¹ Kitab silsilah Yesus Kristus, anak hi Dawid, anak hi Abraham. ² Hi Abraham ambah hi Ishak, Hi Ishak ambah hi Yakub. Hi Yakub ambah hi Yehuda anri kawan pulaksanaini. ³ Hi Yehuda ambah hi Peres anri hi Zerah, ineh here ru hi Tamar. Hi Peres ambah hi Hezron. Hi Hezron ambah hi Ram. ⁴ Hi Ram ambah hi Aminadab. Hi Aminadab ambah hi Nahason. Hi Nahason ambah hi Salmon. ⁵ Hi Salmon ambah hi Boas, inehni hi Rahab. Hi Boas amah hi Obed, inehni hi Rut. Hi Obed amah hi Isai. ⁶ Hi Isai amah teka Raja Dawid. Hi Dawid amah hi Salomo, inehni bakas darangan hi Uria. ⁷ Hi Salomo ambah hi Rehabeam. Hi Rehabeam ambah hi Abia. Hi Abia ambah hi Asa. ⁸ Hi Asa ambah hi Yosafat. Hi Yosafat ambah hi Yoram. Hi Yoram ambah hi Uzia. ⁹ Hi Uzia ambah hi Yotam. Hi Yotam ambah hi Ahas. Hi Ahas ambah hi Hizkia. ¹⁰ Hi Hizkia ambah hi Manasye. Hi Manasye ambah hi Amon. Hi Amon ambah hi Yosia. ¹¹ Hi Yosia ambah hi Yekhonya anri kawan pulaksanaini, hantek here naumpe ma Babel. ¹² Udi here naumpe ma Babel, hi Yekhonya ambah hi Sealtiel. Hi Sealtiel ambah hi Zerubabel. ¹³ Hi Zerubabel ambah hi Abihud. Hi Abihud ambah hi Elyakim. Hi Elyakim ambah hi Azor. ¹⁴ Hi Azor ambah hi Zadok. Hi Zadok ambah hi Akhim. Hi Akhim ambah hi Eliud. ¹⁵ Hi Eliud ambah hi Eleazar. Hi Eleazar ambah hi Matan. Hi Matan ambah hi Yakub. ¹⁶ Hi Yakub ambah hi Yosep, darangan hi Maria. Hingka hi Maria ngayaan Yesus, sa naantuh Kristus. ¹⁷ Jari, katuluh turunan teka hi Abraham hampe hi Dawid naan epatwalas turunan, balalu teka hi Dawid hampe naumpe ma Babel naan epatwalas turunan, udi hie teka naumpe ma Babel hampe Kristus naan epatwalas turunan. Nakayaan Yesus Kristus ¹⁸ Kalayiti saritani neu Kristus Yesus nakayaan. Hantek hi Maria, ineh-Ni batunangan anri hi Yusef, sa huan here idarangan, hanye haut mihawuntung teka Roh Alatalla. ¹⁹ Kude, daya hi Yusef, darangan ni yiru, ulun sa mawitu bujur anri puang hakun ngampi umangan hi Maria hang penah ulun rama, Hi Yusef ngaheng nyamitus hi Maria suni suni. ²⁰ Kude, tawuk hi Yusef rahat mamikir hal yiru, malekat Tuhan hawi ma hanye hang wuang upi balalu bapaner ma hanye, "Yusef, anak Dawid, ada hanyu takut ngalap hi Maria jari darangannu daya Iya sa naan hang wuang wuntung ni yiru teka Roh Alatalla. ²¹ Hanye sagar ngayaan erang kaulun Iya upu balalu hanyu sagar ngampu ngaran-Ni Yesus daya Hanye sagar nyalamat ulun pidian-Ni teka dusa here." ²² Katuluhni jari kala yiru nampan tulus inun sa nawara daya Tuhan itetei nabi-Ni ²³ "Dinung, erang kaulun wawei bujang paruna sagar mihawuntung balalu sagar ngayaan erang kaulun iya upu. Here sagar ngampungaran-Ni Imanuel, "sa arati ni: "Alatalla naan baya takam". ²⁴ Dami hi Yusef kaelan, hanye nampalus inun sa na parentah malekat Tuhan ma hanye, hanye ngalap hi Maria jari daranganni, ²⁵ kude puang mira andre andri hi Maria hampe hanye ngayaan Iyani yiru. Balalu hi Yusef ngampungaran-Ni, Yesus.