¹ Paulus, walah Yesus Kristus, sa naherau jari rasul nelang na pidi pakai iwara Kabar Maeh teka Alatalla; ² haut na janji daya Alatalla teka jaman sadi itetei kawan nabi-Ni hang wuang Surat Barasis, ³ neu Anak-Ni, manyu murunsia teka katurunan Dawid, ⁴ nelang bawilah tuu samula Anak Alatalla sa bakuasa itetei ambuanni teka penah ulun matei kala kabahumen Roh Barasis, hanye yiru Kristus Yesus, Tuhan takam. ⁵ Iteti Hanye, aku narime ahi lelo jari rasul ngendei katuluh bangsa puang Yahudi nampan parisaya nelang ngalut nuu, ⁶ tamasuk naun sa naherau nampan jari ulun wat Kristus Yesus. ⁷ Ma katuluh naun sa muneng hang Roma, sa nasinta Alatalla, nelang sa pada naherau nampan jari ulun sa barasis: Ahi lelo anri damai sejahtera ma naun naami Alatalla, ambah takam, anri Tuhan Yesus Kristus! Paulus hamen ganta jemaat hang Roma. ⁸ Samambatang aku basyukur ma Alatalla itetei Kristus Yesus neu naun katuluh daya haut tasiar kabar neu kaparisayaan naun ma litar dunia. ⁹ Daya Alatalla, sa nalayaniku anri katuluh atei neu nampe Kabar Maeh, jari saksiku amun aku saratang ngitung naun katuluhni; ¹⁰ hang wuang doaku, aku ilaku anri Alatalla nampan aku akhirni kaiyuh ganta naun. ¹¹ Aku tuu sindi panalu anri naun nampan aku tau ngami ahi lelo rohani neu ngampi kuat naun, ¹² hanye yiru nampan takam tau sasameh parisaya, kaparisayaanku kala yiru pada kaparisayaan naun. ¹³ Pulaksanai katuluh, aku hamen naun karasa amun aku haut papire kali ngaheng ganta naun, kude saratang naan eleh halanganni, nampan aku pada kaiyuh wasi'an teka penah naun sameh kala ma kawan ulun lain sa puang Yahudi ¹⁴ Aku naan kawajiban ma ulun Yunani anri ma ulun puang Yunani, ma ulun sa bapandidikan atawa sa puang bapandidikan. ¹⁵ Yiru sababni, aku hamen tatuu iwara Kabar Maeh ma naun sa muneng hang Roma. ¹⁶ Aku puang umangan iwara Kabar Maeh, daya Kabar Maeh yiru kakuaten Alatalla neu nyalamat katuluh ulun sa parisaya; samambatang ma kawan ulun Yahudi, udi hie ma kawan ulun Yunani. ¹⁷ Daya hang wuangni, kabanaran Alatalla nawara teka kaparisayaan ma kapisayaan, daya naan nasurat: "Ulun maeh sagar welum daya kapaisayaan." ¹⁸ Daya kasangiten Alatalla natantarang teka surga ma katuluh dosa anri kejahaten murunsia sa nahalang kabanaran anri kajahaten. ¹⁹ Daya yiru, inun sa rasa murunsia neu Alatalla haut bawilah rasa, daya Alatalla haut iwara yiru ma here. ²⁰ Teka Alatalla ngulah dunia, kawan sifat Alatalla sa puang dinung, hanye yiru kuasa-Ni sa kalalawah, haut tau napantaru itetei kawan hal sa haut naulah-Ni, mahi budas ulun sa tau nampik. ²¹ Kude biar murunsia kataru anri Alatalla, here puang mahormat Hanye yalah Alatalla atawa batarima kasih ma Hanye; Kabalikanni, pikiran here puang bariran nelang atei here sa budu haut jari maiyeng. ²² Here kaingkam dirini pintar, padahal here budu, ²³ here nganti kamuliaan Alatalla sa kalalawah anri kawan ampatung, kawan wurung, eha bapee epat atawa kawan eha sa ilansar. ²⁴ Daya yiru, Alatalla nyarah here ma kabahumen atei here sa murun nampan here nampalus kawan hal sa bere ma sasameh here. ²⁵ Daya gana here haut nganti kabanaran Alatalla anri sa palasu, likan saujud nelang nyambah banda ulahan murunsia, puang Alatalla sa nyanyari katuluh dunia sa natawat nahormat hampe kalalawahni. Amin! ²⁶ Daya yiru, Alatalla maladar murunsia ma kawan kabahumen here sa murun, kawan wawei ngaheng nganti hubungan sa patut anri hubungan sa puang patut. ²⁷ Kala yiru pada kawan upu, here nanan hubungan sa patut anri kawan wawei, malengkan bahubungan anri sasameh here; upu anri upu nampalus kawan gawian sa ngumangan; daya gana yiru here narime upa teka dosa here. ²⁸ Daya here puang kaingkam parlu mangakui Alatalla, balalu Alatalla maladar here ma kawan pikiran here sa murun nampan here ngaraja kawan hal sa puang maeh. ²⁹ atei here natampenu anri katuluh sa puang bujur, sa jahat, kasakahen, anri kamuaren, penu anri pikurun atei, munu ulun, babur, nipu nelang ngatei; here rajin maner ulun lain, ³⁰ nangkurun ngaran ulun lain, muar ma Alatalla, sakah, sombong, pangapusu, pandai ngantara sara wau nampalus kajahaten, puang taat ulun matueh, ³¹ lunga, puang satia, mahi ahi lelo nelang kejam. ³² Here karasa parentah Alatalla amun kawan ulun sa ngulah katuluhni patut nahukum matei, biar kala yiru tatap here nampalus hal yiru, likan katuju pada amun ulun lain nampalusni.