¹ Kawan pulaksanaiku, ada nyantarang imannu wuang Tuhan takam sa mulia, Yesus Kristus, anri ngabeda-beda ulun. ² Dami naan ulun sa hawi ma gerejanu makai sinsin amas anri lama sa larang, balalu hantek yiru pada hawi jua ulun miskin bapama sa bere tuu, ³ balalu hanyu ngami perhatian khusus ma ulun sa balama larang yiru balalu kaeau mahanye, "Hulu maharung hang uneng sa maeh iri," kude ma ulun sa miskin yiru hanyu kaeau, "Minrileh hang yeru!" atawa "Harung hang riet peeku ti!" ⁴ Baarti hanyu haut membedakan hang helang hanyu anri haut jari hakim anri pikiran-pikirannu sa raat? ⁵ Kawan pulaksanai sa kusinta, sanrengei! Puangsah Alatalla haut midi ulun sa miskin hang mate dunia pakai nyanjari sugih wuang iman anri ngawaris kerajaan Alatalla sa na Hanye janyi ma here sa sinta Hanye? ⁶ Kude, hanyu haut ngahina ulun miskin. Puangsah ulun tatau sa rama ngulah rara anri ngadu nu himpan na adili? ⁷ Angsah here sa gaha ngasese gawian maehnu, sa haut napidi daya panggilanu? ⁸ Dami hanyu ngunu hukum sa utama kala sa naeau Kitab Suci, "Nakalelo sasamehnu murunsia ialah ngalelo tenganu raerai," baarti hanyu haut ngulah gawian sa bujur. ⁹ Kude, dami hanyu ngampibeda ulun, hanyu ngulah dosa nelang nyata haut ngalangar hukum. ¹⁰ Hie sa ngunu katuluh hukum, kude puang ngunu isa ai hingka hukum yiru, hanye haut hala ma katuluh hukum yiru. ¹¹ Daya, Hanye haut kaeau, "Ada berzina, " pada kaeau, "Ada munu." Jari, dami hanyu puang ngulah perzinahan, kude hanyu munu, hanyu haut jari ulun sa ngalanggar hukum yiru. ¹² Bapaner anri ngulah gawian kala sameh Kawan ulun sa sagar nahakimi anri hukum sa membebaskan. ¹³ Daya, penghakiman puang sagar maahi ma ulun sa puang tau nutui walas ahi; walas ahi sagar manang hingka penghakiman. Iman Puang Nalaksakan ialah Matei ¹⁴ Kawan pulaksanaiku, inun diranni isakaulun kaeau bahwa hanye naan iman, kude hanye puang ngagawini? Iyuhlah iman yiru nyalamat pamelum ni? ¹⁵ Dami naan Kawan pulaksanai upu atawa wawei sa mahi pama anri mahi pakai na kuta, ¹⁶ balalu naan isakaulun hang helang hanyu kaeau mahanye, "Mahululeh wuang damai, bahara tenganu puang marisak anri puang kalauan," kude hanyu puang ngami hanye inun sa naperlukan hanye, inun diranni yiru? ¹⁷ Kalahie pada iman, dami iman puang nairing hang wuang sanaulah, pada dasarni iman yiru matei. ¹⁸ Kude, dami gere naan ulun sa kaeau, "Witu hanyu naan iman, anri witu aku naan perbuatan." Aku sagar nyangai, "Tutui imannu sa mahi hanyu ulah, balalu aku sagar nutui imanku baya inun sa kuulah." ¹⁹ Hanyu parisaya bahwa Alatalla yiru isa. Yiru bujur. Roh-roh raat pada parisaya anri here neter. ²⁰ Hi ulun sa lunga! Hakunsah hanyu manyadari bahwa iman sa puang na iring anri sa naulah tuu puang badiran? ²¹ Puangsah hi Abraham, Amah takam, nabenarkan daya inun sanaulahni hantek hanye mangurbankan hi Ishak, anakni, hang entu altar? ²² Dinung bahwa iman yiru bagawi nairing anri inun sanaulahni, lman jari sempurna. ²³ Naganapi haut inun sa naeau Kitab Suci, "Hi Abraham parisaya ma Alatalla, balalu yiru nahitung mahanye sebagai kebenaran, " balalu hanye naherau "Hengau Alatalla". ²⁴ Jari, hanyu kadinung bahwa teka inun sanaulahni ulun nabenarkan, puang teka imanni ai. ²⁵ Kalayiru pada, puangsah hi Rahab, hi lahung yiru, nabenarkan daya inun sanaulahni hantek hanye narime tukang salidik Israel balalu ngarawah here nempat mitah lalan lain? ²⁶ Jari, sameh kala tenga mahi roh adalah matei, kalayiru pada iman dami puang na iring anri inun sanaulah adalah matei.