Paulus hang Pulau Malta ¹ Udi kami nangkah pulau yeru, aru ai kami karasa bahwa pulau yeru na antuh Malta. ² Ulun asli pulau yeru atei ni maeh tu'U. Balalu, here ngapandruk apui pakai nyamut kami katuluh ni deya hantek yeru andrau ka'i uran nelang hawa ni marisak tu'U. ³ Rahat hi Paulus ngutik kakau sa rumis balalu nganak ni hang amau apui, salenga naan anipe balua daya kalaingan balalu malilit tangan hi Paulus. ⁴ Dami ulun asli pulau yeru nantau anipe babisa bagantung hang tangan hi Petrus, here kaeau isa andri sa lain, "Haut puang naragukan lagi, ulun yena ialah tukang munu. Biar hanye haut salamat hingka laut, ternyata kaadilan puang ngunu hanye welum." ⁵ Kude hi Paulus ngibas satua yeru ma huang apui nelang hanye puang rara atawa batan inun-inun. ⁶ Kawan ulun hang yeru haut mangira hi Paulus ka'i bakah atau lawu balalu matei hantek yeru jua. Salenga, udi here lawah ngandrei andri puang ninung kajadian sa hala ma hanye, aruai here baubah pikiran nelang kaeau bahwa Paulus na ialah dewa. ⁷ Suatu katika, hang alam yeru, naan tane ampun pamimpin pulau yeru sa bangaran Publisius, sa nyamut kami andri ngamik kami kuman salawah telu andrau. ⁸ Hantek yeru, pas amah hi Publisius rahat mangkading hang uneng ni mandre daya mekum andre disentri. Paulus hawi nyuwuk hanye ilaku doa, balalu nganak tangan ni ma amau ulun yeru palus nampi ware hanye. ⁹ Udi kajadian yeru, katuluh ulun hang pulau yeru sa sakit pada hawi nunung hi Paulus sahingga ware. ¹⁰ Here pada magin menghormati kami andri dami kami ka'i balayar, here manyadiakan katuluh sa kami perlukan. Paulus Manuju Kota Roma ¹¹ Udi telu wulan, kami balayar hang wuang kapal hingka Aleksandria, sa balabuh hang pulau yeru salawah musim marisak nelang makai Dioskuri jari lambang ni. ¹² Udi kami hawi hang Sirakua, kami muneng hang yaru salawah telu andrau. ¹³ Hingka Yeru, kami balayar mitah iring pantai balalu hampe hang Regium. Keuni ni, riwut selatan batiup, balalu andrau keuni ni lagi, kami hampe hang Putioli. ¹⁴ Hang yaru, kami nunung kawan pulaksanai isa iman balalu na unang neu muneng baya here salawah pitu andrau. Balalu, kami tulak ma Roma. ¹⁵ Andri kawan pulaksanai isa iman hang yaru, dami karengei hal kami, hawi hingka yaru hampe ma Forum Apius andri Tres Taberne neu nunung kami. Rahat Paulus nantau here, hanye basyukur ma Alatalla andri atei ni na kuatkan. Paulus Hang Kota Roma ¹⁶ Dami kami hampe hang Roma, Paulus na huyu muneng re erai, baya isa prajurit sa mangawal ni. ¹⁷ Telu andrau udi yeru, Paulus mangumpulkan kawan pemimpin Yahudi hang yeru, balalu udi here bakumpul, hanye kaeau ma here, " Kawan pulaksanai, biar aku puang ngulah inun-inun pakai nawan bangsa takam atawa adat istiadat nini moyang takam, kude aku nasarah ialah ulun tahanan hingka Yerusalem ma tangan kawan ulun Roma. ¹⁸ Rahat here haut mamariksa aku, here ka'i napas aku daya pa ueng alasan pakai nahukum matei aku. ¹⁹ Kude yeru, daya kawan ulun Yahudi kawe'atan, aku tapaksa mamai banding ma Kaisar, puang baarti aku naan dawaan pakai nawan bangsaku. ²⁰ Jari, yeru lah ngulah ni, aku haut laku neu ninung hanyu andri bapaner ma hanyu daya aku nahuruk nelang narantai demi pangharapen Israel." ²¹ Balalu, here kaeau ma Paulus, "Kami puang narime surat hal nu hingka Yudea andri puang sa isa pun hingka kawan pulaksanai isa iman sa hawi mayena neu ngami habar atawa iwara sa puang maeh hal hanyu. ²² Ekat, kami ka'i nyandrengei teka hanyu inun taru nu hal sekte yena, kami karasa bahwa hang awe-awe kawan ulun manantangni." ²³ Hantek here haut manantukan isa andrau pakai Paulus, here nunung Paulus hang panginapan ni, baya sarombongan ulun rama. Hingka kaiyat hampe kamalem, Paulus nyantarang ma here andri basaksi hal karajaan Alatalla andri bausaha nampiyakin here hal Yesus, maeh hingka Hukum Taurat Musa, atawa hingka kitab para Nabi. ²⁴ Papire ka ulun jari yakin udi nyandrengei inun sa na eau Paulus, kude meheni manolak neu parasaya. ²⁵ Hantek here puang satuju isa andri sa lain, here pada tulak udi hi Paulus iwara hal yeru, "Dasar bujur inun sa na eau Roh Barasis ma nini muyang nu mitah Nabi Yesaya, ²⁶ 'Tulakleh ma bangsa yena andri iwara: Hanyu sagar nyandrengei, kude puang sagar paham, andri hanyu sagar kadinung, kude puang sagar kataru. ²⁷ Deya, atei bangsa iti haut makapan andri silu ni weat neu nyandrengei. Here haut nutup mate ni. himpan here ada ninung andri mate here, nyandrengei baya silu here, kataru andri atei here balalu iwaleng. Udi yeru Aku sagar nyamare here.' Yesaya 6: 9 - 10 ^{29 28} Daya yeru, elahni neu hanyu karasa ialah kasalamaten sa hingka Alatalla yena haut na hampe nuju kawan bangsa lain andri here nyandrengei," ²⁹ [Udi hi Paulus iwara pesen yeru, kawan ulun Yahudi tulak nelang rama basoal pandapat hang helang here.] ³⁰ Paulus muneng salawah rueh ta'un hang lewu sa na sewa ni re'erai nelang narime katuluh ulun sa hawi nunung hanye, ³¹ nelang nampihabar karajaan Alatalla, mangajar hal Tuhan Yesus Kristus andri mahe'ei tatu'u nelang mahi rintangan isa pun.