¹ Nalang, hantek aku hawi pi hanyu, Kawan Pulaksani, aku puang hawi anri pikaeh lengan atawa kapintaren pakai nahampe rahasia Alatalla ma hanyu. ² Daya, aku batekat himpan puang karasa inun eleh sa naan hang penah naun kasuali neu Kristus Yesus, Hanyeyiru hanye sa na balasangar. ³ Aku baya anri hanyu hawuang pileme, hawuang panakut nelang neter tu'u. ⁴ Pambaritaan sa na tahampeku puang makai lengan kapintaren sa ngampi yakin, kude anri bukti Roh nelang kuasa, ⁵ himpan kaparisayaennu puang itetei kapintaren murunsia, kude makai kuasa Alatalla. Alatalla Nantarang Kaharatien-Ni Mitah Roh ⁶ Kami iwara kapintaren ma penah here sa bapangalaman, kude puang kapintaren jaman yiti atawa hingka kawan panguasa jaman yiti sa sagar na samawawai, ⁷ kude kami iwara kapintaren Alatalla sa puang na karasa, kepintaren sa tasanina, sa na sadia Alatalla kapihuan dunia yiti na sanyari. ⁸ Mahi kawan panguasa jaman yiti sa kataru. Daya, paribasani here haut kataru, here puang sagar malasangar Tuhan sa mulia yiru. ⁹ Kude, ialah sa na surat, "Inun sa huan suah na dinung mata, anri huan suah na rengei silu, nelang huan suah timul hawuang atei murunsia, uras yiru haut na sadia Alatalla ma here sa sinta Hanye." Yesaya 64:4 ¹⁰ Kude, Alatalla haut nantarang kawan hal yena ma takam itetei Roh daya Roh nyantaru ala katantuluh, likan ma kawan ransana Alatalla. ¹¹ Daya, hiye hingka murunsia sa karasa hawuang atei murunsia amun puang roh murunsia sa naan hawuangni? Kalayiru pada, mahi erang kaulun jua sa karasa kawan hal hingka Alatalla amun puang Roh Alatalla. ¹² Itati, takam haut narime, puang roh hingka dunia, kude roh sa hingka Alatalla himpan takam tau karasa kawan hal sa na ami Alatalla ma takam. ¹³ Kawan hal sa pada na antuh kami yiti, puang hawuang lengan sa na ajar daya kapintaren murunsia, kude sa na ajar hingka roh anri mambaning kawan hal anri sa rohani. ¹⁴ Kude, ulun sa puang rohani puang narime kawan hal sa hawi hingka Roh Alatalla daya kawan hal yiru ialah panunga ma hanye. Hanye puang kaiuh nyantaru yiru dagana kawan hal yiru ekat tau natarime sacara rohani. ¹⁵ Ulun sa rohani manilai uras hal, kude hanye sendiri puang na nilai daya hie eleh. ¹⁶ Dagana, "Hie sa karasa pikiran Tuhan hampe tau manasehat Hanye?" Yesaya 40:13 Kude, kami naan pikiran wat Kristus.