¹ Tafaranigny raha reo, dra Lasa nisaky gny ranomasin'i Galilia Jesosy, atao ranomasin'i Taberiasy. ² Nisy vahoaky maro nagnaraky anazy soa hitan'ereo gny famatara ze nataony tamireo narary. ³ Niakasy atendrombohisy Jesosy dra nipetraky tegny niaraky tamireo pianany Izy. ⁴ (Dra gny Paska, gny andro firavoravonigny Jiosy, dra fa mariny) ⁵ Gny fa nagnety agnabo Jesosy dra nahita vahoaky maro be nagnaton'Anazy, dra hoy Izy tamin'i Filipo ho: "Eza gny hiviliasika mofo ba hafahan'ereo mihina?" ⁶ (Fa I Jesosy nizaka anizay ba hisapa an'i Filipo, fa fatany ze hataony.) ⁷ Dra Filipo namaly Anazy ho: "na dre mofo rozato dinary aza sy ho apy ho anigny sirairay na dre masaiky aby aza ko." ⁸ Raiky tamireo pianasy, Andrea, rahalahin'i Simona Petera, nizaka tamin'i Jesosy ho: ⁹ "Misy lelahy raiky eto mana mofo dimy vo fia ro, fa ino reo manoloa any ty olo maro tahoky?" ¹⁰ Dra Jesosy nizaka ho: "Atovy mipetraky gny olo" (dra feno ahisy teo amigny toera) Dra nipetraky reo olo, teo amigny dimy arivo teo gny isany. ¹¹ Boak'eo jesosy nangalaky reo mofo dra gny fa boaky nisaotra, dra nizara anizay tamireo ze nipetraky teo. Manahaky anizay avo koa gny nataony tamigny fia igny, maro araky anizay nitalian'ereo. ¹² Gny fa visy gny olo, dra hoy Izy tamireo pianany ho: "Avorio ze tavela sy lany, ba sy hisy ho levo." ¹³ Dra navorin'ereo ray dra nahafeno vaha ro ambiny folo gny tavelany mofo dimy sisa nanganize nihina. ¹⁴ Boak'eo, gny fa nahita anizay famatara zay gny olo, dra hoy ereo ho: "Tiky tokony gny paminany avy ho amizao totolo izao zay." ¹⁵ Gny fa hitan'i Jesosy fa ho avy ereo hangalaky anazy vo hanandrasy anazy amizao ho pazaka, dra nihery tegny atendrombohisy raiky ndraiky Izy. ¹⁶ Gny fa nirava gny andro, dra nilisy tegny amigny ranomasy reo pianany. ¹⁷ Nagnao agnaty sambo ereo, dra nisaky gny ranomasy ho a Kapernaomy agny. Fa mezy tamizay, dra Jesosy bo sy avy teo amin'ereo avo koa. ¹⁸ Nisy rivosy fatrasy, dra niha-nahery gny ranomasy. ¹⁹ Gny fa nivoy teo amigny dimy amby ropolo na telopolo stadio teo ereo, dra nahita an'i Jesosy nandeha teo amigny ranomasy dra nagnariny gny sambo, dra natahosy ereo. ²⁰ Fa hoy Izy tamin'ereo ho: "Izaho avo tiky! Ka matahosy." ²¹ Boak'eo dra vonona gny hitakasy anazy tao amigny sambokely ereo, dra teo no eo dra avy tegny amigny toera andehanan'ereo gny sambokely igny. ²² Gny maraindray, hitan'ireo vahoaky ze nisanga tegny apitanigny ranomasy fa sy nisy sambo hafa teo afa-sy gny raiky igny avo, dra Jesosy sy nilisy tao niaraky tamireo pianany fa nandeha raiky niviky gny pianany. ²³ Kanefa, nisy sambokely maromaro boaky Tiberiasy agny teo agnilanigny toera ze nihinanan'ereo gny mofo gny fa boaky nisaotra gny Topo. ²⁴ Gny fa hitanigny vahoaky fa sy teo