Tabe nuju Ungkup hang Kota Tesalonika ¹ Tabe teka Paulus, Silwanus, andri Timotius, nuju ungkup hang Tesalonika wuang Alatalla, Amah takam, andri Tuhan Yesus Kristus. ² Anugerah andri damai sejahtera mahanyu teka Alatalla, Amah takam, andri Tuhan Yesus Kristus. ³ Kami harus basyukur eleh ma Alatalla neu hanyu, Kawan pulaksanai, andri mula sapatuni kala yeru. Daya, imannu batumu maeh tu'u andri kasih wat naun asing-asing ma sasameh naun magin hante. ⁴ Dagana iru, kami re'rai bangga mangesah hal naun na hadapan kawan ungkup Alatalla daya kasabaran andri imannu hang penah panganiayaan andri pandaritaan sa hanyu alami. Hal nahakim daya Alatalla ⁵ yena adalah bukti panghakiman sa adil hingka Alatalla, bahwa hanyu haut na anggap patut narime karajaan Alatalla daya hanyu pada haut mandarita. ⁶ Nelang pada, adil ma Alatalla neu nyamaleh anri panindasan nuju here sa ngulahnu rara, ⁷ tatapi ngami kalagaan ma hanyu sa uah ninas, anri pada ma kami, rahat Tuhan Yesus nanyatakan teka surga baya kawan malaikat-Ni sa dahsyat, ⁸ wuang apui sa manyala, neu ngami pambalasan ma here sa puang kataru Alatalla anri puang ngunu ma Injil* Yesus, Tuhan takam ⁹ Here ka'i ngingkam hukuman kabinasaan salawahni, lawit hingka hadirat Tuhan anri teka kamuliaan kakuasaan-Ni ¹⁰ hantek Hanye hawi neu na muliakan hang helang kawan ulun Barasis-Ni nelang pakai nakagum hang helang katuluh ulun sa haut parasaya--daya kasaksian kami ma hanyu naparasaya. ¹¹ Deya yeru, kami badoa eleh ma hanyu, kiranya Alatalla takam manganggap hanyu patut akan herauannu anri nampenu katuluh kaahengan pakai manggawi sa maeh anri gawian iman baya kuasa-Ni, ¹² nampan ngaran Tuhan Yesus takam na muliakan hang wuang hanyu, anri hang wuang Hanye, sasaui anri anugerah Alatalla takam anri Tuhan Yesus Kristus.