¹ Udi Yesus luput nampe katuluh paner-Ni hang hadapan ulun rama, Hanye masuk ma Kapernaum ² Hang yaru, naan erang kaulun Parwira Roma sa baisi walah sa na haragani. Walah ru rahat mekum bunyuk anri kai matei. ³ Hantek parwira ru karengei neu Yesus, Hanye nugas papire kawan tueh Yahudi manalu Yesus laku Hanye hawi lepuh nyamare walahni yeru." ⁴ Wayah kawan ulun ru hawi ma Yesus, here tuu-tuu laku ma Hanye. Eau here, "Ulun yena patut kaiyuh karawahen-Nu, ⁵ dagana hanye sinta anri bangsa takam nelang hanye pada sa ngamuan sinagoge ma takam." ⁶ Tulak Yesus sinrah here. Hantek Hanye haut riet ma lewu prawira yeru, prawira yeru nugas papire hengauni pakai paner ma Yesus, "Tuan, ada Hanyu nyusah tenga ma aku dagana aku puang patut narime Hanyu hang lewuku. ⁷ Yeru sababni, aku ampun tenga kainam puang pas lepuh hawi nunung Hanyu. Kude, panerleh erang kawusi ai, maka walahku pasti ubuh. ⁸ Dagana, aku pada erang kaulun sa tunduk anri sa hang amau tapi aku pada negei kawan parajurit. Amun aku ngantuh ma parajurit, 'Hulu!', hanye balalu tulak. amun aku ngantuh ma parajurit sa lain, 'Ma yati!' hanye palus hawi. Anri, amun aku ngantuh ma walahku, 'Karaja nu yiti', walahku pada sagar ngulahni. ⁹ Hantek Yesus karengei yeru, Hanye wauh ma prawira Roma yeru. Nelang ikulik ma ulun rama sa uma Hanye, Hanye maharek, "Aku iwara ma hanyu, malah hang penah ulun Israel pada Aku huan suah panalu hante ni iman ulun kalayena. ¹⁰ Hantek utusan sa nahuyu nadap Yesus mulek ma lewu prawira, here kaindi walahni haut ubuh. ¹¹ Ma kaayatunini, Yesus baya kawan murid-Ni tulak ma isa tumpuk bangaran Nain anri wahai rumbungan ngapung Hanye. ¹² Hantek Hanye rupak gerbang watas tumpuk, naan bangkai ulun upu na endei ma luar. Ulun sa matei yeru anak tungkan wawei walu. Anri, hene ulun teka tumpuk ru naharak wawei yeru. ¹³ Hantek Tuhan kaindi wawei yeru, Tuhan piahi ma hanye palus paner, "Ada nungkau." ¹⁴ Balalu, Hanye nyanriet anri nyame tandu bangkai yeru. Kawan ulun sa ngantung tandu yeru tariye. Balalu, Yesus maharek, "Ui anak muda, Aku ngantuh ma hanyu kaelanleh!" ¹⁵ Udiyeru, ulun sa huni matei yeru maharung nelang paner. Balalu, Yesus langsung nyarah hanye ma inehni. ¹⁶ Katuluh ulun sa kaindi kajadian yeru uras takut balalu nawat Alatalla, "Erang kaulun nabi hante haut hawi hang penah takam!" anri "Alatalla haut nunung umat-Ni." ¹⁷ Anri, kabar neu Hanye tasiar ma katuluh Yudea anri ma katuluh unengan lain hang litar yeru. ¹⁸ Kawan murid Yohanes Pambaptis iwara ma Yohanes neu katuluh kajadian yeru. ¹⁹ Balalu, Yohanes nerau rueh kaulun murid-Ni anri ngutus here nunung Tuhan lepuh itunti, " Inun Hanyusah sa sagar hawi yeru?" Atawa, inunsah kami tatap nganrei sa lain. ²⁰ Hantek here hawi ma Yesus, here balalu paner, "Yohanes Pambaptis nunyu kami nunung Hanyu lepuh nunti, " Inun Hanyusah sa sagar hawi yiru? Atawa, kami tatap nganrei sa lain?" ²¹ Hang wayah yiru, Yesus rahat nyamare rama ulun anri hene masam panyakit, sampar, anri kawan ruh jahat. Hanye pada ngami karunia paninungan ma rama ulun pehe. ²² Eau Yesus ma ulun Rueh yeru, "Hulu anri kesahleh ma Yohanes neu inun sa haut tantau naun anri rengei : ulun pehe tau kadinung, ulun lumpuh tau takiya, ulun sa wuah kudung haut ware barasih, ulun marengen haut tau karengei, ulun matei tau welum mulek, anri ma kawan ulun pauwa na tahampe kabar salamat. ²³ Dagana yeru, araimihewuleh hanye sa puang tasandung daya-Ku." ²⁴ Udi kawan utusan Yohanes tulak, Yesus paner ma ulun rama neu Yohanes, "Kai nantau inunsah hanyu tulak ma padang haket? Ngindi paring sa nasiwui barat? ²⁵ Tapi, inun sa tantau nu? Ulun