¹ Pulaksanai katuluh, inun naun puang karasa (aku iwara ma here sa kataru Hukum Taurat) amun Hukum Taurat bakuasa hang amau erang kaulun salawah ulun yiru welum? ² Daya yiru, erang kaulun wawei sa haut narangan taikat andri hukum ma daranganni salawah daranganni masih welum; kude amun daranganni matei, hanye bebas teka hukum panadarangan. ³ Jari, amun wawei yiru jari darangan upu lain salagi daranganni masih welum, hanye naantuh bazina, kude amun daranganni haut matei, hanye bebas teka hukum balalu hanye puang na antuh bazina amun kawin andri upu lain. ⁴ Daya gana yiru, puaksanaiku katuluh, naun pada haut matei teka Hukum Taurat itetei tenga Kristus nampan naun jari ampun ulun lain, hanye yiru Hanye sa haut nasamelum kamulek teka pampatei nampan takam tau jari wua sa bariran ma Alatalla. ⁵ Tawuk takam masih welum hang wuang kadagingan, hawa nafsu dusa sa timbul daya Hukum Taurat bagawi hang wuang tenga takam nampan jari wua pampatei. ⁶ Kude, itati takam haut na bebaskan teka Hukum Taurat, haut matei teka sa dahulu ngurung takam hampe takam itati tau malayani hang wuang pamelum wau manurut Roh, puang manurut hukum sa uhang sa nasurat. Dusa andri Hukum Taurat ⁷ Amun kala yiru, inun sa sagar naeau takam? Inunkah Hukum Taurat yiru dusa? Budas puang! Kabalikanni, aku puang sagar kataru dusa amun puang mitah Hukum Taurat, daya aku puang sagar karasa arati teka sini wat ulun lain amun Hukum Taurat puang kaeau, "Ada sini." ⁸ Kude, dusa ngalap kasampatan mitah parentah yeru nampan jari hene masam kasinien hang wuang ateiku; Daya amun mahi Hukum Taurat dusa sagar matei. ⁹ Sadi aku welum puang uweng Hukum Taurat, kude dami hukum yiru hawi, dusa jari welum balalu aku matei; ¹⁰ nelang parentah yiri, sa nabahum nampan ngami pamelum, justru ngami pampatei. ¹¹ Daya dusa ngalap kasampatan itetei hukum yiru nampan ngakal palus munu aku. ¹² Jari Hukum Taurat yiru barasis, balalu hukum yiru barasis, tuu nelang maeh ¹³ Amun kalahie, inunkah sa maeh yiru ngenei pampatei ma aku?Budas puang! Dusa sa ngenei pampatei hang wuang aku itetei inun sa maeh nampan patantarang amun dusa ru dusa, balalu mitah hukum yiru dusa lentah dinung. Pihual hang wuang diriku ¹⁴ Takam karasa amun Hukum Taurat ru basifat rohani, kude aku basifat jasmani, naari hang kapit dusa. ¹⁵ Daya aku puang kataru inun sa nakarajaku daya aku puang ngaraja inun sa na ahengku, malengkan aku ngaraja inun sa jari karigatenku. ¹⁶ Kude, amun aku ngaraja isa hal sa puang na ahengku, aku satuju amun Hukum Taurat yiru maeh. ¹⁷ Jari itati, puang lagi aku sa ngarajani, kude dusa sa welum hang wuang aku. ¹⁸ Daya, aku karasa amun mahi sunah isa hal sa maeh sa welum hang wuang aku, hanye yiru hang wuang kadaginganku, daya aheng yiru naan hang wuang tengaku, kude pakai ngaraja hal sa puang maeh. ¹⁹ Daya, aku puang ngaraja sa maeh sa na ahengku, kude aku ngaraja hal sa jahat, sa puang na ahengku! ²⁰ Jari, amun aku ngaraja hal sa puang na ahengku, yiru puang lagi aku sa ngarajani, kude dusa sa welum hang wuang aku. ²¹ Jari, sa habaku teka hukum yiti, hanye yiru: Hantek aku hamen ngaraja hal sa maeh, kajahatan pada naan baya aku. ²² Daya, aku katuju andri Hukum Alatalla sa hang wuang ateiku, ²³ kude aku kadinung hukum lain hang wuang tengaku sa bajuang nawan Hukum atei akalku balalu ngurung aku ma wuang hukum dusa sa naan hang wuang tengaku. ²⁴ Aku murunsia silaka! Hie sa sagar nyalamat aku teka tenga sa tau matei yiti? ²⁵ Syukur ma Alatalla itetei Tuhan takam, Kristus Yesus! ²⁶ Jari, andri akal ateiku, aku jari walah hukum Alatalla, kude andri tenga jasmaniku aku jari walah ma hukum dusa.