¹ Kaena na, anakku, njadilah ka'u kuat dalap anugrah nang ada dalap Yesus Kristus. ² Apeh pun nang udah ka'u nangar dari aku ka depan manyak saksi, ncayakan na ka orak-orak nang setia, nang uga mampu ngajar orak lain. ³ Nuna'lah nderita mage prajurit Yesus Kristus nang ba'ik. ⁴ Ngin ada prajurit nang nyibukkan diri'ya ngan urusan idup sa'ari-ari supaya ia bisa muat komandan'ya sanang. ⁵ Mage na uga saorak olahragawan nang betanding, ia ngin bisa namu mahkota kemanangan kecuali ia betanding sasuai peraturan nang ada. ⁶ Saorak petani nang kuat begawe udah sepatut'ya njadi orak nang petama nang nerima hasil panen'ya. ⁷ Pikirlah apeh nang aku madah kaena Tuhan mao mere ka'u pengertian dalap sagala hal. ⁸ Inganlah Kristus Yesus, nang udah bangkit dari ntara orak mati, keturunan Daud, mage nang aku mbritakan dalap Injilku, ⁹ nang oleh'y aku kini ntu nderita sampe li njara njadi saorak kriminal, tapi firman Allah ngin tepenjara! ¹⁰ Kaena na, aku betahan dalap sagala sesuatu ntuk orak-orak pilihan Allah supaya mpuya uga nammu keselamatan nang ada dalap Yesus Kristus wan ngan kemuliaan'ya nnang kakal. ¹¹ Kata-kata ntu banar: "Kalo diri mati basama ngan Ia, diri uga bisa idup basama ngan Ia. ¹² Kalo diri rajit, diri uga bisa memerintah basama ngan Ia. Kalo diri nyangkal Ia, Ia uga bisa nyangkal diri. ¹³ Kalo diri ngin setia, Ia tatap setia, kaena Ia ngin bisa nyangkal diri Ia sorak." ¹⁴ Li ngingat mpuya ntuk hal-hal ntu. Nasehatlah mpuya ka adapan Tuhan supaya usah bedabat soal omongan, sabab ngin ada guna'ya nang ada malah ngancurkan orak-orak nang nangar'ya. ¹⁵ Babuatlah nang ba'ik supaya diri ka'u patut li nyerah ka adapan Allah mage pegawe nang ngin peralu malu, wan nang udah ngajarkan kata-kata nang banar ngan tapat. ¹⁶ Tapi, hindarlah kata-kata bual nang sia-sia kaena hal ntu bisa nuntun ka ketidaksalehan nang labih parah. ¹⁷ Kata-kata mpuya bisa nyebar mage penyakit gangren. Li ntara mpuya na Himeneus wan Filetus, ¹⁸ nang udah nyimpang dari nang banar, ngan madah kalo kebangkitan udah tajadi. Mpuya ngerusak iman beberapeh orak ¹⁹ Tapi, dasar Allah nang kuat tetap dadek ngan matrai ntu: "Tuhan kanal sapeh nang njadi nyak Ia," wan "Satiap orak nang ngako nama Tuhan arus napuk keja'atan." ²⁰ Ka dalap rumah nang mewah, ukat hanya ada perabot dari amas wan perak, tapi uga dari kayu wan tanah liat. Beberapeh li nguna ntuk tujuan nang terhormat, tapi beberapeh'ya li nguna ntuk tujuan nang hina. ²¹ Kaena na, kalo saorak nyucikan diri dari hal-hal nang hina, ia akan njadi perabot ntuk tujuan nang terhormat, li ngususkan, beguna ntuk tuan'ya, wan li nyiapkan ntuk satiap pegawe nang baik. ²² Jauhlah dari hawa nafsu orak muda wan pelagalah kebanaran, iman, kasih, wan damai sejahtera basama-sama ngan mpuya nang manggel Tuhan ngan ati nang murni. ²³ Hindarlah pedebatan nang bodoh wan ngin bepengetahuan kaena ka'u nao kalo hal ntu bisa ndatangkaan petengkaran. ²⁴ Pelayan Tuhan aruslah ngin batangkar, tapi ramah ngan samua orak, terampil ngajar, wan sabar, ²⁵ ngan lembut memperbaiki lawan'ya. Samoga Allah menganugerahi mpuya petobatan nang nuntun'ya ka pengetahuan akan kebanaran. ²⁶ supaya mpuya njadi sadar wan ngelapaskan diri'ya sorak dari jebakan Iblis nang udah njerat mpuya ntuk njalankan keinginan'ya