Tabe andri Ucapan Syukur Paulus ¹ Hingka Paulus, Silwanus, andri Timotius ma ungkup hang Tesalonika, sa naan wuang Alatalla Amah andri wuang Tuhan Yesus Kristus. Anugerah andri damai ngiring hanyu. ² Kami aray basyukur ma Alatalla neu hanyu katuluhni, andri ngantuh ngarannu wuang doa-doa kami, ³ nelang ngitung gawian iman, usaha kasih, andri katekunen pangharapannu hang wuang Tuhan takam, Yesus Kristus, na hadapan Alatalla andri Amah takam. ⁴ Kawan pulaksanai sa na hayang Alatalla, karasa naun bahwa Hanye haut midi hanyu. ⁵ Deya, Injil* kami hawi ma hanyu puang ekat wuang kata-kata ai, tatapi wuang kuasa, wuang Roh Barasis*, andri nelang penu kayakinan; ialah sa hanyu karasa kawan ulun sa kala'awe kami yena hang helang naun, pakai kapentingan hanyu. ⁶ Hanyu haut jari kawan ulun sa ngalut kami andri Tuhan deya hanyu haut narime firman wuang rama rara andri aray teka Roh Barasis, ⁷ nampan hanyu jari taladan ma katuluh ulun parasaya hang Makedonia andri Akhaya. ⁸ Deya, hingkanu firman Tuhan bergema puang ekat hang Makedonia andri Akhaya, pada jua hang satiap oneng, imannu ma Alatalla haut tasebar hampe kami puang sah ngantuh kawan inun lagi. ⁹ Deya, here re'erai haut bakisah hal kami, nelang ialah naun narime kami, andri kalaawe hanyu haut iwaleng ma Alatalla teka kawan berhala* pakai malayani Alatalla sa welum andri bujur, ¹⁰ andri pakai ngandrei Iak-Ni hawi hingka surga, sa haut na amuan hingka penah ulun matei, yaitu Yesus, sa manyalamatkan takam hingka murka sa ka'i hawi.