Hukuman ma Kawan Guru Palsu ¹ Zaman dahulu, naan kawan nabi palsu wuang penah umat Alatalla, ialah kala itati pada naan kawan guru palsu hang penah hanyu sa nelang sadina' ngajar ajaran sa nanrusak, sika manyangkal Tuhan sa haut newuh here hampe ngulah hinang hancur ma here ra'erai. ² Andri, sagar rama ulun sa uma sara welum here sa puang ba'adat, andri deya herelah, lalan sa maeh sagar nahujat. ³ Andri sarakah here sagar ngalap untung teka hanyu andri paneran sa manipu;hukuman ma here sa haut na siap teka dahulu kala puang sagar na unur-unur, andri kahansuran here puang sagar tapa'andre. ⁴ Deya, dami Alatalla pada puang tahan hantek kawan malaikat badosa, balalu nawut here ma huang naraka andri nahauruk here huang uneng sa ma'iyeng pakai na tahan hampe panghakiman, ⁵ andri hantek Alatalla pada puang hayang ma dunia purba kasuali hi Nuh, ra'erai sa welum ma'eh andri pitu ulun lainni, udihie ngulah ranu bah ma entu dunia sa puang kataru Alatalla; ⁶ andri hantek Alatalla nukum kota Sodom andri Gomora ngahansur ka rueh kota yiru hampe jari ewung, balalu ngulah kajadian yiru katuluh ni jari sontoh nampan here sa ra'at pamelum ni ta'u pa'ajar handrian ni; ⁷ andri dami Alatalla nyalamat hi Lot, sa bujur yiru, sa rara deya sara welum sa najis teka kawan ulun sa puang kataru hukum, ⁸ ( samantara ni, hi Lot welum hang helang here saban andrau, ngulah hanye mahanang atei deya ninung andri nyandrengei hal ra'at sa naulah here;) ⁹ maka Alatalla pasti karasa kala'awe napas kawan ulun sa ma'eh teka pansubaan andri nahan kawan ulun sa ra'at pakai nukum here hang andrau panghakiman, ¹⁰ khususni here sa mamuaskan tengani huang welum sa ma ra'at andri puang patuh andri pamarintah. Andri tu'u somong, kawan guru palsu yiru puang takut mahina kawan mahluk sa mulia, ¹¹ padahal kawan malaikat, sa lawit labih kuat andri bakuasa teka here, puang he'ei bapaner sa nuduh atawa mahujat here hang hadapan Tuhan. ¹² Kawan guru palsu iti sameh kala satua sa puang baakal, sa nalahir khusus pakai na wunu; here mahujat inun sa puang here kataru, here sagar nabinasa huang kahansuran here ra'erai; ¹³ here sagar na katekan sara'at pakai upa ma ulah here sa ra'at. here nganggap mabuk-mabukan ka'andrau hal sa rame. Here ngulah mangan andri cela, bara'rame huang muslihat here kuman baya andri hanyu. ¹⁴ Here ampun mate penu nafsu jinah andri puang ta'u mayu ngulah dosa, here ngagoda kawan ulun sa maleme amirueni, andri atei here haut patuh welum sarakah. Here ialah kawan iya sa terkutuk! ¹⁵ Here nanan lalan sa lurus balalu umba lalan sa sasat, yaitu lalan hi Bileam bin Boer, sa karuju narime upa pakai ulahni sa ra'at. ¹⁶ Kude hanye kaiyuh taguran keras deya palanggaranni teka isa ka'ukui keledai sa bisu, kude sa panai bapaner andri lengan murunsia hampe ngampi taduh ulahan nabi yiru. ¹⁷ Kawan ulun iti kala mate ranu sa karing andri kabut sa sapu deya badai. Ma'iyeng sa paling tamam haut na sadia ma here. ¹⁸ Andri paneran sa somong, kude kosong, here ngajarat kawan ulun sa haut na lapas teka here sa welum huang kasesatan andri kabahumen nafsu andri parsabulan. ¹⁹ Kawan guru palsu iti ngajanyi kabebasan, padahal here ra'erai ialah walah teka kabinasaan. Deya inun-inun sa haut ngulah ulun tunuk ma erangkaulun, ma hanyelah ulun yiru naperbudak. ²⁰ Deya, dami here nalapas teka pencemaran dunia sa ra'at mitah pangataruen ma Tuhan andri Jurusalamat takam, Yesus Kristus, kude dami miulek lagi ma dunia sa ra'at yiru andri nakuasai deyani, maka here sagar jari labih mara'at teka sahu'anni. ²¹ Ware here puang suah kataru budas hal lalan sa bujur, dari pada here haut kataru balalu miulek teka hukum suci sa haut na ami ma here. ²² Here ialah ibarat paribasa sa ka'eau; ''Antahu miulek nguta nua ni ra'erai'' andri ''Iwek sa haut nabarasis, miulek lagi mitun ma putak''.