¹ Dompak ari mulai arian, sude Imom kapala dohot tobang-tobang ni bangso Yahudi markumpul jana mambaen sada haputusan giot mamunu Yesus. ² Di pasung halahi ma Ia, dungi diboan halahi Ia jana di sorahkon Ia tu si Pilatus wali negeri i. ³ Dompak si Yudas, na manyorahkon Ia, mangaligi, bahaso madung di dabuhon uhuman mate tu Yesus, manyosal ma ia. Dung i di paulak ia ma hepeng na tolu pulu perak i tu Imom-imom kapala dohot tobang-tobang, ⁴ jana mandok: “Madung mardosa au harana manyorahkon daro ni halak na so marsala.” Tapi di alusi halahi: “Aha urusan nami dohot i? I urusanmu sandiri do i!” ⁵ Jadi di danggurkon ia ma hepeng perak i tu bagasan Bait suci, dungi kehe sian i jana manyingkot. ⁶ Dibuat Imom-imom kapala ma hepeng perak i jana didok: “inda dipatola mamasukkon hepeng on tu bagasan poti persembahan, harana hepeng daro do i. ⁷ Dung marpokat, di tabusi halahi ma dohot hepeng i tano na nidok tano ni si topa hudon giot jadihonon inganan kuburan ni halak na asing. ⁸ Ima na mambaen tano i didok tano daro lopus tu sadari on. ⁹ Dohot songoni gonop ma hata na di sampehon ni nabi Yeremia: “Dijagit halahi tolu pulu hepeng perak, ima arga na di totopkon tu sada halak manurut panilaian na marlaku di antara ni halak Israel. ¹⁰ Jana dilehen halahi ma hepeng I, manjadi tano ni si topa hudon songon na di tonahon ni Tuhan tu au.” ¹¹ Dungi di paadop ma Yesus tu wali negeri. Jana marsapa ma wali negeri tu-Sia: “Ho do langa raja ni halak Yahudi i?” Dialusi Yesus: “Ho sandiri madung mandokkonna.” ¹² Tapi harani tuduhan na ni ajuhon ni Imom-imom kapala dohot tobang-tobang maradopkon Ia,inda adong dilehen Ia alus sanga na aha pe. ¹³ Jadi di dokkon si Pilatus ma tu-Sia: “Inda langa di bege ho bahat ni tuduhan ni angka saksi on maradopkon Ho?” ¹⁴ Tapi inda adong di alusi Ia sahata pe, sahingga wali negeri I heran situtu. ¹⁵ Madung manjadi hasomalon di wali negeri laho mambebaskon sada halak uhuman di tiop-tiop ari raya I marhite pilihan ni halak na bahat. ¹⁶ Jana dompak I adong di penjara sada halak na tarbarita hajahatanna na margoar Yesus Barabas. ¹⁷ Harana dung markumpul halahi disi, di dokkon si Pilatus ma tu halahi: “Ise na dihagioti hamu hu bebaskon di hamu, Yesus Barbas sanga Yesus, na didok Kristus?” ¹⁸ Diboto Ia do memang, bahaso disorahkon halahi Yesus harani dongki. ¹⁹ Dompak juguk si Pilatus di karosi pengadilan, dikirim dadaboru nia ma pesan tu sia: “Ulang dohot ho mancampuri purkaro ni halak na bonar i, Alana harani Ia, marhancit situtu do au di bagasan nipi napotangin. ²⁰ Tapi harani hasutan ni imom-imom kapala dohot tobang-tobang, halak na bahat martekad giot mangido anso di bebaskon si Barabas jana Yesus di uhum mate. ²¹ Wali negeri manjawab jana mandok tu halahi: “Ise diantara ni na dua halak i na di hagioti hamu hu bebaskon di hamu? Didok halahi: “Barabas.” ²² Didok si Pilatus tu halahi: “Anggo songoni ahama na angkon baenonku tu Yesus, na didok Kristus?”martariak ma halahi sude: “Ia angkon di Parsilangkon!” ²³ Ning ia:”tapi hajahatan na songon dia langa na dung di baen Ia?” tapi mur gogo do halahi marsurak: “Ia angkon di Parsilangkon!” ²⁴ Dompak diligi si Pilatus bahaso sude usaho nia sia-sia,bahkan madung mulai timbul partongkaran, di buat ia ma aek jana di basu ia ma tangan nia di adopan ni halak na bahat jana mandok: “Inda marsala au maradopkon daro ni halakon; urusanmu sandiri ma i!” ²⁵ Jana sude rakyat i manjawab: “Padiar ma daro-Nia di tanggungkon tu hami jana tu daganak nami!” ²⁶ Dungi diserahkon ia ma Barabas dihalahi, tapi Yesus dipukuli (disesah) ia dungi diserahkon ia anso di parsilangkon. ²⁷ Dungi soridadu-soridadu wali negeri mambaen Yesus tu kantor pengadilan, dungi mamio sude pasukan markumpul mangalilingi Yesus. ²⁸ Di buka halahi ma pakean-Na jana dipapakehon halahi ma juba na ungu tu-Sia. ²⁹ Di rakit halahi ma sada mahkota duri jana dibaenma di ginjang ni ulu-Nia, dungi dilehen ma tu-Sia sabatang buluh di tangan kanan-Nia. Dungi marsinggang ma halahi di adopan-Nia jana mangincahi Ia, ninna ma: “Salam, ale raja ni halak Yahudi!” ³⁰ Di tijuri halahi ma Ia jana di buat ma buluh i jana di pukulkon ma tu ulu-Nia. ³¹ Dung diincahi Ia di buka halahi ma jubah i sian Ia jana mamakehon muse pakean-Na tu-Sia. Dungi diboan halahi ma Ia tu luar anso diparsilangkon. ³² Dompak mardalan halahi tu luar kota, pasuo halahi dohot sada halak sian Kirene na margoar si Simon. Halak i ma di paksa halahi mamorsan silang ni Yesus. ³³ Jadi lalu ma halahi di sada inganan na margoar Golgota, artina: inganan ni Tengkorak. ³⁴ Dungi halahi mangalehen Ia minum anggur na marcampur pogu. Dung di dai Ia, Inda ra Ia manginumna. ³⁵ Dung di parsilangkon Ia di bagi-bagihon halahi ma pakean-Nia dohot mangambungkon undi. ³⁶ Dungi juguk ma halahi disi manjago Ia. ³⁷ Jana di ginjang ni ulu-Na tarpasang tulisan na mandokkon alas an biasi di uhum Ia: “On m Yesus Raja ni Halak Yahudi.” ³⁸ Rap dohot Ia diparsilangkon dua halak parjahat, sada di sabola kanan jana sada di sabola kiri-Nia. ³⁹ Angka na lewat disi mangutuk Ia sambil mangupir, ⁴⁰ Didok halahi: “ale Ho na giot mangarumpakkon Bait Suci jana giot mambangunna mangulahi dibagasan tolu ari, salamatkon ma diri-Mu anggo na Anak ni Allah do Ho, turun ma sian silang i!” ⁴¹ Songoni muse ma Imom-imom kapala rap dohot ahli Taurat jana tobang-tobang mangincahi ia jana didok halahi: ⁴² “Halak na asing di selamatkon Ia, tapi diri-Nia sandiri inda bisa diselamatkon Ia! Ia raja Israel ? turun majo Ia sian silangi anso porcaya hami tu-Sia. ⁴³ Marharop tu Allah do Ia: pade ma Allah manyelamatkon Ia, anggo na jop do roha ni Allah tu-Sia! Harana madung didokkon Ia: Au ima Anak