¹ Epat walas taun udiyiru, aku mulek lagi ma tumpuk Yerusalem andri hi Barnabas nelang ngenei hi Titus baya aku. ² Aku tulak daya naan papaneran nelang neu iwara ma here Kabar Maeh sanatahampe ku penah kawan ulun puang Yahudi. kude aku nahampeni hang wuang pikumpulan paribadi, hanye yiru ekat andri here sa bapangaruh neu mamasti kan amun inun sa nakaraja dayaku andri sa haut na karaja dayaku puang kawai tuu eleh. ³ Hi Titus, sa baya aku, puang harus nasunat biarpun hanye erang kaulun Yunani. ⁴ samula naan ulun na nasak hingka here sapapura iyalah ipulaksanai sa suni-suni masuk himpan nyalidik kabebasan sa naan hang takam daya takam ibaya andri Kristus Yesus. Himpan takam naenei mulek jari walah. ⁵ Kude, kami puang hakun manyarah mahere erang itus pun himpan kabanaran Kabar Maeh tatap muneng hang wuang naun. ⁶ kude, hingka kawan ulun sa bapangaruh yiru, sa kedudukanni puang penting maaku daya Alahtalla puang mambedakan, here puang namah inun-inun maaku. ⁷ Kabalikanni, here kadinung amun maaku haut naparisaya Kabar Maeh ma kawan ulun sa puang basunat, semeh kala hi Petrus na parisayakan Kabar Maeh ma kawan ulun sabasunat. ⁸ Daya, Hanye sa haut bagawi mitah hi Petrus neu jari rasul ma kawan ulun sabasunat, Hanye pada sa bagawi mitah aku neu jari rasul ma kawan ulun sapuang Yahudi. ⁹ Dami hi Yakobus, hi Petrus andri hi Yohanes, sa naini here jari soko guru ma jemaat manyadari pangamiaan sanaami maaku, here ngami tangan kawan pikumpulan ma hi Barnabas andri ma aku himpan kami tulak ma kawan ulun sapuang Yahudi, sadangkan here tulak ma kawan ulun sabasunat. ¹⁰ Here ekat ilaku kami himpan kaitung ma kawan ulun pau'a, isa hal sa aku raerai tuu basa samangat neu ngarajani. HI PAULUS IWARA KAHALAEN PETRUS ¹¹ Kude , hantek hi Kefas hawi ma tumpuk Antiokhia, aku tarus tarang puang satuju daya jelas haye tatuu hanye bahala. ¹² Daya sahuan kawan ulun tertentu hingka hi Yakobus hawi, hi Kefas haut suah kuman sindrah kawan ulun puang Yahudi. Kude, hintek here hawi, hanye mulai ikeseh nelang nyanawit tengani daya takut andri kalompok ulun sa basunat. ¹³ Kawan ulun Yahudi salain uma-umaan batindak munafik sindrah andri hanye, hampe hi Barnabas pada tapangaruh daya kalakuan here. ¹⁴ Hantek aku kadinung amun here batindak puang sajalan andri kabanaran Kabar Maeh, balalu aku kaeau ma hi Kefas hang hadapan katuluh ulun, "Amun hanyu ulun Yahudi welum kala puang ulun Yahudi, kalaawe mungkin hanyu mamaksa ulun puang Yahudi neu welum iyalah ulun Yahudi?" ¹⁵ Takam na kawan ulun sa nakayaan sebagai ulun bangsa Yahudi nelang puang kawan ulun sa badusa hingka bangsa sa puang Yahudi. ¹⁶ Kude, takam karasa amun puang erang kaulun pun sabujur daya ngaraja Hukum Taurat, malengkan mitah iman hangwuang Yesus Kristus. Labih likan , takam pada haut parisaya ma Yesus Kristus himpan takam bujur daya iman hang wuang Kristus, puang dayangaraja hukum Taurat. Daya puang erang kaulun pun bujur daya ngaraja Hukum Taurat! ¹⁷ Kude, hantek takam bausaha neu nabenarkan hangwuang Kristus, takam kahaba tenga takampada ngulah dusa, inunkah baarti Kristus yiru walah dusa? Batantu tuu puang! ¹⁸ Amun aku ngamuan lagi inun sahaut santumang , aku mambukti amun aku hanye yeru erang kaulun samalangar hukum. ¹⁹ Sabab, mitah Hukum Taurat, aku haut matei ma Hukum Taurat nampan aku tau welum neu Alahtalla. ²⁰ Aku haut nasalibkan andri Kristus. puang lagi aku sa welum, malengkan Kristus sa welum hang wuang aku. Welum sa taati yiti aku hang wuang daging hanye yiru welum daya iman hang wuang Anak Alatalla, sa sinta aku nelang haut ngami tenga-Ni ma aku. ²¹ Aku puang mambatalkan pangamiaan Alatalla daya amun kebenaran hawi mitah Hukum Taurat, kawai tuu eleh pampatei Kristus!