Jesosy na gny pianany, dra nilisy tao agnaty sambo ao ereo dra nagna Kapernaomy egny hitalia an'i Jossosy. ²⁵ Gny fa hitan'ereo tegny apitanigny renirano izy, dra hoy ereo taminazy ho: "Raby, ombia hanao gny avy teto?" ²⁶ Jesosy namaly anereo, nanao anizahoky ho: "Zakako amindrareo mary fa mitalia anahy handrareo, sy nohonigny nahitandrareo famatara, fa nohonigny nihanagnandrareo gny mofo dra visy. ²⁷ Ka miasa ho anigny hany maty levo, fa mesa ho anigny hany ze mahary ho anigny fiegna mandrakizay ze hamenigny zakan'Olo andrareo, akory Zagnahary Ray gny nagnisa tombo-kase taminazy." ²⁸ Boak'eo dra hoy ereo taminazy ho: "Ino gny sy maisy hataonay, ba hanovanay reo asan'Agnahary reo.?" ²⁹ Jesosy namaly dra nanao tamin'ereo ho: "Izao gny asan'Agnahary: dra gny hinoandrareo gny ray ze nirahiny. ³⁰ Dra hoy ereo taminazy ho: "Ino moa gny famatara hataonao, ba hahitanay vo hinoanay anao? Ino gny hanaonao? ³¹ Gny raibeko nihina gny mana tany agnefisy, araky gny voasorasy ho: 'Nameny mofo boaky andagnisy agny ereo hohany." ³² Boak'eo Jesosy namaly anereo ho: :Zakako amindrareo fa sy Mosesy gny nagnome andrareo gny mofo boaky andagnisy, fa gny Rako gny magnome andrareo gny tena mofo boaky andagnisy agny. ³³ Akory gny mofon'Agnahary dra gny mizoso boaky andagnisy agny dra magnome fiegna ho an'izao totolo izao." ³⁴ Dra hoy ereo taminazy ho: "Topoko, ameo anay mandrakariva ze mofo zay." ³⁵ Dra hoy Jesosy tamin'ereo ho: "Izaho gny mofonigny fiegna; ze magnato anahy sy ba ho resy sasy, dra ze mino anahy sy hangetaheta sasy. ³⁶ Kanefa fa nizakako tamindrareo fa nahita anahy avo handrareo, nefa sy mino. ³⁷ Ze olo mino amenigny Rako anahy dra hagnato anahy, dra ze magnato anahy dra sy ba hariako. ³⁸ Fa nizoso boaky andagnisy agny zaho, sy ba hanao gny sitrapoko manoka, fa gny sitrapon'Izy ze nagniraky Anahy. ³⁹ Dra izao gny sitrapon'Izy nagniraky Anahy, dra gny sy hagnirahako ze nameny anahy aby, fa hananga anereo amigny andro farany. ⁴⁰ Akory izao gny sitraponigny Rako, dra gny ba hahazoanigny maro ze mahita gny zanaky vo mino anazy gny fiegna andro farany Izy. ⁴¹ boak'eo nimonomono momna anereo gny Jiosy akory Izy nizaka ho: "Izaho gny mofo nizoso boaka andagnisy agny." ⁴² Dra hoy ereo ho: "Sy gny Jososy zanak'i Josefa ra io, fatasika gny ray amandreniny? Ino seky zakany ho: 'Nizoso boaky andagnisy agny zaho.' ⁴³ Jesosy namaly dra nanao tamin'ereo ho: "Azanogny gny fimonomonogna eo agnevondrareo. ⁴⁴ Sy misy olo afaky magnato Anahy raha sy gny Ray ze nagniraky anahy gny mitao anazy, dra hasangako izy amigny andro farany. ⁴⁵ Izay dra voasorasy ao amigny bokinigny paminany ho: 'Hapian'Agnahary ereo aby.' Ze nahare vo nianasy tamigny Ray gny magnato Anahy. ⁴⁶ Sy nisy nahita gny Ray, afa-sy