Yesus Sagar Hawi Miulek ¹ Kawan pulaksanai sa kuksihi, iti ialah surat sakarueh sanatulisku ma hanyu. Huang karueh surat yiru, aku ba'usaha nga'amuan pikirannu sa murni andri sara ngampi'itungnu, ² nampan hanyu ka'itung inun sa eau kawan nabi barasis andri sanaparintah Tuhan andri Jurusalamat mitah para rasul. ³ Sapertama ni, karasaleh bahwa hang andrau pangalis die, here tukang aja'an sagar hawi pakai uma hawa nafsu here sa badosa. ⁴ Here sagar ka'eau, "Awe janyi hal pihawian-Ni? Deya hantek itak kakah takam matei sadi, hampe wayah iti masih tatap sameh kala awal pamelum." ⁵ Deya here sangaja puang kaitung bahwa deya firman-Ni, langit haut naan hingka sadi, andri bumi naulah hingka ranu andri mitah ranu. ⁶ Pakai ranu yiru pada, dunia sa naan yiru nahansurkan deya ranu bah. ⁷ Kude, deya firman yiru pada, langit andri bumi sa naan wayah ina nasimuh pakai natutung andri apui hang andrau panghakiman andri kahasuran kawan ulun sa ra'at. ⁸ Kawan pulaksanai sa kukasihi, ada puang kaitung kanyataan sa isa iti; Bagi Tuhan, erang andrau sameh saribu taun andri saribu taun sameh erang andrau. ⁹ Tuhan pa suah unte mamenuhi janyi-Ni sameh anggapan mehe ulun ialah kajut unte. Sabalikni, Hanye sabar tu'u mahanyu deye hanye pahakun erang kaulun pun binasa, kude nampan katuluh ulun hawi ma partobatan. ¹⁰ Andrau pihawian Tuhan sagar kala hi pangalat, balalu langit sagar wawai andri karengei lengan sa mehet. Kawan barana langit sagar galis karakitan andri lunuh deya apui sa malaing, nelang dunia andri katuluh isini pada galis karakitan. ¹¹ Dami katuluh ni sagar nahansur , pakai sara yiru, kala'aweleh saharusni hanyu welum? Puang sa hanyu harus welum labih suci andri mawalah ma Alatalla, ¹² nelang ngandrei andri ngampihinang andrau pihawian Alatalla? Hantek andrau Tuhan, langit sagar hansur deya apui, andri katuluh barana langit maleleh deya kalaingan. ¹³ Deya, sasuai andri janyi Alatalla, takam pada ngandrei langit andri bumi sa wa'u, uneng kawan ulun sa welum maeh sagar muneng. ¹⁴ Kawan pulaksanai sa kukasihi, deya takam ngandrei hal yiru, maka bausahaleh welum maeh himpan Alatalla panalu hanyu rahat puang badosa, puang banoda, nelang badamai andri Alatalla. ¹⁵ Anggapleh kasabaran Tuhan jari kasempatan ma takam pakai narime kaselamatan. sameh sa natulis hi Paulus ma pulaksanai takam, nulis pakai hikmat sa naami deya Alatalla mahanye. ¹⁶ Hanye pada bapaner hal-hal yiru huang katuluh suratni sa lain. Memang naan hal-hal sa mahadin nakataru hampe naputarbalik deya kawan ulun sa lunga andri maleme imanni. Here pada ngulahni huang bagian sa lain teka Kitab Suci, akibatni ngulah here raerai binasa. ¹⁷ Kawan pulaksanai sa kukasihi, deya hanyu haut karasa hal iti, ba'ati-atileh nampan hanyu ada na enei tawang deya kasalahan teka kawan ulun sa puang kataru hukum. Ada hampe hanyu lawu teka imannu sa kokoh. ¹⁸ Kude batumuleh huang anugerah andri pangatruen ma Tuhan andri Juruselamat takam, Yesus Kristus. Ma Hanyeleh nawat hormat, wahahina andri hampe salawah-lawahni! Amin.