¹ Tiap ulun sa parisaya ma Yesus hanyeyiru Raja isa na janyi daya Alatalla; pada tiap ulun sa sinta Amah, sinta ma Anak Ni pada. ² Andri yina, takam karasa bahwa takam sinta kawan anak Alatalla, hanyeyiru katika takam sinta Alatalla pada ngalut nuu ma kawan parintah-Ni. ³ Daya sinta ma Alatalla, takam ngalut nuu ma kawan parintah-Ni; nelang kawan parentah-Ni puang maweat ma takam. ⁴ Daya, tiap anak Alatalla sanggup nyantalau dunia; ina kamanangan takam nyantalau dunia; yiti makai kaparisayaan takam. ⁵ Hie sa kaiuh nyantalau dunia ekat ulun sa parisaya Yesus hanyeyiru Anak Alatalla. Welum hampe Kalalawah Anri Yesus Kristus ⁶ Hanye sa hawi anri ranu baptisanni nelang anri ira pampateini ; Yesus Kristus; puang ekat anri ranu, kude ranu anri ira. Roh sa ngami kesaksian daya Roh puang suah ipusu. ⁷ Daya naan telu sa basaksi hang surga; ⁸ Roh, ranu anri ira; kateluni yiru isa. ⁹ Amun takam parisaya kasaksian murunsia, kasaksian Alatalla labih tamam lagi. Nelang yiru kasaksian Alatalla neu Anak-Ni. ¹⁰ Ulun sa parisaya ma Anak Alatalla haut narime kasaksian yiru hang wuang ateini. Ulun sa puang parisaya ma Alatalla haut baanggapan ialah Alatalla yiru mapusu daya ulun yiru puang parisaya ma inun sa naeau Alatalla neu Anak-Ni. ¹¹ Pada, kasaksian yiru hanyeyiti; Alatalla haut ngami ma takam pamelum sa sejati palus makalalawah, nelang Anak-Ni hanyeyiru putut pamelum yiru. ¹² Satiap ulun sa kaampun Anak Alatalla kaampu pamelum; kude tiap ulun sa puang kaampun Anak Alatalla puang uweng pamelum yiru. Anak Alatalla Puang Ngulah Dosa ¹³ Aku nyurat ma naun sa parisaya ma Anak Alatalla, nampan naun karasa naun haut naan pamelum sa sejati palus kalalawah. ¹⁴ Takam heei nadap Alatalla, daya takam harap inun sa na laku daya takam sesuai andri kabahumen-Ni, Hanye pasti nyandrengei takam. ¹⁵ Daya takam karasa Hanye nyanrengei takam, amun takam ilaku , balalu takam karasa pada himat na ami ma takam inun sa nalaku takam tika Hanye. ¹⁶ Amun naan sa kadinung pulaksanai ngulah dosa sa puang ngulah sabab ulun yiru kawawaian pamelum sa sajati palus kalalawah, ware naun lakudua ma Alatalla; nelang Alatalla sagar ngami pamelum yiru ma hanye. Kude, naan dosa sa ngulah sabab ulun yiru kawawaian pamelum yiru; aku puang kaeau naun harus lakudua ma Alatalla. ¹⁷ Katuluh ulahan sa hala hanyeyiru dosa, kude naan dosa sa puang ngulah sabab ulun yiru kawawaian pamelum sa sajati palus kalalawah yiru. ¹⁸ Takam karasa katuluh ulun sa haut jari kawan anak Alatalla puang saratang ngulah dosa, daya Anak Alatalla nyalinung hanye daya yiru hi jahat puang kaiuh ngulah inun-inun nadap hanye. ¹⁹ Takam karasa bahwa takam milik Alatalla, biar katuluh dunia yiti hang kapit kuasa hi Jahat. ²⁰ Pada, takam karasa Anak Alatalla haut hawi nelang haut ngami kaharatien ma takam nampan takam kataru Alatalla sa bujur; takam welum baya anri Alatalla sa bujur, baya anri Anak-Ni, Yesus Kristus. Hanye yiti Alatalla sa bujur nelang pamelum sa sejati palus kalalawah. ²¹ Kawan anakku, sanawit tenga naun teka kawan barhala.