¹ Sabab, Melkisedek, Raja Salem pada imam Alatalla Sa Palingamau, manalu Abraham udi Abraham mulek hingka munu kawan raja, balalu memberkatini. ² Ma hi Melkisedek, Abraham pada ngami isapersepulih hingka katuluh harata rampasan sa iuhanni. Awalni, ngaran Melkisedek baarti ''Raja Kawuahen'', udiyiru, ''Raja Salem'' sa aratini ''raja damai''. ³ Hanye puang ba amah pada ba ineh, puang uweng silsilah, pada welumni puang uweng awal pada akhir. Kude, ialah Anak Alatalla, hanye sagar jari imam ma kalalawahni. ⁴ Dinung, tuu agungni ulun yina, hampe Abraham leluhur takam pun ngami mahanye isapersapuluh tika kawan hasil rampasan perangni. ⁵ Manurut Hukum Taurat, kawan anak Lewi sa narime jabatan imam sabahak ngumpul perpuluhan hingka umat sa kawan pulaksanai here, biarpun here sameh katurunan Abraham. ⁶ Kude, Melkisedek sa puang hingka turunan Lewi, narime isapersapuluh hingka Abraham pada memberkati hanye sa negei janji Alatalla. ⁷ Pada, puang iuh nasangkal, sa labih ime na berkati daya sa labih amau. ⁸ Hawuang isa hal, isapersapuluh na tarime daya murunsia fana sa tau matei. Kude, hawuang hal yina, natarime daya ni, sa pasti welum. ⁹ Daya yiru, iyuh na antuh bahwa bahkan kaum Lewi sa bahak narime isapersapuluh pun pada bayar isapersapuluh here mitah Abraham, ¹⁰ Sabab saat Melkisedek manalu hanye, Lewi masih naan hawuang tenga datu nini ni. ¹¹ Taati, seandaini kesempurnaan tau na kaiuh mitah keimamam Lewi (sa daya hanye, umat Israel kaiyuh Hukum Taurat), pakai inun naan imam lain sa harus naamuan menurut aturan Melkisedek, sa puang imam hingka garis katurunan Harun? ¹² Sabab, amun aturan keimaman baubah, maka Hukum Taurat pun harus naubah. ¹³ Ulun sa ganyah napaner takam yina baasal hingka suku sa lain, pada puang uweng erangkaulun pun hingka suku-Ni sa suah batugas jari pelayan altar. ¹⁴ Sabab, haut jelas bahwa Tuhan takam baasal hingka suku Yehuda, suku sa neuni Musa puang suah ngantuh hal inun pun sa bakaitan andri kawan imam. Yesus Adalah Imam ialah Melkisedek ¹⁵ Katuluh hal yina jari magin tarang dami takam kadinung huletni erangkaulun Imam lain, sa mirip andri Melkisedek, ¹⁶ sa jari imam puang badasar syarat katurunan jasmani, kude badasarkan kuasa pamelum sa puang tau binasa. ¹⁷ Sabab, Kitab Suci basaksi neu Hanye: "Hanyu adalah Imam ma kalalawahni, manurut peraturan Melkisedek." ¹⁸ Hang isa sisi, peraturan sa lawah haut puang napakai lagi daya naan kelemahan isa puang baguna, ¹⁹ daya hukum yiru puang nangkaeh inun pun. Kude, hang sisi sa lain , naan pengharapan sa labih maeh sa naampitaru ma takam, pada pengharapan yiru narik takam nampan nyanriet ma Alatalla. ²⁰ Daya pengharapan yiru na enei ma takam andri isa sumpah--imam sa lain jari imam puang nasindrah andri sumpah. ²¹ Kude, Hanye jari Imam andri sumpah sa naulah daya Ni sa kaeau ma-Hanye, ''Tuhan haut basumpah dan Hanye puang akan baubah pikiran: 'Hanyu adalah Imam hampe kalalawahni.''' Mazmur 110:4 ²² Daya sumpah yina, Yesus haut jari jaminan hingka perjanjian sa labih maeh. ²³ Sahuanni, naan hene imam dami naan imam sa matei, naan sa iuh ngantini. ²⁴ Kude Yesus negei keimaman secara tetap hampe kalalawah daya Hanye sagar welum tarus hampe kalalawah. ²⁵ Andri kalayiru, Yesus kaiuh nyalamat andri sempurna here sa hawi ma Alatalla mitah-Hanye, daya Hanye welum nampan lakudua ma here. ²⁶ Imam Hante ialah yiru sa takam perlu, hanyeyiru imam hante sa kudus, puang bacela, murni, napisah hingka kawan ulun badosa, pada naampamau labih hingka tingkat surgawi. ²⁷ Yesus puang ialah kawan imam hante sa lain. Here harus mempersembahkan parapah tiap andrau, kaisa ma dosa here raerai, udiyiru ma dosa kawan umat. Kude, Yesus puang perlu ngulahni. Hanye ekat mempersembahkan parapah hindra ma kalalawah, hanyeyiru tenga-Ni raerai. ²⁸ Hukum Musa menetapkan murunsia sa penu kelemahan pakai jari kawan imam hante. Kude, sumpah sa baasal hingka Alatalla, sa hawi udi Hukum Musa, menetapkan Anak-Ni, sa haut jari sempurna hampe kalalawah ni.