¹ Dompak i kaluar ma Yesus sian bagas i jana juguk di topi ni Dano. ² Jadi ro ma halak na bahat mudur-udur mangarongomi Ia, dungi manaek ma Ia tu parau i jana juguk ma di si, Anggo halak na bahat sude jongjong di pantai. ³ Jana didokkon Ia ma bahat purkaro di bagasan parumpamaan tu halahi. Ning-Ia ma: “adong ma sada panabur kaluar laho manyabur. ⁴ Dompak manabur ia, sabagian bibit i madabu dipinggir dalan, dungi ro ma burung jana di pangan ma sampe habis. ⁵ Sabagian madabu di tano na marbatu-batu, na so bahat tanona, dungi bibit i pe manigor tubu, harana tipis tanona. ⁶ Tapi dung torbit mataniari, malos ma ia jana gabe mahiang harana inda marurat. ⁷ Sabagian nai madabu di tonga-tonga ni duhut na marduri, dungi mur magodang ma duhut i jana mangapitna sampe mate. ⁸ Jana sabagian nai madabu di tano na jeges dungi marbatu: adong na saratus kali lipat, adong na onom pulu kali lipat, adong na tolu pulu kali lipat. ⁹ Ise na marsuping, mambege ma sugari Ia. ¹⁰ Jadi ro ma murid-murid-Nia jana marsapa tusia: “Biasi mangkatai ho tu halahi di bagasan parumpamaan? ¹¹ Dialusi Yesus: “tu hamu dilehen kuaso laho mamboto rahasia harajaan ni surgo, tapi tu halahi inda. ¹² Harana ise na marnampuna, tu sia di lehen, anso marlobi-lobi ia; tapi ise na so marnampuna, aha na adong di sia giot buaton sian Ia. ¹³ Ima alasanna au mangkatai di bagasan parumpamaan tu halahi; harana harupe mangaligi, tapi inda marnida jana harupe mambege inda di bege halahi jana inda mangarti. ¹⁴ Jadi tu halahi gonop ma nubuat ni si Yesaya, na mandok: hamu mambege dohot mambege, tapi inda mangarti, hamu mangaligi dohot mangaligi tapi inda mananggap. ¹⁵ Harana roha ni bangso i madung hapal, jana supingna borat mambege, dohot matana lokot tartutup; anso unang halahi mangaligi dohot matana jana mambege dohot supingna jana mangarti dohot rohana, dungi marbalik sahingga au pamalumkon halahi. ¹⁶ Tapi marjop ni roha ma harana matamu mangaligi jana supping mu mambege. ¹⁷ Harana au mandokkon tu hamu: sabotulna bahat nabi dohot halak na bonar giot mangaligi aha na di ligi hamu, tapi inda mangaligina, jana giot mambege aha na di bege munu, tapi inda mambegena. ¹⁸ Harani i, begema arti ni parumpamaan ni panyabur i. ¹⁹ Tu satiop halak na mambege hata satongtang tu Harajaan ni surgo, tapi inda mangarti, ro ma si jahat jana mangarampus na di taburkon di bagasan roha ni halahi i; ima bibit na di taburkon di pinggir dalan. ²⁰ Bibit na di taburkon di tano na marbatu-batu ima halak na mambege hata i jana manigor manarimo dohot jop ni roha. ²¹ Tapi inda marurat ia jana hum santongkin sajo. Muda ro panindosan dohot panganiayaan harani hata i, halahi pe manigor marbalik. ²² Na di saburkon di tonga ni duhut na marduri ima halak na mambege hata i, dungi hasusaan ni dunia on dohot tipu daya ni hakayoon mangapit hata i sahingga inda marbatu. ²³ Na di saburkon di tano na denggan ima halak na mambege hata i jana mangarti, jana harani i marbatu ma ia, adong na saratus kali lipat, adong na onom pulu kali lipat, adong na tolu pulu kali lipat. ²⁴ Yesus mambukahon sada parumpamaan na asing muse tu halahi: “Harajaan ni surgo i saumpama halak na manyaburkon bibit na denggan di kobunna. ²⁵ Tapi dompak modom halak sude, ro ma musuna manyaburkon bibit ni lalang di antara ni gandum i, dungi kehe. ²⁶ Dompak tubu gandum i jana mulai runcang, tarida muse ma lalang i. ²⁷ Jadi ro ma angka naposo ni tuan ni ladang i tusia jana mandok: tuan, inda langa bibit na denggan, na di saburkon ni tuan di ladang ni tuan? Sian dia do lalang i? ²⁸ Dialusi tuan i: sada halak musu do na mangkarejohon i. Dung i mangkatai ma angka naposo i tu sia: jadi ra langa tuan anso kehe hami mancabut lalang i? ²⁹ Tapi didokkon ia: ulang, harana mungkin jadi dohot gandum i tarcabut dompak dicabut hamu lalang i. ³⁰ Padiar ma rap tubu dua-duana sampe waktu mamungut hasil. Dompak i dokononku ma tu angka pamungut hasil: kumpulkon majo lalang i jana ikat sasarumpun anso di bakar; dungi papunguma