¹ Samula haut nalapor amun naan pagawian murun hang penah naun, pagawian murun yiru labis murun teka kawan bangsa lain, hanye yiru naan ulun sa idapa anri ineh tereni. ² Nelang, hanyu sakah! sapatutni hanyu mahanang atei himpan ulun sangulah gawi murun yina na unur hingka penah naun? ³ Sabujurni, nadinung hingka sara murunsia aku yena lawit, kude aku hawi hawuang roh. Nelang, aku haut ngami hukuman pi ulun sangulah gawi yiru, iyalah sa aku ganyah naan hang yiru. ⁴ Hawuang ngaran Tuhan Yesus, hantek hanyu bakumpul, aku naan sinrah hanyu hawuang roh daya kuasa Tuhan takam Yesus, ⁵ aku haut mamutus himpan nyarah ulun yina ma Iblis himpan tengani binasa anri kala yiru rohni tau na salamat hang anrau pihawian Tuhan. ⁶ Kasakahennu yiru puang maeh. Inun hanyu puang kataru amun butit ai ragi sagar tau maragi katuluh adonan? ⁷ Umpe dahulu uras ragi uhang himpan hanyu jari adonan wau, ialah asalni samula hanyu puang baragi. Daya, Kristus, Domba Paskah takam, haut nasamalih. ⁸ dagana yiru, hayu takam maraya pesta yiru, puang makai ragi sa lawah, puang hingka ragi pikurun anri kajahaten, sapatutni makai roti puang baragi hingka pibungas nelang pikaeh. ⁹ Aku nyurat pi hanyu hawuang suratku: ada bahengau anri kawan ulun cabul. ¹⁰ Bahumku, puang anri kawan ulun cabul hang dunia yina, kawan ulun sarakah, kawan panipu, atawa anri kawan panyembah barhala. Amun kala yiru, hanyu mustini kaluar teka dunia yena. ¹¹ Kude, itati aku manyurat pi hanyu, ada bahengau anri kawan ulun sa naantuh pulaksanai amun hanye yiru ulun cabul, darakah, panyembah barhala, gaha nangkurun ulun, pamahamui, atawa panipu. labis teka yiru, ada hampe kuman anri ulun ialah yiru. ¹² Sabab, inun urusanku mahakimi kawan ulun luar? Angsah hanyu sa mahakimi here sa naan hawuang jamaat? ¹³ Kude, Alatalla sa sagar mahakimi here sa hang luar jamaat. Dagana yiru, usirleh ulun sa ngulah gawi kajahaten hingka penah naun.