¹ Hi Paulus, na herau jari rasul Yesus Kristus daya kabahumen Alatalla, anri hi Sostenes, pulaksanai takam. ² Ma kawan ungkup sa naan hang Korintus, ma here sa na barasis hawuang Kristus Yesus, sa na herau himpan jari kawan ulun barasis sinrah uras ulun hang tatiap unengan sa nerau ngaran Tuhan takam Yesus Kristus, hau yiru hang unengan here atawa unengan takam. ³ Berkat pihanyu anri kasanangen sa hawi teka Alatalla Amah takam nelang Tuhan Yesus Kristus. Paulus Batarimekasis ma Alatalla ⁴ Aku saratang batarimekasis ma Alatallaku neu hanyu dagana berkat Alatalla sa na ami ma naun itetei Yesus Kristus, ⁵ Daya hawuang inun eleh, naun na ampi tatau hawuang Hanye, hawuang uras lengan, anri pangarasaen, ⁶ sameh iyalah piwaraan neu Kristus haut na ampi kuat iman hawuang hanyu. ⁷ Anri kalayiru, hanyu puang sagar kakurangen sunah isa berkat jua padingian hanyu ngandrei na tantarang Tuhan takam, Yesus Kristis, ⁸ sa pada ngampi kuat imannu hampe ma panampukni himpan hanyu puang ba cacat cela hang anrau Tuhan takam Yesus Kristus. ⁹ Alatalla yiru satia, sa daya-Ni hanyu na herau himpan jari isa anri Anak-Ni, Kristus Yesus, Tuhan takam. Pirawekan hawuang ungkup ¹⁰ Itati, aku ngampi itung naun, pulaksanai katuluh, hawuang ngaran Tuhan takam Yesus Kristus himpan naun katuluh mira pakat ada hampe naan pirawekan hang penah naun, labislikan himpan naun mira kunuan nelang mira pikiran. ¹¹ Daya, haut na wara ma aku neu naun, kawan pulaksanaiku, kulawarga Kloe, amun hang penah naun naan pirawekan. ¹² Bahumku itati hanye yiru naun isasaen kaeau, "Aku hingka hi Paulus," anri, "Aku hingka hi Apolos," anri, "Aku hingka hi Kefas," anri, "Aku hingka Kristus." ¹³ Inunkah Kristus tabagi-bagi? Inun hi Paulus na balasangar ma naun? Atawa, inun hanyu na babtis hawuang ngaran hi Paulus? ¹⁴ Aku batarimekasis ma Alatalla dagana aku mahi mambabtis erang kaulun jua teka naun, kasuali hi Krispus anri hi Gayus, ¹⁵ himpan ada hampe naan isa jua sa tau ngantuh amun hanyu na babtis hawuang ngaranku. ¹⁶ Aku pada mambabtis erang kalewu hi Stefanus; labisni, aku puang karasa inunkah aku haut mambabtis ulun sa lainni. ¹⁷ Daya, Kristus puang ngutus aku himpan mambabtis, kude himpan mambarita surat barasis, puang makai kapintaren bapaner, himpan balasangar Kristus puang mamus tu'u eleh. Kuasa nelang Kapintaren Alatalla ¹⁸ Daya, paneran neu balasangar hanye yiru panunga ma here sa ganyah binasa, kude ma takam sa na salamat, hal yiru kakuaten Alatalla. ¹⁹ dagana, naan na surat, "Aku sagar ngampi hansur kapintaren ulun sa bijaksana, nelang puang narime kapintaren ulun sa panai." Yesaya 29:14 ²⁰ Hang awe ulun sa bijak? Hang awe panai Taurat? hang awe panai bapikir jaman yina? Ang sah Alatalla haut ngulah lunga kapintaren dunia yiti? ²¹ Daya hawuang piharati Alatalla, dunia sa makai kapintarenni puang kataru Alatalla, balalu Alatalla ilewa mitah panunga pambaritaan surat barasis pakai manyalamat sa mamparisayani. ²² dagana, kawan ulun Yahudi ilaku siri balalu kawan ulun Yunani ngantara kapintaren. ²³ kude, kami mambarita Kristus sa na balasangar, sa ma kawan ulun Yahudi yiru manyingung pangingkaman, balalu ma kawan ulun sa puang Yahudi, isa kalungaen. ²⁴ Kude, ma here sa na pakai, hau kawan ulun Yahudi atawa kawan ulun Yunani, Kristus hanye yiru kakuaten Alatalla nelang kaharatien Alatalla. ²⁵ Daya sa lunga teka Alatalla hanyeyiru labis bijaksana na baning murunsia, anri sa maleme teka Alatalla hanye yiru labis kuat na baning murunsia. ²⁶ Dinungleh wangunu hantek hanyu na pakai, Kawan pulaksanai, puang hene sa bijaksana ma pamelum, puang hene sa bakuasa, puang hene sa bakadudukan, ²⁷ Kude Alatalla haut midi sa lunga hingka dunia himpan ngampi amangan sa bijaksana, anri Alatalla midi inun sa maleme hingka dunia himpan ngampi amangan sa kuat. ²⁸ Anri, Alatalla midi sa na angap rumis hingka dunia nelang puang bakadudukan, amput kawan hal sa puang bariran, pakai nyamawai kawan hal sa bariran, ²⁹ Himpan tatiap murunsia puang kaiuh ngampi tamam tengani hang hadapan Alatalla. ³⁰ Dagana Hanye, hanyu naan hawuang Yesus Kristus, sa ma takam na pakai ma kapintaren, ma pikaeh, kakudusan, nelang panewusan teka Alatalla. ³¹ himpan ialah sa na surat, "Hie eleh sa ngampi tamam tengani, ampi tamamleh hawuang Tuhan."