gandum i tubagasan lumbungku. ³¹ Di bukahon Yesus ma sada parumpamaan na asing muse tu halahi, ning-Ia ma: “Purkaro harajaan ni surgo i saumpama batu ni sawi, na dibuat jana di taburkon halak di kobunna. ³² Memang batu i do na paling menek sian sude rupo ni bibit, tapi muda dung tubu, sawi i um godang sian pado sayuran na asing, bahkan manjadi hayu, sahingga burung-burung di langit ro marasar di dangka-dangkana.” ³³ Jana di caritohon Ia muse ma parumpamaan on tu halahi: “purkaro harajaan ni surgo i saumpama ragi na di buat sada adaboru jana digaorkon tu bagasan topung terigu tolu sukat sampe marcampur sudena.” ³⁴ Sudena i di sampehon Yesus tu halak na bahat i di bagasan parumpamaan, jana anggo inda so dohot parumpamaan, aha pe inda di palalu Ia tu halahi, ³⁵ Anso gonop ma hata na di sampehon ni nabi: “Au giot mambuka pamanganku mangkatahon parumpamaan, Au giot mandokkon purkaro na buni muloi sian dunia di jadihon. ³⁶ Jadi di tinggalkon Yesus ma halak na bahat i, dungi mulak. Murid-murid-Nia ro jana mandok tu-Sia: “Patorang ma tu hami parumpamaan satongtang tu lalang di kobun i.” ³⁷ Di alusi Ia ma, ning-Ia: “halak na manyabur bibit na denggan ima Anak ni Jolma; ³⁸ Kobun ima dunia. Bibit na denggan i angka daganak Harajaan jana lalang i angka daganak ni si jahat. ³⁹ Musu na manyaburkon bibit ni lalang i ima sibolis. Waktu mamungut hasil ima ari kiamat jana angka na mamungut hasil i ima susu-suruan. ⁴⁰ Jadi songon lalang i di kumpulkon jana dibakar di bagasan api, songoni juo ma di ari kiamat. ⁴¹ Anak ni jolma giot manyuru susu-suruan-Na jana halahi mangumpulkon sudena na mangaliluhon dohot sude halak na mangkarejohon hajahatan sian bagasan ni harajaan-Nia. ⁴² Sudena giot ambungkonon tu bagasan dapur api; disi ma dapot andung dohot kertakan gigi. ⁴³ Dompak i ma angka halak na bonar marcahayo songon mataniari dibagasan harajaan ni Amang ni halahi. Ise na marsuping, giotna mambege ma ia. ⁴⁴ Harajaan ni Debata I saumpama arta na buni di kobun, na di dapotkon ni halak, dungi di tabunihon ia muse. Harani jop ni roha nia kehe ma ia manggadis sude nadong nia dungi manabusi kobun i. ⁴⁵ Songoni juo ma satongtang tu Harajaan ni surgo I, saumpama sada parjagal na manjalahi Mutiara na jeges. ⁴⁶ Dung dapot ia Mutiara na mararga sikatutu i, Ia pe kehe ma manggadis sude nadong nia dungi manabusi Mutiara i.” ⁴⁷ “Songoni juo ma taringot tu Harajaan ni surgo i saumpama pukat na marlabuh di laut, dungi mangumpulkon mocom-mocom ni ikan. ⁴⁸ Dung pol, pukat i pe disarat halahi ma tu pantai, dungi juguk ma halahi jana mangumpulkon ikan na jeges tu bagasan pasu dohot ikan na so jeges di ambungkon halahi. ⁴⁹ Songoni juo ma di ari kiamat: susuru-suruan giot ro paasingkon halak na jahat sian halak na bonar, ⁵⁰ Dungi mangambungkon halak na jahat tu bagasan dapur api; di si ma dapot andung dohot kertakan gigi. ⁵¹ Mangarti do langa hamu sudena i? “ Dialusi halahi ma: “olo, mangarti do hami.” ⁵² Jadi mangkatai ma Yesus adop halahi: “Hara ni i satiop ahli Taurat na manarimo parsiajaran sian purkaro Harajaan ni surgo i saumpama tuan ni sada bagas na mangaluarkon arto na baru dohot na lama sian sinadonganna.” ⁵³ Dung sidung Yesus mancaritohon angka parumpamaan i, Ia pe kehe ma sian i. ⁵⁴ Dung lalu di inganan asal-Nia, mangajar ma Yesus tu halak na disi di bagas paribadatan ni halahi. Jadi heran ma halahi jana didok ma: “sian dia do dapot Ia bisuk i dohot kuaso laho paadongkon mujizat-mujizat i? ⁵⁵ Inda langa anak ni tukang hayu i do Ia on? Inda langa uma-Nia margoar si Maria dohot saudaro-saudaro-Nia: si Yakobus, si Yusuf, si Simon dohot si Yudas? ⁵⁶ Jana inda langa angka saudaroNa adaboru sudena adong rap dohot hita? Jadi sian dia do dapot ia sudena i? ⁵⁷ Dungi kecewa ma halahi jana manolak Ia. Jadi didokkon Yesus ma tu halahi: “sasada halak nabi di hormati do sanga na didia pe, kecuali di inganan asalnia sandiri dohot di bagas nia. ⁵⁸ Jana harani na so porcaya halahi, inda bahat mujizat di baen Ia di si.