¹ En mo perjolo berita si mende ni Jesus Kristus anak ni Debata ² Bage si tersurat ibagasen buku penurirang si Jesaya; idah mo! Aku menengesken sada suruhenku menjoloi ko lako petureken dalan Bamu. ³ Lot sora dilo-dilo i tembak kelongon nai; peture dalan Tuhan, ibain mo dalan na penter. ⁴ Jadi si Johanes mendidi jelma irambah kelongon dekket menjamitaken pendidin pertobaten dekket kesesaan dosa. ⁵ Karina jelma si lot i Judea bagi ma nang i Jerusalem, roh mendahi si Johanes, gabe terdidi mo kalak i lae Jordan dekket menopoti dosa-dosana. ⁶ Johanes memakke buk unto, dekket permenting koling-koling i abakna. Panganenna Balang dekket Tenggoli. ⁷ Johanes mendok, enggo kessa aku, roh nola mo sakalak lebih merkuasa baku nai. Gari tungkuk aku oda boi lako membuka tali sipatuna. ⁸ Aku mendidi kene dekket lae, akum Ia ididi ngo kene dekket tendi si badia. ⁹ Asa i bagasen si dari i, roh mo jesus i Nazareth nai, luat Galilea, laus terdidi i baen si Johanes i lae Jordan. ¹⁰ Keluar kessa i lae i nai, Jesus mernidah langit mbuka, dekket tendi bage pidong ndarapati senggep baNa ¹¹ Terbege i surgo sora na mendok; ko no ngo Anak si ku kellengi, Bamu ngo aku merlemmo ni ate. ¹² Jadi iembah tendi i mo Jesus mi kelongoon. ¹³ Isi mo Jesus dekkahna empat puluh ari asa i unjuni sibolis. Jesus rebbak dekket binatang-binatang si lot i rambah i, suruh-suruhen ni Debata mendengani dekket mengkebbasi Jesus. ¹⁴ Enggo kessa ikurungen si Johanes, laus mo Jesus mi luat Galilea. ¹⁵ Idok Jesus mo; enggo dapet tikkina, kerajan Tuhan enggo jolmit. Merobah mo kene, dekket porsea mi kata Tuhan. ¹⁶ I tikki merdalani Jesus, i topi dano Galilea, idah Jesus mo si Simon dekket si Andreas anggina tikki menjala, ala penjala dekke ngo kalak i. ¹⁷ Idok Jesus mo mi kalak i; ekutken mo Aku, asa kubaen kene sijala jelma. ¹⁸ Simon dekket Andreas kumalaput menadingken jalana, laus memgekutken Jesus. ¹⁹ Enggo kessa nola laus Ia terndaoh, idah mo Jakobus, anak Zebedeus dekket Johanes anggina, i bagasen parau peliasken jalana. ²⁰ Idiloi Jesus mo kalak i si dua gabe i tadingken kalak i mo bapa na, Zebedeus i bagasen parau i dekket akka denganna, gabe i ekutken kalak i mo Jesus. ²¹ Asa soh mo kalak i ikuta Kapernaum i ari sabat, masuk mo Jesus mi sapo Sinagoge lako mengajari. ²² Gabe lengang ngo kalak i, kibege ajaren na ala ia mengajari bage kalak si lot kuasa, oda bage kalak si bettoh patik. ²³ I bagasen Sinagoge i, lot sada doli-doli i masuki tendi si mada toko, gabe mersuraki mo ia, ²⁴ kade urusen Mu bai nami Jesus I Nazareth nai? oda ngo roh ko lako mengagoken kami? kubettoh ngo ise Kono. Ko ngo kalak si Badia i Debata nai. ²⁵ Alai, i senggak Jesus mo tendi si mada toko idok mo: kom mo kono! keluar mo ko isi nai! ²⁶ Gabe menganjaki ngo ia dekket mersuraki, gabe laus mo tendi si mada toko i bana nai. ²⁷ Karina kalak i lengang dekket kuso-kuso mi denganna, kade ngo i? sada ajar si rimbaru merdengan kuasa! janah boi Ia ki suruh tendi si mada toko i laus dekket mbiar Bana. ²⁸ Asa terberita mo Ia i karina luat soh mi luat Galilea. ²⁹ Asa enggo kessa laus Jesus dekket siseanna menadingken perpulungen i, masuk mo kalak i mi sapo si Simon dekket si Andreas, rebakken dekket Jakobus, dekket Johanes. ³⁰ Alai mersakit ngo simatua daberru ni si Simon, gabe ipaboa kalak i mo mi Jesus. ³¹ I dapetken Jesu mo ia i cekep tanganna mendengani lako cender. Gabe njuah mo sakit si daberru i dekket mengkebasi kalak i. ³² Enggo kessa berngin, sundut mata ni ari roh mo kalak merembah si mersakit dekket jelma sinimasuki tendi simada jadi mi Jesus. ³³ Gabe merpulung mo karina jelma i kutai, i jolo sapo i. ³⁴ Jesus pemalumken mbue kalak simersakit, dekket pelausken akka begu. alai oda idue Jesus begu i mengerana, alai itandai ngo ise Jesus. ³⁵ Kusiangna oda deng soh terangna, keke mo Jesus laus mi sada bekkas si melongo, janah isi mo Ia mertangiang. ³⁶ Gabe roh si Simon dekket jelma mbue denganna lako menulusi Jesus. ³⁷ Isi pejumpa kalak i dekket Jesus, idok kalak i mo; karina kalak menulusi ko! ³⁸ Mengerana mo Jesus, beta mo kita laus mi kuta sinjolmitna, asa merjamita aku mi akka jelma si lot isi, ala ni i ngo Aku asa roh. ³⁹ Ala ni i laus mo Jesus merdalani karina luat Galilea. Ia mengeranaken kata Tuhan isapo Sinagoge kalak i dekket pelausken setan dekket begu. ⁴⁰ Asa lot mo sada kalak na mersakit koliten roh mendahi Jesus. Mengido ia dekket mersembah Bana, idok mo, ''Molo geut Kono", Boi ngo ko pemalumken aku. ⁴¹ Merdengan masih ate, idoroken Jesus mo tangan na menjamah si mersakit i, idokken mo; geut ngo aku , njuah mo i akap ko! ⁴² Karangken nai sakit kolit na mbalang, trus njuah mo iakap. ⁴³ Gabe isuru Jesus mo ia laus janah i pesenget. ⁴⁴ Idok mo mi kalaki; unang ibagahken kono manang bai ise pe. Alai , laus mo ko, peteridahken mo diri mu mi malim, breken kemuliateon ala njuah i akap ko, bage sinidokkon si Musa gabe kesaksin mi kalak. ⁴⁵ Alai gabe laus ngo ia paboaken mi karina kalak, dekket ki sukutken mi karina kalak. Ala ni i oda ne boi Jesus masuk mi kuta, keluar mi sada bekkas si melongo. Alai, karina kalak i luat dike nai pe roh mendahi Jesus.