¹ Kude, Pulaksanai katuluh, aku puang kaiuh bapaner anri hanyu ialah ma ulun sa rohani, aku ekat tau bapaner ialah ma ulun duniawi, hanye yiru ialah ma kawan gena hawuang Kristus. ² Aku ngami hanyu ranu susu, puang makuta, dagana hanyu huan uweng kakuaten, hampe itati hanyu pada huan uweng kakuaten, ³ Dagana hanyu magun duniawi. Daya, amun naan nanam bahiri anri pirawekan hang penah naun, bararti naun nagun duniawi nelang welum sacara murunsia? ⁴ Dagana, hantek erang kaulun kaeau, "Aku uma hi Paulus," meheni lagi kaeau, "Aku uma hi Apolos," angsah yiru bararti hanyu magun murunsia? ⁵ Balalu, hie sa hi Apolos yiru? Nelang, hiye sa hi Paulus yiru? Kawan walah sa dayani hanyu jari parisaya ialah sa na karunia Tuhan ma isasaan. ⁶ Aku sa ngamule, Apolos sa nyiram, kude Alatalla sa ngulah amulean yiru welum. ⁷ Jari, puang daya sa ngamule, puang pada daya sa nyiram, malainkan Alatalla sa nyamelum. ⁸ Ulun sa ngamule anri sa nyiram jari isa, nelang isasaen sagar narime upani anri usahani raerai. ⁹ Daya, kami kawan ulun sa sameh bagawi ma Alatalla; hanyu hanye yiru ume Alatalla, bangunan Alatalla. ¹⁰ Sasuai anri kapanaien sa na ami Alatalla ma aku, ialah erang kaulun tukang bangunan sa ahli, aku sa nganak pundasini nelang sa lain ngulah lewu hang amauni. Kude, tiap ulun musti mamparhati kala awe hanye mambangun hang amauni. ¹¹ Daya, mahi erang kaulun jua sa tau ngulah pondasi sa lain amun lain sa haut na ulah, hanyeyiru Kristus Yesus. ¹² Amun naan ulun sa ngapinri hang amau pondasi yiti anri amas, perak, kawan watu baharaga, kayu, rikut, riumi, ¹³ pagawian sa na ulah tiap ulun sagar na dinung dagana Anrau yiru sagar natantarang makai apui, nelang apui yiru sa sagar mantaru kala awe wangun gawian isasaen ulun. ¹⁴ Amun pagawian sa haut na ulah erang kaulun yiru batahan, hanye sagar narime upa. ¹⁵ Amun pagawian ulun yiru galis rakit, hanye sagar rugi, biar kalayiru, hanye sendiri sagar na salamat, ekat kaadaanni ialah malupui apui. ¹⁶ Inun hanyu puang karasa amun hanyu yiri Lewu Alatalla anri Roh Alatalla muneng hawuang hanyu? ¹⁷ Amun naan erang kaulun sa nanrusak Lewu Alatalla, Alatalla pada sagar nanrusak ulun yiru dagana Lewu Alatalla yiru barasis, hanye yiru hanyu. ¹⁸ Ada hampe naan ulun sa musu tengani raerai. Amun naan ulun hang penah naun mina hanye marahati hang jaman itati, elahleh hanye jari lunga himpan hanye tau jari marahati. ¹⁹ Dagana, kapintaren dunia yina hanye yiru panungan hang hadapan Alatalla. Daya, naan na surat, "Hanye sa nyama ulun marahati hawuang pisulas here," ²⁰ nelang pada, "Tuhan karasa uras pikiran ulun sa marahati, urasni yiru puang bariran." ²¹ Dagana yiru, ada hampe naan erang kaulun jua sa nawat murunsia. Daya, katantuluhni haut jari miliknu, ²² Hau yiru hi Paulus, hi Apolos, atawa hi Kefas, hau dunia, hau pamelum atawa pampatei, hau yiru kawan hal sa sagar hawi; urasni jari miliknu. ²³ Nelang, hanyu milik Kristus, anri Kristus hanye yiru milik Alatalla.