¹ Kude hanyu,Titus,ware hanyu ngajar sa bujur ngajar ajaran sa bujur. ² Ami nasihat ma kawan upu sa haut matueh,nampan here nahan diri, bijaksana nelang welum kala ulun sa nahormat.Here harus pada itegei hang ajaran sa bujur teka Alatalla,sinta sa paruna nelang nanggung kahanangen andri sabar. ³ Kalayiru pada ware hanyu ngami nasehat ma kawan wawei sa matueh nampan tingkah laku here susuk anri inun sa patut ma ulun sa welum hulung ma Alatalla.Here puang iyuh muntaka ulun lain nelang puang iyuh ketagihan minuman keras.Here harus ngajar kawan hal sa maeh. ⁴ nampan andri kalayiru here kaiyuh ngajar kawan wawei bujang sa lagi iya nampan sinta ma matueh upu here andri kawan anak ni. ⁵ bijaksana,welum barasis nelang jari ibu rumah tangga sa maeh tunduk ma matueh upu ni.Andri kalayiru puang uweng ulun kaiyuh ngampahe kabar teka Alatalla. ⁶ Kalayiru pada,ami nasihat ma kawan ulun sa lagi iya nampan here bijaksana. ⁷ Hang ala katantuluh,ware hanyu jari suntu tingkah laku sa maeh.Amun hanye ngajar,hanyu harus jujur nelang andri tuu-tuu atei. ⁸ Pakai kawan lengan sa bijaksana,sa puang tau nadawa daya ulun, nampan kawan ulun sa na dawa hanyu amangan daya puang uweng hal sa puang maeh sa tuu neau here neu takam. ⁹ Kawan walah harus tunduk ma tuan ni,nelang ngampi sanang atei tuan ni hang katuluh hal.Here puang iyuh nawan, ¹⁰ atawa ngalat,ware here nantarang sa here sarantang makai lagu lampah sa maeh nelang satia,nampan andri sara here yiru ulun nawat ajaran neu Alatalla,panyalamat takam. ¹¹ Daya, Alatalla haut nantarang ahi leloni neu nyalamat katuluh marunsia. ¹² Ahi lelo Alatalla yiru ngajar takam nampan takam puang lagi welum balawanan andri kabahumen Alatalla nelang puang ngalut kabahumen dunia.Takam naajar nampan welum hawuang dunia yiti andri tau nahan diri,tulus nelang satia ma Alatalla. ¹³ Itati takam rahat ngandrei anrau sa naharap daya takam yiru,hang andrau yiru dunia sagar kadinung pihante mulia Yesus Kristus,hanyeyiru pihante Alatalla nelang Raja panyalamat takam. ¹⁴ Hanye haut nyarah diri ni ma takam nampan nyanepah takam teka kawan kajahaten,palus ngulah takam jari marunsia sa lepah teka dosa balalu jari milikni,nelang rajin ngulah ala maeh. ¹⁵ Ajar kawan katuluh yiru, nelang ami nasehat,tagur kawan ulun sa nyanrengei lengan nu anri bapangaruh.Ada maladar sunah erang kaulun nganggap hanyu randah.