sa ba pama maeh? Indileh, ulun sa ba pama maeh anri welum hang wuang panatau ekat naan hang istana raja. ²⁶ Jari, inun sa na indi nu? Erang kaulun nabi? Hiai, Aku iwara ma hanyu, Malahan labis teka erang kaulun nabi. ²⁷ Hanyeleh ulunni, sa neu hanye naan tasurat: ' Rengeileh! Aku nunyu utusan-Ku badahulu teka Hanyu. Hanyeleh sa sagar manyiap lalan hang hadapan-Nu.' Maleakhi 3:1 ²⁸ Aku iwara ma hanyu, teka katuluh naun sa Susan nakayaan daya waweian, mahi isa jua sa labis hante teka Yohanes. Kude, sa paling rumis wuang karajaan Alatalla, labis hante teka hanye." ²⁹ Hantek ulun rama anri panagis pajak karengei sual yena, here uras mangakui kaadilan Alatalla daya here haut na ampanrus Yohanes. ³⁰ Kude yeru, kawan ulun Farisi anri kawan ahli Taurat puang narime aheng Alatalla ma tenga here daya here huan na ampanrus Yohanes. ³¹ "Anri inunkah Aku ngami rarapisan kawan ulun sa welum hang angkatan yena? Iyalah inunsah here yeru? ³² Here iyalah kawan anak sa duka-dukang maharung hang pasar, sa pananterau sameh here, 'Kami ngampeau suling ma hanyu tapi hanyu puang baegal. Kami nyiang lengan hanang atei, tapi hanyu puang nungkau.' ³³ Dagana, hantek Yohanes Pambaptis hawi anri puang nguta rute atawa nguut angur, hanyu maharek, 'Hanye karasukan setan.' ³⁴ Kude, hantek Anak Murunsia hawi kuman anri nguut, hanyu maharek, 'Tantauleh! Hanye ulun sa rakus anri panguut! Hanye jua hengau kawan panagis pajak anri kawan ulun badusa!' ³⁵ Kude yeru, kaharatien na tamujur daya kawan anakni." ³⁶ Hang isa wayah, naan erang kaulun teka kalumpuk Farisi sa ngenei Yesus kuman baya hanye. Yesus tulak ma lewu ulun Farisi yeru maharung kuman. ³⁷ Hang tumpuk yeru, naan erang kaulun wawei badusa. Hantek hanye karasa Yesus rahat kuman hang lewu ulun Farisi yeru, hanye balalu midi bakam pualam sa isini ilau harum. ³⁸ Balalu, hanye minri hang wading Yesus, riet pee-Ni, ngiak nelang mui pee Yesus anri riu mateni balalu muhut anri wuluni. Udiyeru, hanye nyiuk pee Yesus nyiram anri ilau harum. ³⁹ Hantek ulun Farisi sa ngenei kuman Yesus kaindi kajadian yena, hanye paner hang kunuan, "Amun ulun yena erang kaulun nabi, Hanye batantu karasa wawei masam awe sa haut pahangku Hanye yeru dagana wawei yena erang kaulun pangulah dusa." ⁴⁰ Palus Yesus kaeau, "Simon, naan sa kai nawaraKu ma hanyu." Waraleh, Guru." Eau Simon. ⁴¹ Eau Yesus, " Naan rueh kaulun bahutang anri ulun paihau duit, sa isa bahutang dimejatuh duit perak sa isani lagi bahutang dimempulu duit perak. ⁴² Hantek here rueh puang sangup ngampudi duit ru, ulun sa paihau duit ru mahapus utang here rueh. Taati, hiye sah teka here rueh ru sa sagar sinta anri ulun paihau duit ru?" ⁴³ Eau Simon, "ulun sa panga wahai na impas utangni." Yesus maharek ma hanye, "Bujur eaunu." ⁴⁴ Nelang bapaling ma wawei yeru, Yesus paner ma Simon, "Inunsah hanyu kaindi wawei yena? Hantek Aku hawi ma lewunu, hanyu puang ngami ranu pakai mui pee-Ku, tapi hanye mui pee-ku anri riu mateni anri muhutni anri wuluni. ⁴⁵ Hanyu puang nyamut Aku anri siukan, tapi wawei yena puang taduh nyiuk pee-Ku teka Aku masuk. ⁴⁶ Hanyu puang nyamehu ulu-Ku anri ilau, tapi hanye nalui ilau sa marauh enguhni ma pee-Ku. ⁴⁷ Dagana yeru, Aku iwara ma hanyu, dusani sa rama yeru haut naampuni daya hanye haut nantarang sinta sa hante. Kude, ulun sa dutit na ampuni, dutit pada sintani." ⁴⁸ Balalu Yesus paner ma wawei yeru, " Dusanu haut na ampuni." ⁴⁹ Kawan ulun rama sa maharung kuman baya Yesus kaeau hang kunuan atei here, "Hiyesah Ulun yena hampe tau ngampun dusa?" ⁵⁰ Yesus paner ma wawei yeru, " Imannu haut nyalamat hanyu, tulak leh anri damai."