¹ Yesus bapaner lagi ma here andri kawan perumpamaan, eau-Ni, ² "Karajaan Surga iuh naumpamakan ialah erangkaulun raja sa ngulah pesta kawin ma anak upuni. ³ Balalu, hanye nunyu kawan pelayanni nampan nerau kawan ulun sa haut naundang ma pesta yiru, kude here puang hakun hawi. ⁴ Udi yiru, raja nunyu lagi kawan pelayanni sa lain, eauni, 'Eau ma here kawan ulun sa naundang, Dinung, aku haut manyiapkan kawan panguta. Kawan sapi upu andri kawan paliharaan sa sehat munuk katuluh haut nasamalis, katuluh ni haut sadia. Hawi ma pesta kawin na.' ⁵ Kude, here puang ngarasa balalu tulak, meheni ma ume, sa lain ma unenganni bagawi, ⁶ balalu sa lainni nyama kawan pelayan raja yiru, ngakasah, nelang munu here. ⁷ Dami karengei, raja sangit tatuu, balalu ngirim kawan tantarani, munu kawan tukang wunu yiru, balalu nutung tumpuk here. ⁸ Udi yiru, hanye kaeau ma kawan pelayanni, 'Pesta kawin haut siap, kude kawan ulun sa naundang yiru puang patut. ⁹ Daya yiru hulu naun ma kawan lalan rami balalu undang ulun rama pire sa hanyu panalu enei ma pesta kawi yina.' ¹⁰ Balalu, kawan pelayan yiru tulak ma kawan lalan balalu ngumpul katuluh ulun sa panalu here, inun sa maeh inun sa jahat. Balalu unengan kawin yiru penu andri kawan tamu. ¹¹ Kude, dami raja panalu andri kawan tamuni, hanye kadinung erangkaulun hang yaru, isa puang makai baju pesta kawin. ¹² Hanye kaeau ma hanye, 'Pulaksanai, kalaawe hanyu tau masuk ma yina puang makai pakaian pesta kawin?' Kude ulun yiru suni. ¹³ Balalu raja yiru kaeau ma kawan pelayanni, 'Huruk tangan andri peeni, tumuk hanye ma unengan sa paling maieng hang luar. Hang yaru, naan kiak andri tungkau nelang kahanangen.' ¹⁴ Daya, hene sa naherau, kude butit sa napidi." Usaha Pamimpin Yahudi nampan Manjabak Yesus ¹⁵ Udi yiru, kawan ulun Farisi tulak bagurayang nampan here tau manjabak Yesus makai kawan tuntian-Ni. ¹⁶ Balalu,here ngirim kawan murid here nadap Yesus, sindrah andri kawan ulun Herodian. Hee kaeau, "Guru, kami karasa bahwa Hanyu jujur nelang ngajar kabahumen Alatalla sa bujur. Hanyu puang takut ma hiepun daya Hanyu puang ngini wangun ulun. ¹⁷ Amun kalayiru, kaawe pendapat-Nu wara ma kami. Inun wuahkah mambayar pajak ma kaisar atau hala?'' ¹⁸ Kude, Yesus karasa pikiran jahat here balalu kaeau, "Inun ngulah naun kai manjabak Aku, u kawan ulun papura maeh? ¹⁹ Tantarang ma Aku duit pakai bayar pajak yiru," Balalu, here nyarah isa duit perak ma-Hanye. ²⁰ Balalu, Hanye nunti ma here, "Gamar andri tulisan hie sa yina?' ²¹ Here nyangai, "Kaisar."Udiyiru, Yesus kaeau ma here, "Daya yiru,bayar ma kaisar inun sa milik kaisar, bayar ma Alatalla inun sa milik Alatalla." ²² Dami karengei yiru here manam, balalu tulak nanan-Hanye. Usaha Ulun Saduki nampan Manjabak Yesus ²³ Hang andrau yiru pada, kawan ulun Saduki, sa kaeau puang uweng ulun matei welum kamulek, hawi nunung Yesus balalu nunti ma-Hanye. ²⁴ Here nunti, "Guru, Musa kaeau amun erangkaulun upu matei puang uweng anak, pulaksanaini sa upu harus narangan daranganni supaya nampalus katurunan ma pulaksanaini sa matei yiru. ²⁵ Taati, naan pitu kaulun kami ipulaksanai. Sa numur isa kawin, kude matei puang uweng anak, balalu nanan darangani ma pulaksanaini. ²⁶ Kalayiru pada sa numur rueh, sa katelu, hampe sa kapitu. ²⁷ Pajumpuhanni hingka katuluhni, wawei yiru pada matei. ²⁸ Hang andrau ulun matei welum kamulek,wawei yiru jari darangan hie hingka here bapitu ipulasanai yiru? Daya here katulus uras daranganni." ²⁹ Kude, Yesus nyangai here, " Naun hala tatuu, puang kataru isi Surat Barasis atawa kuasa Alatalla. ³⁰ Daya, hang andrau ulun matei welum kamulek, here puang uweng narangan atawa idarangan, kude ialah kawan malaekat hang surga. ³¹ Kude, mengenai kawan ulun matei welum kamulek, huan suah naun mambasa inun isa na eau Alatalla ma naun, ³² 'Aku Alatalla Abraham, Alatalla Ishak, andri Alatalla Yakub'? Hanye puang Alatalla ulun matei, kude Alatalla ulun sa welum." ³³ Dami ulun rama karengei hal yina, here suni manam arengei ajaran-Ni. HUkum Saawe sa Paling Penting? ³⁴ Kude, dami kawan ulun Farisi karengei Yesus haut ngulah kawan ulun Saduki puang kahaba harek lagi, balalu here bakumpul. ³⁵ Udi yiru,erangkaulun hingka here, erangkaulun ahli Hukum Taurat, nunti ma Yesus pakai manjabak Hanye, ³⁶ "Guru, parintah sa awe sa paling penting hang wuang Hukum Taurat?" ³⁷ Balalu, Yesus nyangai hanye, "Hanyu harus sinta ma Tuhan Alatallanu andri sagalis ateinu, andri sagalis amiruenu, anri katuluh akal pikirannu. ³⁸ Ina parintah sa paling hante andri paling penting. ³⁹ Isa karueh sameh pada, 'Hanyu harus sinta sasameh murunsia ialah tenganu raerai.' ⁴⁰ Hang wuang karueh parintah yina, asal katuluh Hukum Taurat andri kitab kawan nabi," Tuntian neu Raja Panyalamat ⁴¹ Taati, ganyah kawan ulun Farisi sasameh bakumpul, Yesus nunti ma here, ⁴² "Kalaawe pendapat naun neu Kristus? Anak hiekah Hanye?" Here nyangai ma-Hanye, "Anak Dawid." ⁴³ Hanye kaeau ma here, "Amun kalayiru, kalaawekah Dawid, hangwuang Roh,nerau-Hanye 'Tuan', eauni, ⁴⁴ 'Tuhan kaeau ma Tuanku, "Maharung hang tuhi kawan-Ku, hampe Aku ngulah kawan musuh-Nu manyarah talau ma Hanyu.' Mazmur 110:1 ⁴⁵ Jari amun hi Dawid nerau Kristus yiru 'Tuan', kalaawe Hanye tau anak Dawid?" ⁴⁶ Puang sunah erangkaulun sa kaiyuh nyangai ma-Hanye. Maka, mulai andrau yiru, puang uweng ulun sa heei nunti inun-inun lagi ma-Hanye.