Allah.” ⁴⁴ Songoni muse panyamun na di parsilangkon rap dohot Ia leng mangincahi Ia. ⁴⁵ Mulai sian jam dua bolas hagolapan manutupi sude daerah i sampe tu jam tolu. ⁴⁶ Kira-kira jam tolu martariak ma Yesus dohot suara na gogo: “Eli’Eli, lama sabakhtani?” artina: Allah-Ku, Allah-Ku, biasi ditinggalkon Ho Au? ⁴⁷ Mambege i, piga-piga halak na jongjong disi mandok: “Dipio Ia si Elia.” ⁴⁸ Jana manigorma ro sada halak sian halahi; dibuat ia ma bunga karang, disornopkon ia ma tu bagasan anggur asom, dungi manusukkonna tu sabatang buluh jana mangalehen Yesus minum. ⁴⁹ Tapi halak na asing mandok: “Ulang, gonanma taligi, sanga ro do si Elia manyelamatkon Ia.” ⁵⁰ Martariak ma muse Yesus dohot suara na gogo dungi di sorahkon Ia ma hosa-Nia ⁵¹ Jana ligima, tarbola dua ma tabir Bait Suci sian ginjang lalu tu toru jana tarjadi ma lalo, jana bukit-bukit batu mabola, ⁵² Jana kuburan-kuburan tarbuka dohot bahat halak na badia na dung mate jadi ngot. ⁵³ Jana dung hangongot ni Yesus, halahi pe kaluar ma sian kuburan, dungi masuk tu kota na badia jana patidahon diri tu bahat halak. ⁵⁴ Kapala pasukan dohot prajurit-prajuritna na manjago Yesus manjadi mabiar situtu dompak di ida halahi lalo jana aha na dung tarjadi, dungi didok: “tutudo, Ia on Anak Allah.” ⁵⁵ Jana adong di si bahat adaboru na mangaligi sian na dao, ima angka dadaboru na mangihutkon Yesus sian Galilea giot mangoloi Ia. ⁵⁶ Di antara ni halahi adong si Maria Magdalena, dohot Maria uma ni si Yakobus dohot si Yususf, dohot uma ni daganak ni si Zebedeus. ⁵⁷ Marayak borngin ro ma sada halak na kayo, halak Arimatea, na margoar si Yususf jana na dung manjadi murid ni Yesus juo. ⁵⁸ Kehe ma ia mangadop si Pilatus mangido bangke ni Yesus. Diparentahon si Pilatus ma aso disorahon tu sia. ⁵⁹ Jana di buat si Yusuf ma bangke i, dikapani ia dohot abit lenan na bontar ias, ⁶⁰ Dungi di payakkon ia ma di kuburan nia na imbaru, na digali ia dibagasan bukit batu, jana dung manggulangkon batu na godang tu pintu ni kuburan i, kehe ma ia. ⁶¹ Tapi Maria Magdalena dohot Maria na asing tinggal disi juguk di jolo ni kuburan i. ⁶² Ancogot nai, ima dung ari persiapan, ro ma imam-imam kapala dohot halak Farisi rap mangadop si Pilatus, ⁶³ Jana didok halahi: “Tuan, hami ingot do, dompak di ngoluni si pangaliluhon I didokkon: dung tolu ari ngot do au. ⁶⁴ Harani i parentahon ma aso dijago kuburan i sampe ari patoluhon; anggo inda, adong kemungkinan ro murid-murid-Nia manangko Ia, dungi mandokkon tu masyarakat: madung ngot Ia sian antara ni halak na mate, sahingga panyesatan na parpudi um jat-jat akibatna sian pado na parjolo.” ⁶⁵ Didok Pilatus tu halahi: “on ma panjago-panjago di hamu, kenima jana jagoma kuburan i dohot denggan. ⁶⁶ Jadi kehe ma halahi, jana dohot bantuan ni angka panjago i dimateraikon halahi ma kuburan i dohot manjagona