¹ Daya yiru anak ku, wuah hanyu mansing daya ahi lelo sa naami ma takam,daya takam mira baya andri Kristus Yesus. ² Lengan ajar sa dahulu hie haut rengei nu teka aku hang hadapan ulun rama wuah hanyu parisaya andri kawan ulun sa iyuh naparisaya nelang sa panai ngajar ulun lain. ³ Hanyu harus uma nangung kahanangen yalah prajurit Kristus sa satia. ⁴ Erang kaulun prajurit sa rahat batugas,puang sagar ngampi sibuk diri ni andri kawan urusan ni raerai,daya hanye hamen ngampi sanang atei panglima ni. ⁵ erang kaulun olah ragawan puang sagar jari juara hawuang isa pertandingan,amun hanye puang ngalut nuu kawan paraturan. ⁶ Ulun pangume sa haut bagawi bahimat, hanye samambatang naan hak kaiyuh hasil teka kawan amuean ni. ⁷ Pikir mamaeh inun sa naeau ku yiti,daya Tuhan sagar ngami ma hanyu kasanggupen pakai mantaru katuluh ni yiru. ⁸ Itung yiri, Kabar maeh sa nawara ku hanye yiru Kabar neu Kristus Yesus, turunan hi Daud, Hanye Kristus sa haut welum mulek teka pampatei. ⁹ Daya iwara kabar maeh yiru,aku wuah kahanangen,likan hampe na rantai kala erang kaulun penjahat.Kude lengan Alatalla puang tau na rantai. ¹⁰ Yiru sabab ni aku sabar nangung katuluh yiru daya ma kaparluan kawan ulun sa haut napidi daya Alatalla,nampan here pada kaiyuh salamat sa haut naami itetei Kristus Yesus,nelang na sindrah andri pihante mulia sa makalalawah. ¹¹ Wuah tuu lengan yiti: "Amun takam haut matei baya hanye, takam welum pada baya hanye. Amun takam tatap sabar,takam pada sagar mamarentah baya hanye.Amun takam puang mangaku hanye,hanye pada sagar puang mangaku takam. ¹³ Amun takam puang satia,hanye tatap satia,daya hanye puang tau balawanan andri diri ni raerai". Here sa Bagawi ngulah arai Alatalla ¹⁴ Wuah hanyu ngampi itung kawan ulun neu alakatantuluh ni yiti. Hang hadapan Alatalla, ami nasehat ma here nampan here ada basual neu kawan pangantuhan.Yiru puang uweng riran ni,likan nyanrawek kawan ulun sa nyanrengei ni. ¹⁵ Wuah hanyu ngakali tatuu nampan nakaku daya Alatalla yalah ulun sa patut bagawi ma hanye.wuah hanyu ngakali nampan hanyu puang amangan neu pagawian nu,malengkan ngajar andri maeh kawan ajaran sa bujur teka Alatalla. ¹⁶ Sanawit kawan papaneran sa puang uweng riran ni nelang sa nampahe Alatalla.Kawan papaneran sa kala yiru ekat ngulah ulun magin jahat. ¹⁷ Ajaran kawan ulun yiru ilansar yalah panyakit kanker sa ganas.Teka here tamasuk hi Himeneus andri hi Filetus, ¹⁸ Here haut tawang teka kawan ajaran sa bujur,nelang ngasasaur kacau kaparisayaan mehe ulun.Here kaeau kaelanen teka pampatei haut terjadi. ¹⁹ Kude, peduduk sa segah sa haut na naulah daya Alatalla puang tau nagaguyuh.Hang amauni naan na surat kalayiti,"Tuhan kataru kawan ulun sa jari milik Ni",nelang"ulun sa kaeau hanye milik Tuhan,ulun yiru harus taduh nampalus gawian sa hala". ²⁰ Hawuang lewu sa hante naan wahai masam parabut.Naan sa naulah teka perak atawa amas,kude naan pada sa naulah teka kayu atawa tane.Naan sa napakai ma kaparluan sa hulung,nelang naan pada sa na pakai ma kaparluan biasa. ²¹ Ulun sa ngabarasis tanga ni teka hal sa jahat,ulun yiru sagar napakai ma kaparluan sa hulung.Hanye jari milik sa hulung nelang bariran ma tuan ni.Hanye natatap neu napakai ma tiap pagawian maeh. ²² Sanawit hawa nafsu ulun muda nelang sasahleh kebenaran, iman, kasih anri damai sejahtera baya here sa na herau Tuhan anri atei sa murni. ²³ Ada hanyu uma hawuang pirawekan kawan ulun lunga sa puang karasa inun heneng.Hanyu karasa katuluh yiru ekat ngulah pipaburan. ²⁴ Ulun sa bagawi ma Tuhan puang patut basual, hanye harus ramah andri ulun katuluh,nelang kaiyuh ngajar ulun andri maeh nelang sabar. ²⁵ Hanye harus lamah lambut ngajar kawan ulun sa katuju nawan,mudahan Alatalla ngami kasampatan ma kawan ulun yiru nampan batobat teka kawan dusa here nelang kataru ajaran sa bujur. ²⁶ Andri kalayiru here balalu kataru kamulek,nelang lepah teka jabak iblis sa haut nuruk here nampan ngalut kabahumen ni. he