus. ²⁰ Erastus aku napuk dalap kondisi sakit ka Miletus. ²¹ Berusahalah atak ka kitu pas ga ngin misim dingin. Ebulus, Pudes, Linus, Klaudia, wan kobo page nang saiman ngirim salam ntuk ka'u. ²² Tuhan nyertai roh ka'u. Anugrah nyertai ka'u.