ze avy amin'Agnahary, izy gny nahita gny Ray. ⁴⁷ Zakako amindrareo mary, fa ze mino gny mana fiegna mandrakizay. ⁴⁸ Izaho gny mofonigny fiegna. ⁴⁹ Gny Raibendrareo nihina gny mana tany agnefisy, dra maty ereo. ⁵⁰ Tihoky gny mofo nizoso boaky andagnisy agny, ba sy ho maty ze mihina amin'izay. ⁵¹ Izaho gny mofo velo nizoso boak'agny andagnisy. Raha misy olo mihina amity mofo tihoky, dra ho velo mandrakizay izy. Gny mofo ze hameko gny nofoko ho anigny fiegnan'izao totolo izao." ⁵² Niha-ory reo Jiosy dra nanomboky nialy hevisy, nanao anizahoky ho: "Ino gny ahafan'io lelahi io magnomeasika gny nofony ino?" Dra Hoy Jesosy tamin'ereo ho: ⁵³ "Zakako amindrareo mary vatany fa raha sy mihina gny nofonigny Zanak'olo handrareo vo mino gny liony, dra sy hana fiegna ao amindrareo. ⁵⁴ Na iza na iza mihina gny nofoko vo mino gny lioko dra mana fiegna mandrakizay, dra hasangako izy amigny andro farany. ⁵⁵ Fa gny nofoky gny tena fihina, vo gny lioko gny tena finomy. ⁵⁶ Ze mihina gny nofoko vo mino gny lioko gny mitoby ao aminahy, dra Izaho ao aminazy. ⁵⁷ Manahaky gny nagnirahanigny Ray velo anahy, vo manahaky gny hivelomako nohonigny Ray, ze mihina anahy, dra ho velo avo koa nohonigny Aminahy. ⁵⁸ Tihoky gny mofo igny nizoso boaky andagnisy agny, sy manahaky gny Raibe nihina dra maty zay. Ze mihina ty mofo tihoky dra ho velo mandrakizay." ⁵⁹ Fa Jesosy nizaka reo raha reo amigny Synagoga gny fa napianasy tao Kapernaomy Izy. ⁶⁰ Dra maro tamireo pianany ze nahare anizay gny nizaka ho: "Fapenara sorasy zao; iza gny afaky hagneky anizay?" ⁶¹ Jesosy noho Izy nahay tao aminazy fa nimonomono tamizay reo pianany, nizaka anereo ho: "Manafitohy andrareo ra zay io?" ⁶² Ko akory raha tokony hahita gny zanak'olo miakasy agny amigny nisy anazy taloha handrareo? ⁶³ Gny Fagnahy gny magnome fiegna; gny nofo sy ahazoa na ino na ino. Reo zaka ze nizakako tamindrareo dra fagnahy, dra fiegna reo. ⁶⁴ Bo misy ilany amindrareo sy mino." Fa Jesosy fa nahay hatramigny volohany ze sy hino vo ze hamadiky anazy. ⁶⁵ Hoy Izy ho: "Noho izay gny nizakako tamindrareo fa sy misy olo afaky magnato anahy raha sy namenigny Ray Anazy zay." ⁶⁶ Noho izay, maro tamireo pianany gny lasa dra sy niara-dia taminazy sasy. ⁶⁷ Dra Hoy Jesosy tamireo ro ambiny folo lahy ho: "Sy tehandeha ra handrareo sa handeha?" ⁶⁸ Dra Simona Petera namaly anazy ho: "Topo ho agny amin'iza moa zahay? Ino gny mana gny zakanigny fiegna mandrakizay, ⁶⁹ dra nino zahay dra magnato ba hahay fa hanao gny Masin'Agnahary." ⁷⁰ Hoy Jesosy tamin'ereo ho: "Sy Izaho ra gny nifily andrareo, ro ambiny folo, dra gny raiky amindrareo dra devoly?" ⁷¹ Dra Jodasy zanak'i Simona Iskariota gny zanany, akory izy, gny raiky amin'izy ro ambiny folo, ze hamadiky an'i Jesosy.