Tabe hingka hi Simon Petrus ¹ Hingka hi Simon Petrus, walah andri rasul Yesus Kristus, nuju here sa haut narime iman sa sameh andri wat kami mitah sa tu'u hingka Ala'talla panyalamat takam, Yesus Kristus. ² Kirani anugerah andri damai sejahtera penu ngiring naun hang huang pangataruan ma Alatalla andri Yesus, Tuhan takam. ulun sa naherau andri napidi daya Alatalla ³ Kuasa-Ni sa ilahi haut ngami takam katuluh hal sa ma'eh, itah kataruen takam ma Hanye sa haut nerau takam nuju ma Hanye sa maeh andri mulia. ⁴ Hanye pada haut ngami janyi-janyi-Ni sa hante nelang ba uman nampan itah janyi-janyi yiru hanyu kaiyuh umba bagian huang uneng-Hanye, nelang luput hingka pamelum sa nanrusak sa na ulah ba'masam hawa nafsu. ⁵ Nampan ta'u kalayiru, ba'usahalah bujur-bujur pakai namah imannu andri kebajikan, kebajikan andri kataruen, ⁶ andri kataruen ma penguasaan tenga, andri penguasaan tenga andri katabahan, katabahan andri kasalehan, ⁷ kasalehan andri kasih pulaksana'i, kasih pulaksanan'i andri kasih sa puang mamentingkan pamelum ra'erai. ⁸ Deya, dami katuluh yiru naan huang hanyu andri tarus batamah, hanyu puang sagar jari sia-sia atawa puang bahasil nuju huang pangataruen ma Tuhan takam, Yesus Kristus. ⁹ Kude, dami ulun sa mahi ampun katuluh yiru, hanye irulah ulun sa puang sagar ta'u kadinung sa maeh andri pehe deya hanye pa'ka'itung bahwa hanye haut nabarasis teka dosa-dosani sa dahulu. ¹⁰ Deya yiru, kawan pulaksana'i, ba'usahalah labih giat lagi pakai mamastikan bahwa hanyu tu'u na herau andri napidi; deya dami hanyu ngunu, hanyu puang sagar lawu. ¹¹ Dami haut kalayiru, anawang ma huang karajaan kekal Tuhan andri Juru Salamat takam, Yesus Kristus, sagar ta'uka hante ma hanyu. ¹² Yirulah makani, aku ang tanting ngampi itung hanyu hal katuluh yiru, bere hanyu haut karasa andri haut na wigas mindri wuang sa'maeh sa naan witu hanyu. ¹³ Salawah aku masih welum wuang tenga iti, aku manganggap parlu nyuju hanyu andri sara ngampi itungnu, ¹⁴ deya aku karasa bahwa aku sagar nanan tenga iti ialah kala sa haut na tutui ma aku deya Tuhan takam, Kristus Yesus. ¹⁵ Nelang, aku sagar bausaha andri katuluh kawigasanku nampan ngulah hanyu tatap kaitung katuluh yiru dami aku haut tulak. Saksi Mate Kamuliaan Kristus ¹⁶ Deya kami puang umba kawan mitos sa nakarang -karang hantek kami iwara ma hanyu hal kuasa andri pihawian Tuhan takam, Yesus Kristus, kude deya kami ialah kawan saksi mate nawat hormat-Ni. ¹⁷ Deya hantek Yesus narime nawat hormat hingka Alatalla Ambah, sameh kala sa na'iwara ma Hanye, deya Sa MahaMulia, '"Itilah Iya-Ku sa Na'ahi, Ma-Hanyelah Aku berkenan," ¹⁸ kami pada nyanrengei lengan yiru hawi teka surga hantek kami baya andri Hanye hang entu wungkur barasis. ¹⁹ Kami pada tu'u yakin deya eyauan teka nubuat, sa maeh pada nampan hanyu kadinung, deya ialah nantau palita sa ra;Ai hang uneng sa ma'iyeng, sika hampe kaiyat hawi andri bintang fajar terbit wuang ateinu. ²⁰ Kude yiru, hal sa utama sa harus hanyu kataru ialah mahi nubuatan huang Kitab Suci sa ba'asal hingka panafsiran murunsia, ²¹ deya mahi isa pun nubuatan ba'asal teka kabahumen murunsia; kalahie pada, kawan ulun sa bapaner entu ngaran Alatalla deya napimpin Roh Barasis.