¹ Hantek erang kaulun teka naun baparkara anri sa lainni, inun hanye heei tulak lepuh ngantara kaadilan pi hadapan kawan ulun sa puang maeh daya inun puang pi hadapan kawan ulun sa barasis? ² Inun hanyu puang karasa amun kawan ulun barasis sagar mahakimi dunia? Amun dunia nahakimi dayanu, inun hanyu puang patut mangadili kawan parkara sa rumis? ³ Inun hanyu puang karasa amun takam yati sagar mangadili kawan malaikat? maginni amun ekat kawan parkara biasa sa nahadap hang tiap anrau! ⁴ Jari, amun hanyu ekat nadap kawan parkara biasa ialah yiru, daya inun hanyu ngenei pi here sa puang masuk rekenan hawuang jemaat? ⁵ Aku bapaner kala yina himpan hanyu amangan. Inun mahi erang kaulun hingka naun sa panai bijaksana, sa kaiuh ngurus kawan parkara hang penah pulaksanai katuluh? ⁶ Diwilikan, pulaksanai anri pulaksanai tulak ngantara kaadilan pi hadapan kawan ulun sa puang parisaya! ⁷ Sabujurni, hanyu haut puang bahasil daya hang penah naun haut naan kawan parkara hukum. Daya inun hanyu puang kajut hakun naanpi hala? Daya inun hanyu puang kajut hakun kurang labis? ⁸ Maka, hanyu sendiri naan kahalaen nelang ngampi rugi. Diwilikan, hanyu haut ngulah yiru pi kawan pulaksanainu. ⁹ Inun hanyu puang kataru amun ulun sa puang maeh puang sagar mawaris Karajaan Alatalla? Ada tawang! kawan ulun cabul, kawan panyembah barhala, kawan ulun sa idapa, bansir, kawan homoseksual, ¹⁰ kawan pangalat, kawan ulun sa sarakah, kawan paminum, kawan ulun sa katuju nangkurun ulun lain, anri kawan panipu, here uras yiru puang sagar mawaris Kerajaan Alatalla. ¹¹ Papire kaulun hingka naun pada ialah yiru. Kude, hanyu haut na barasis, haut jari kudus, nelang haut na ampi witu hawuang ngaran Tuhan Yesus Kristus anri hawuang Roh Alatalla takam. Sanawit Pagawian Dapabela ¹² Hang aku uras hal iuh nagawi, kude puang urasni yiru bariran. Biar hang aku iuh ngulah inun eleh, kude aku puang hakun nakuasa daya inun jua. ¹³ Kutaen ma wuntung, anri wuntung pakai kutaen, kude Alatalla sagar nyamawai kararuehni. Tenga puang iuh napakai ulahan murun, daya tenga pakai malayani Tuhan, nelang Tuhan makai malihara tenga yiru. ¹⁴ Alatalla nyamelum Tuhan Yesus hingka pampatei kalayiru pada yati sagar nyamelum takam anri kuasa-Ni. ¹⁵ Inun hanyu puang kataru amun tenganu hanye yiru anggota tenga Kristus? Inun aku sagar ngalap kawan anggota tenga Kristus balalu ngulahni jari kawan anggota tenga wawei nakal? Budas puang iuh! ¹⁶ Inun hanyu puang kataru anun ulun sa basampur anri wawei nakal jari isa tenga anri wawei nakal yiru? Daya, Hanye kaeau, "Karuehni sagar jari isa daging." ¹⁷ Kude, ulun sa ngampi isa tenga anri Tuhan Jari isa roh anri Hanye. ¹⁸ Sanawit pagawian dapa bela! Daya katuluh dosa lain sa naulah erang kaulun hanye yiru hang luar tengani, kude ulun sa idapa bela, ngulah dosa hang tengani raerai. ¹⁹ Inun hanyu puang kataru amun tenganu hanye yiru lewu Roh Kudus, sa naan hawuang hanyu, sa natarimenu hingka Alatalla, nelang tenganu yiri puang ekat watnu raerai? ²⁰ Daya, hanyu haut natewus anri haraga lunas. Dagana yiru, namulia Alatalla makai tenganu.