¹ khatana kalak si menahan kini dekhsa sebage hamba hakhus mo ki anggap tuanna bage kalak si pantas ki dapetken khatana hokhmat asa gelakh Allah janah pengajakhen ta otang i cela. ² sedangken pakha budak si tuanna imo kalak pekhcaya, ulang mo mengkukhangi khasa hokhmat mendahi kalak i imo senina-senina hada iman. sebalikna, pakha hamba hakhus ki layani tuanna lebih mende nai kumekhna si menjalo bekhkat pelayanen imo kalak-kalak pekhcaya janah kalak i kelengi. ajakhken janah pesengetken hal-hal enda mendahi kalak idi. ³ mella lot kalak i ki ajakhken ajakhen sideban si otang dos deket kata si otang tuhu i Tuhan ta Isa Almasih nai janah otang dos deket ajakhen kesalehen, ⁴ ia mo pebual janah otang mengantusi kade-kade. Ia kessa tekhtakhik deket mengalo si otang sehat, si lako kidebatken khana-khana si lako memainken ikhi ate, pekhsikhangen, fitnah, janah kecukhigaan si jahat, ⁵ janah lalap memaing pekhubaten i antakha jehma-jehma si pikikhenna enggo keah deket otang ki jalo kebenakhen, si mengikha bahwa kesalehen idi mo cakha lako mendapetken laba. ⁶ tapi, kesalehen si i khebakken khasa pela naing memekheken manfaat si mbehgah. ⁷ kumekhna kita otang mekhembah kade-kade enggo kessa mbengket mi dunia janah kita pe otang boi mekhembah kade-kade enggo kessa kita keluakh i dunia en nai. ⁸ mella enggo lot panganen janah paken, kita enggo mekhasa pela. ⁹ kalak si pot jadi beak ndabuh mi bages pekhcobaen deket jebaken, deket mekhbage nafsu si gumbu janah kibahayaken si naing menglenengken jehma-jehma mi bages kehancukhen janah binasa. ¹⁰ kumekhna, sekel kepeng imo akakh i khatana macam kejahaten. jehma-jehma si kiayaki kepeng ia enggo menukhimpang i iman nai janah meniksa dikhina sendikhi deket mekhbage bonek ate. ¹¹ tapi, kona sebage jehma i Allah nai, pedaohken mo dikhimu i khatana idi. ayaki mo kebenakhen, kesalehen, iman, keleng, ketabahen, deket lembut. ¹² mekhjuang mo i bages pekhjuangen iman si mende janah gelemmo i bas nggeluh kekal si lako bana kona i tenggoi enggo kessa kona memekheken pengakuan si mende i jolo mbue saksi. ¹³ i jolo Allah si memekhekken nggeluh i dates khatana janah i jolo Isa Almasih si memekhekken pengakuen si mende enggo kessa i jolo deket Pontius Pilatus, aku ki pekhintahken kona, ¹⁴ sai kona mo mendalanken pekhintah en janah otang mekhcacact deket otang mekhcela soh pekikhoh Tuhan ta Isa Almasih. ¹⁵ waktu idi si i tentuken-Na, Ia naing ki pecidahken dikhi-Na sebage hada-hadana penguasa, Raja i babo khatana khaja, deket Tuan i babo Khatana tuan. ¹⁶ Ia mo hada-hadana si kekal, si tading i bages tekhang si otang tekhdahi, si otang hada kalak pe nung mengidah bakhang pe bisa mengidah Ia. Taba Ia, khatana hokhmat janah kuasa si kekal! Amin. ¹⁷ kumekhna idi, pekhintahken jehma-jehma si beak si bagendakhi en asa otang sombong bakhang pe ki bainken hakhapen mi kinibeak si otang pasti, tapi bain mo hakhapenmu mendahi Allah, si deket melimpah ki sediken khatana mendahi kita lako ki nikmati. ¹⁸ pekhintahken kalak i lako mengulaken si mende, gabe beak i bages pekhulan-pekhulan si mende, gabe kalak si ncekhep ate, janah ue mekhbagi. ¹⁹ deket bagi, kalak i naing ki pepulungken hakhta taba dikhi kalak i sendikhi jadi dasakh si mende lako masa si naing khoh asa kalak i boi menggelem ibas kenggeluhen si tuhunna. ²⁰ Timotius, jaga mo kade si enggo i pekhcayaken mendahi kona. pedaoh mo pekikhanan si duniawi janah khana si otang tuhu deket pekhtentangen si salah i doken "pemetohen", ²¹ si deket kipekhtuhu, iman piga-piga jehma gabe menukhimpang. Anugekhah kidengani kona.