¹ Daya gana yiru, itati puang uweng lagi hukuman ma here sa welum hang wuang Yesus Kristus. ² Daya, hukum Roh pamelum hang wuang Yesus Kristus haut memerdekakan hanyu teka hukum dusa andri pampatei. ³ Inun sa puang tau natampalus daya Hukum Taurat daya gana takam murunsia maleme, haut natampalus Alatalla makai ngutus Anak-Ni raerai nampan jari sarupa andri murunsia sa badusa nelang takait dusa, Hanye nukum dusa hang wuang daging, ⁴ nampan tuntutan Hukum Taurat natampalus hang wuang takam sa puang welum manurut daging, kude manurut Roh. ⁵ Daya here sa welum manurut daging, mamikir kawan hal sa basifat daging, kude here sa welum manurut Roh, mamikir kawan hal sa basifat Roh. ⁶ Daya pikiran sa natuju ma daging hanye yiru pampatei, kude pikiran sa natuju ma Roh hanye yiru welum andri damai sejahtera. ⁷ Pikiran sa natuju ma daging nawan Alatalla; daya hanye puang nuu ma hukum Alatalla, likan puang tau ngarajani. ⁸ Nelang, here sa welum hang wuang daging puang kaiyuh ngampi sanang atei Alatalla. ⁹ Kude, naun puang welum hang wuang daging, malengkan hang wuang Roh, amun Roh Alatalla dasar muneng hang wuang naun. Daya, amun ulun yiru puang uweng Roh Kristus, hanye lain wat Kristus. ¹⁰ Kude amun Kristus naan hang wuang naun, biar tenga naun matei daya dusa, kude Roh welum daya kabanaran. ¹¹ Amun Roh Alatalla sa nyamelum Yesus teka pampatei muneng hang wuang naun, Hanye sa nyamelum Yesus Kristus teka pampatei pada sagar ngami pamelum ma tenga naun sa fana itetei Roh-Ni sa muneng hang wuang naun. ¹² Jari, pulaksanaiku katuluh, takam na kawan ulun sa bautang, kude puang ma daging, nampan welum iyalah daging. ¹³ Daya, amun naun welum manurut daging, naun sagar matei, kude amun daya Roh naun nampatei kawan pigawian tenga daging, naun sagar welum. ¹⁴ Kawan ulun sa napimpin daya Roh Alatalla hanye yiru kawan Anak Alatalla. ¹⁵ Daya, naun puang narime roh walah lagi sa ngulah katakuten, kude naun haut narime Roh sa haut ngangkat naun jari kawan anak Alatalla, itetei Roh yiru takam tau nerau, "Amah, Amah!" ¹⁶ Roh yiru raerai sa basaksi sindrah andri roh takam amun takam na kawan anak Alatalla, ¹⁷ amun takam na anak, takam pada ahli waris, ahli waris Alatalla, sameh jari ahli waris andri Kristus; Amun takam tatuu uma mahanang baya Hanye, takam pada sagar namulia sasameh andri Hanye. Kawan anak Alatalla sagar narime kamuliaan. ¹⁸ Aku nganggap amun kawan kahanangen sa naingkam itati puang tau nabanding andri kamuliaan sa sagar nalalea ma takam. ¹⁹ Daya katuluh ciptaan tuu ngandrei nelang kasungu neu wayah kawan anak Alatalla nalalea. ²⁰ Daya katuluh ciptaan haut naampi tunduk ma kasia-siaan, puang manurut kabahumen raerai, kude manurut kabahumen Ni sa haut ngampi tunduk, atas dasar kaharapen, ²¹ nampan katuluh ciptaan pada sagar namerdekakan teka walah binasa nuju ma kemedekaan kawan anak Alatalla sa penu kamuliaan. ²² Takam karasa amun katuluh ciptaan sameh miumeh andri mahanang nganak hampe taati. ²³ Puang ekat yiru, takam rearaipun sa narime karunia Roh pada miumeh hang wuang atei takam, nelang ngandrei naangkat jari anak, hanye yiru newuh tenga takam. ²⁴ Daya, takam nasalamat hang wuang kaharapen. Kude, kaharapen sa iyuh dinung puang lagi kaharapen, daya hie sah baharap ala sa haut nadinungni? ²⁵ Kude amun takam baharap ala sa puang takam kadinung, himat takam ngandreini andri tuu. ²⁶ Kala yiru pada Roh sa ngarawah takam sa maleme; daya takam puang karasa kalaawe sapatutni takam lakudua, kude Roh raerai sa basyafaat ma takam andri kawan wusi sa puang paantuh daya takam. ²⁷ Balalu Hanye sa nyalidik atei kataru inun aheng Roh yiru, daya Hanye basyafaat ma kawan ulun barasis sasuai andri kabahumen Alatalla. ²⁸ Takam karasa amun katantuluh gawian yiru nampa jari pikaeh ma kawan ulun sa sinta andri Alatalla, hanye yiru here sa naherau sasuai andri ransana Alatalla. ²⁹ Here sa samula haut napidi daya-Ni, pada haut natantu teka awalni neu jari sarupa andri Anak-Ni, nampan Hanye jari sa palanungkai teka kawan pulaksanai sa rama. ³⁰ Here sa haut natantu labis dahulu, pada naherau-Ni; nelang here sa nehauni-Ni, pada nabenarkan-Ni; balalu here sa nabenarkan-Ni, pada na muliakan-Ni. Sinta Alatalla hang wuang Kristus Yesus. ³¹ Jari, inun sa sagar naeau da taka neu katuluh yina? Amun Alatalla hang pihak takam, hie sa heei nawan? ³² Hanye sa puang sayang Anak-Ni raerai, kude nyarah Hanye ma takam katuluh, angmaka mungkin Hanye puang ngami ala katuluhni ma takam? ³³ Hie sa sagar manggugat kawan ulun pidian Alatalla? Alatalalla sa mambenarkan here. ³⁴ Hie sa sagar ngami here hukuman? Yesus Kristus sa haut matei, likan sa haut nasamelum kamulek teka pampatei, maharung hang tuhi kawan Alatalla nampan basyafaat ma takam. ³⁵ Hie sa sagar misah takam teka sinta Alatalla? Inunkah kasusahen, atawa kakekean, atawa kahanangen, atawa kajuju, atawa paua, atawa bahaya, atawa pampatei? ³⁶ Ialah sa naan nasurat, "Daya gana Hanyu, kami naan hang wuang bahaya pampatei hapus andrau; Kami naanggap iyalah kawan babiri sa kai nasamalis." Mamur 44:22 ³⁷ Kude, hang wuang katuluhni yiru, takam labis teka kawan pemenang daya Hanye sa sinta takam. ³⁸ Daya aku parisaya amun lain pampatei atawa pamelum, lain jua kawan malekat atawa kawan pamarintah, lain jua kawan hal sa itati atawa sa handrian andrau, kakuasaan, ³⁹ puang jua sa naan hang amau atawa sa naan hang kapit, atawa isa ciptaan salainni, tau misah takam teka sinta Alatalla, sa naan hang wuang Yesus Kristus, Tuhan takam.